ރާއްޖެއިން އިތުރު 2754 މީހުން ކޮވިޑް-19ށް އަށް ޕޮޒިޓިވްވެއްޖެއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ) އިން ހާމަކޮށްފައިވާ ތަފާސްހިސާބުތަކަށް ބަލާއިރު ފާއިތުވި 24 ގަޑިއިރު 7852 ސާމްޕަލް ޓެސްޓްކޮށްފައިވެއެވެ. އޭގެތެރެއިން 3725 ސާމްޕަލަކީ މާލެ ސަރަހައްދުން ޓެސްޓްކޮށްފައިވާ ސާމްޕަލްތަކެވެ. މާލެ ސަރަހައްދުން ޓެސްޓްކުރި 3725 ސާމްޕަލްގެ ތެރެއިން 1407 ސާމްޕަލް ވަނީ ޕޮޒިޓިވްވެފައެވެ. މިއާއެކު މާލޭގެ ސާމްޕަލް ޕޮޒިޓިވިޓީ ރޭޓް ހުރީ 38 އިންސައްތައިގައެވެ. އޭގެކުރީ 24 ގަޑިއިރު މާލޭގެ ސާމްޕަލް ޕޮޒިޓިވިޓީ ރޭޓް ހުރީ 36 އިންސައްތައިގައެވެ.

ބާކީ 4127 ސާމްޕަލްގެ ތެރެއިން 962 މީހުން ޕޮޒިޓިވްވެފައިވަނީ އަތޮޅުތަކުންނެވެ. ހިނގަމުންދާ ރިސޯޓްތަކުން 48 މީހުން ޕޮޒިޓިވްވެފައިވެއެވެ. 337 މީހުން ޕޮޒިޓިވްވެފައި ވަނީ ކޮންތަނަކުން ކަމެއް ދެނެގަނެވިފައެއްނުވެއެވެ.

މިއާއެކު މުޅި ރާއްޖެއިން ކޮވިޑަށް ޕޮޒިޓިވްވީ މީހުންގެ އަދަދު ވަނީ 138،880 އަށް އަރާފައެވެ. މީގެތެރެއިން 120،821 މީހުން ބަލިން ރަނގަޅުވެފައިވާއިރު މިވަގުތު އެކްޓިވް ކޭހުގެ އަދަދަކީ 17،770 އެވެ. މީގެތެރެއިން 63 މީހަކަށް އަންނަނީ ހޮސްޕިޓަލްތަކުގައި އެޑްމިޓްކޮށްގެން ފަރުވާ ދެމުންނެވެ.

ރާއްޖެއިން 276 މީހުން ވަނީ މިބަލީގައި ނިޔާވެފައެވެ.

ކޮވިޑް-19 ކޮންޓްރޯލް ކުރުމަށް ފިޔަވަޅުތައް ވަރުގަދަ ނުކުރި ނަމަވެސް މިހާރު އަޅާފައިވާ ފިޔަވަޅުތަކާއި އެއްގޮތަށް އަމަލުކޮށް، ގިނަ މީހުން އެއްވެ ނޫޅުމަށް ކަމާބެހޭ ފަރާތްތަކުން ދަނީ އިލްތިމާސްކުރަމުންނެވެ. އޮމިކްރޯން ވޭރިއެންޓްއާއެކު ބަލި ފެތުރޭ މިންވަރު ވަނީ އިތުރުވެފައެވެ. އެހެންކަމުން ހައިރިސްކް މީހުން އިތުރަށް ސަމާލުވުމަށް ވެސް އިލްތިމާސްކޮށްފައިވެއެވެ.