މާޒިޔާގެ ކޯޗަކަށް ޔޫރަޕާއި އޭޝިއާގެ ތަޖުރިބާކާރު ކޯޗު ޖެސިކް

މާޒިޔާ ސްޕޯޓްސް އެންޑް ރެކްރިއޭޝަނުގެ ކޯޗުގެ މަގާމަށް ޔޫރަޕާއި އޭޝިއާގެ މަތީ ފަންތީގައި މަސައްކަތް ކޮށްފައިވާ ކޯޗު ސާބިއާގެ މަޔޮޑްރަގް ޖެސިކް ހަމަޖައްސައިފިއެވެ.

މާޒިޔާގެ ކޯޗުގެ މަގާމު ހުސްވީ ދާދި ފަހުން ނިމުނު ޕްރެޒިޑެންޓްސް ކަޕަށް ފަހު އެ ޓީމުގެ ކޯޗަކަށް ހުރި ރާއްޖޭގެ ތަޖުރިބާކާރު ކޯޗު މުޙައްމަދު ޝިޔާޒް (މޯހަން) މަގާމުން ވަކިކުރުމުންނެވެ. މި ސީޒަނަށް މާޒިޔާގެ ކޯޗަކަށް މޯހަން ހަމަޖެއްސި ނަމަވެސް، މޯހަންއަށް މާޒިޔާގެ ވަޒީފާ ގެއްލުނީ ޖެހިޖެހިގެން ތިން މެޗުން އެ ޓީމު ބަލިވެފައިވަނިކޮށެވެ. މި ފަހަރުގެ ޕްރެޒިޑެންޓްސް ކަޕުގެ ފައިނަލުން ކުލަބު ވެލެންސިއާ އަތުން މާޒިޔާ ބަލިވި ނަމަވެސް، ސީޒަން ފެށުމަށް ކުޅުނު ޗެރިޓީ ޝީލްޑް މެޗުން މާޒިޔާ ވަނީ މޯހަންގެ ކޯޗުކަމުގައި ވެލެންސިއާ ބަލިކޮށް ޝީލްޑް އުފުލާލާފައެވެ.

މިދިޔަ ހަފުތާގައި މާޒިޔާއިން މޯހަން ވަކިކުރިއިރު، ބުރާސްފަތި ދުވަހު ގައުމީ ފުޓްބޯޅަ ދަނޑުގައި ބޭއްވި ނޫސްވެރިންގެ ބައްދަލުވުމެއްގައި އެ ޓީމުގެ ކޯޗަކަށް ޖެސިކް ވަނީ ހަމަޖައްސާފައެވެ. މާޒިޔާގެ ކޯޗަކަށް އޭނާ ހަމަޖައްސާފައިވަނީ މި ސީޒަނުގެ ނިޔަލަށެވެ. މީގެ އިތުރުން މާޒިޔާއިން ވަނީ ޖެސިކާއެކު އެ ޓީމަށް ސާބިއާގެ ފިޓްނަސް ކޯޗެއް ކަމަށްވާ ގޯރާން ގުޒިޖާންވެސް ގެނެސްފައެވެ.

އުމުރުން މިހާރު 63 އަހަރުގެ ޖެސިކް ކޯޗިން ކެރިއަރު ފެށީ 1997 ވަނަ އަހަރު ސާބިއާގެ ރެޑްނިކީންނެވެ. އޭގެ ފަހުން އޭނާ ވަނީ ޓިއުނީޝިއާ އާއި، ތުރުކީ، އީރާނާއި، ބަލްގޭރިއާ، ޔޫއޭއީ، މޮންޓެނީގްރޯ، ޗައިނާ، ލީބިޔާ، މިޔަންމާ އަދި ސައުދީގެ ކުލަބުތަކަށް އިރުޝާދުދީފައެވެ.

ކޯޗިން ކެރިއަރުގައި ޖެސިކް ވަނީ އީރާނުގެ ސްފަޒިއޭންއަށް އަރަބް ޗެމްޕިއަންސް ލީގު ކާމިޔާބުކޮށްދީފައެވެ. އަދި އޭނާ ވަނީ ބަލްގޭރިއާގެ ލީގާއި، ބަލްގޭރިއާ ކަޕް އަދި ބަލްގޭރިއާ ސުޕަ ކަޕުގެ އިތުރުން ލީބިޔަން ޕްރިމިއާ ލީގާއި، ލީބިޔަން ކަޕް އަދި ލީބިޔަން ސުޕަ ކަޕުވެސް ކާމިޔާބުކޮށްފައެވެ. މީގެ އިތުރުން މިޔަންމާގެ ޔަންގޮން ޔުނައިޓެޑާއެކު ޖެސިކް ވަނީ އެ ގައުމުގެ ލީގު ޗެމްޕިއަންކަންވެސް ހޯދާފައެވެ.

ޖެސިކަކީ ފުރަތަމަ ޑިވިޝަނުގައި މާޒިޔާއަށް ކޯޗުކޮށްދޭނެ ބިދޭސީ ތިންވަނަ ކޯޗެވެ. އެގޮތުން މީގެ ކުރިން މާޒިޔާއަށް ފުރަަތަމަ ޑިވިޝަނުގައި ދެ ފަހަރެއްގެ މަތިން މެސެޑޯނިއާގެ ކޯޗު މަރުޖާން ސެކުލޮސްކީ އިރުޝާދުދިންއިރު، މިދިޔަ ސީޒަނުގެ މެދުތެރެއިން މާޒިޔާގެ ކޯޗުކަމާ ހަވާލުވީ ސާބިއާގެ ރިސްޓޯ ވިޑަކޮވިޗެވެ.

ކުރިއަށް ދިވެހި ޕްރިމިއާ ލީގާ އަމާޒުކޮށް މާޒީޔާގެ ކޯޗުގެ މަގާމާ ޖެސިކް ހަވާލުވިއިރު، ދިވެހި ޕްރިމިއާ ލީގު ފެށުމަށް ތާވަލުކޮށްފައިވަނީ މި މަހުގެ 16 ވަނަ ދުވަހެވެ. ޒިޔާއަކީ އެންމެ ފަހުގެ ދެ ސީޒަނުގެވެސް ލީގު ޗެމްޕިއަނުންނެވެ. މީގެ އިތުރުން މާޒިޔާއިން ވަނީ މި އަހަރުގެ އޭއެފްސީ ކަޕުގެ ގްރޫޕް ސްޓޭޖުން ޖާގައެއްވެސް ހޯދާފައެވެ.