މާފުށީ ޖަލުގައި ކޮވިޑް-19 ގެ އެކްޓިވް ކޭސްތަކުގެ އަދަދު ދަށަށް ޖެހިލައިފިއެވެ.

މޯލްޑިވްސް ކަރެކްޝަނަލް ސަރވިސްއިން ހާމަކޮށްފައިވާ ތަފާސްހިސާބުތަކަށް ބަލާއިރު ޖެނުއަރީ މަހުގެ 31 ވަނަ ދުވަހު ގައިދީންގެ ތެރެއިން މިވަގުތު ޕޮޒިޓިވްވެފައިވާ މީހުންގެ އަދަދު ވަނީ 149 އަށް ތިރިވެފައެވެ. 82 ގައިދީން ކަރަންޓީނުގައި ތިބިއިރު 123 ގައިދީއަކު ވަނީ ބަލިން ފަސޭހަވެފައެވެ. އޭގެކުރިން ޖެނުއަރީ މަހުގެ 30 ވަނަ ދުވަހު ގައިދީންގެ އެކްޓިވް ކޭހުގެ އަދަދު ހުރީ 156 ގައެވެ. އެދުވަހު ކަރަންޓީނުގައި ތިބީ 82 ގައިދީންނެވެ. އަދި 116 ގައިދީއަކު ބަލިން ފަސޭހަވެފައިވެއެވެ. ޖެނުއަރީ މަހުގެ 29 ވަނަ ދުވަހު ގައިދީންގެ ތެރެއިން ޕޮޒިޓިވްވެފައިވާ މީހުންގެ އަދަދު ހުރީ 153 ގައެވެ. 82 ގައިދީން ކަރަންޓީނުގައި ތިބިއިރު 114 ގައިދީއަކު ވަނީ ބަލިން ފަސޭހަވެފައެވެ. އޭގެކުރިން ޖެނުއަރީ މަހުގެ 28 ވަނަ ދުވަހު ގައިދީންގެ އެކްޓިވް ކޭހުގެ އަދަދު ހުރީ 95 ގައެވެ. އެދުވަހު ކަރަންޓީނުގައި ތިބީ 180 ގައިދީންނެވެ. އަދި 74 ގައިދީއަކު ބަލިން ފަސޭހަވެފައިވެއެވެ. ޖެނުއަރީ މަހުގެ 27 ވަނަ ދުވަހު އެކްޓިވް ކޭހުގެ އަދަދު ހުރީ 66 ގައެވެ. އެދުވަހު 215 ގައިދީއަކު ކަރަންޓީނުގައި ތިބިއިރު ބަލިން ފަސޭހަވެފައިވަނީ 71 ގައިދީންނެވެ.

ގައިދީން ކޮވިޑަށް ޕޮޒިޓިވްވާ މިންވަރު ދަށަށް ދާން ފަށާފައިވާއިރު ޖަލުގައި މަސައްކަތްކުރާ ޕްރިޒަން އޮފިސަރުންވެސް ކޮވިޑަށް ޕޮޒިޓިވްވާ މިންވަރު އަންނަނީ ދަށްވަމުންނެވެ. އެގޮތުން ޖެނުއަރީ މަހުގެ 31 ވަނަ ދުވަހު އޮފިސަރުންގެ އެކްޓިވް ކޭހުގެ އަދަދު ހުރީ 7 ގައެވެ. ކަރަންޓީނުގައި އެއްވެސް އޮފިސަރަކު ނެތްއިރު 26 އޮފިސަރުން ބަލިން ފަސޭހަވެފައިވެއެވެ. ޖެނުއަރީ މަހުގެ 30 ވަނަ ދުވަހު އޮފިސަރުންގެ އެކްޓިވް ކޭހުގެ އަދަދު ހުރީ 10 ގައެވެ. އެދުވަހު ދެ އޮފިސަރުން ކަރަންޓީނުގައި ތިބިއިރު ބަލިން ފަސޭހަވެފައިވަނީ 23 އޮފިސަރުންނެވެ. ޖެނުއަރީ މަހުގެ 29 ވަނަ ދުވަހު އޮފިސަރުންގެ އެކްޓިވް ކޭހުގެ އަދަދު ހުރީ 15 ގައެވެ. ކަރަންޓީނުގައި 3 އޮފިސަރުން ތިބިއިރު ބަލިން ރަނގަޅުވެފައިވަނީ 16 އޮފިސަރުންނެވެ. ޖެނުއަރީ މަހުގެ 28 ވަނަ ދުވަހު އޮފިސަރުންގެ އެކްޓިވް ކޭހުގެ އަދަދު ހުރީ 12 ގައެވެ. 3 އޮފިސަރުން ކަރަންޓީނުގައި ތިބިއިރު ބަލިން ރަނގަޅުވެފައިވަނީ 16 އޮފިސަރުންނެވެ. ޖެނުއަރީ މަހުގެ 27 ވަނަ ދުވަހު އޮފިސަރުންގެ އަދަދު ހުރީ އޭގެކުރީ ދުވަހާ އެއްގޮތަށެވެ.

