ކުރީގެ ރައީސް އަބްދުﷲ ޔާމީން އިސްވެ ހުންނަވައިގެން އިންޑިއާ އައުޓްގެ ނަމުގައި އިދިކޮޅުން ކެމްޕޭނު ކުރިއަށްގެންދަނީ އެކަމުގެ ނުރައްކާތެރިކަން އެނގިތިބެކަމަށް, ރައީސް އޮފީހުގެ މިނިސްޓަރ މުހައްމަދު ޝިފާޒު ވިދާޅުވެއްޖެއެވެ.
ރާއްޖެޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުން ޝިފާޒު ވިދާޅުވީ, ރައީސް ޔާމީނު އިންޑިއާ އައުޓް ކެމްޕޭނު ކުރިއަށް ގެންދަވަނީ އެކަމުގައި ހުރި ނުރައްކާތެރިކަމާއި ކަންބޮޑުވާންޖެހޭ ކަންތައްތައް އެމަނިކުފާނަށް އެނގިވަޑައިގެންހުންނަވާ ކަމަށެވެ. އަދި މި ކެމްޕޭނަކީ ގައުމީ ސަލާމަތަށްވެސް ހުރި ބޮޑު ނުރައްކަލެއްގެ ގޮތުގައި ފާހަގަކުރައްވައި ޝިފާޒު ވަނީ, ރައްޔިތުންނަށް މިފަދަ ގެއްލުންހުރި ކަމެއް ރައީސް ޔާމީން ކުރައްވާ ސަބަބަކާމެދު ސުވާލު އުފައްދާފައެވެ.
ހަމައެހެންމެ ވަކި ސިޔާސީ ޕާޓީއަކަށް ތާއީދުކުރި ނަމަވެސް އެބަޔަކު ދައްކާ ވާހަކަތަކުގެ ހަގީގަތް ބަލައި، އޭގެ ތެރެއިން ރަނގަޅު ކަންކަަމަށް ތާއީދު ކުރުމުގެ މުހިންމުކަން ޝިފާޒު ފާހަގަކުރެއްވިއެވެ.
އިދިކޮޅު ކޯލިޝަނުގައި ރައީސް ޔާމީން އިސްކޮށް ހުންނަވައިގެން އަންނަނީ ރާއްޖޭގައި ތިބި އިންޑިއާ މީހުން ބޭލުމަށް ގޮވާލަމުންނެވެ. އަދި ފާރުތަކުގައިވެސް އިންޑިއާ އައުޓް ޖެހުމަށް ޔާމީނު ގޮވާލެއްވިތާ މާގިނައިރެއް ނުވަނީސް ރަށެއްގެ ސްކޫލްގެ ފާރުގައިވެސް ވަނީ އިންޑިއާ އައުޓް ޖަހާފައެވެ.
މިފަދަ އަމަލުތަކުގެ ސަބަބުން ރާއްޖޭގައިތިބި އިންޑިއާ މުދައްރިސުންނަށް ނޭދެވޭ އަސަރުކުރާކަން އެޑިޔުކޭޝަން މިނިސްޓްރީންވެސް ވަނީ ފާހަގަކުރައްވާފައެވެ. އަދި މީގެ ސަބަބުން ރާއްޖޭގެ ސްކޫލުތަކުގައި ކިޔަވާ ދަރިވަރުންނަށް ވެސް އޭގެ ގެއްލުންތައް ހުރިކަން ފާހަގަކޮށް މިނިސްޓްރީން ވަނީ އެކަން ކުށްވެރިކޮށްފައެވެ.