މާފުށީ ޖަލުގައި އެކްޓިވް ކޭހުގެ އަދަދު މަތިވާން ފަށާފައިވާއިރު މާފުށީ ޖަލުގައި ތިބި ހައިރިސްކް ގައިދީން ގެއަށް ބަދަލު ކުރަން ވަނީ ފަށާފައެވެ. ޖެނުއަރީ 27 ވަނަ ދުވަހު ގައިދީން ގެޔަށް ބަދަލުކުރަން ފަށާފައިވަނީ ޖަލުގައި ކޮވިޑް ހާލަތު ގޯސްވަމުން އަންނާތީކަމަށް ކަރެކްޝަންސް އިން ބުނެއެވެ.

މާފުށި ޖަލުން ކޮވިޑް ކޭސްތަކެއް ފެނި އެޖަލު ކުއްލި ހާލަތަށް ގެނެސްފައިވަނީ ޖެނިއަރީ 14 ވަނަ ދުވަހުއެވެ. ކަރެކްޝަންސް އިން ބުނީ، ކަރަންޓީންގައި ތިބި ގައިދީން ތިބޭނީ އެހެން ގައިދީންނާއި ވަކިން ކަމަށެވެ. އެމީހުންގެ ކަރަންޓީން މުއްދަތުގައި، ޖަލު ގޮޅިން ބޭރަށް ނުނެރޭނެ ކަމަށެވެ. އަދި ޕޮޒިޓިވްވާ ގައިދީން އެކަހެރި ކުރެވި، ބޭނުންވާ ސިއްޙީ ފަރުވާ ދެމުން ގެންދާ ކަމަށެވެ. ހާލަތު ގޯސްވެއްޖެ ނަމަ ފެސިލިޓީތަކަށް ގެންދިޔުމުގެ އިންތިޒާމްވެސް ހަމަޖެހިފައިވާ ކަމަށް ކަރެކްޝަނުން ބުނެއެވެ.

ޖަލު އާންމު ހާލަތަށް ގެނެވެންދެން ރައްކާތެރިކަމުގެ ފިޔަވަޅެއްގެ ގޮތުން ގައިދީންނާއި ބަންދުކޮށްފައިވާ މީހުންނަށް އާއިލީ ބައްދަލުވުންތަކާއި ވަކީލު ބައްދަލުވުންތަކުގެ އިތުރުން ކޯޓު އަޑުއެހުންތައް ކުރިއަށް ގެންދިއުމަށް ނިންމާފައި ވަނީ އޮންލައިންކޮށެވެެ.

މީގެ ކުރިންވެސް ޖަލުތަކުގައި ހާލަތު ގޯސްވެ 522 މީހުން ޕޮޒިޓިވްވެ، 17 ހައިރިސްކް ގައިދީން ވަގުތީ ގޮތުން ގޭބަންދަށް ބަދަލުކުރަން ޖެހުނެވެ.