ތަފްސީލު ނެތި ބަޖެޓް ފާސްކުރަނީ، ރައީސް މުއިއްޒުގެ ހެޔޮފުޅު ކަމަށް އާދޭސް ދަންނަވާނެ އަޅުންތަކެއް މަޖިލީހުގައި ބައިތިއްބައިގެން ވެރިކަން ކުރެއްވުމަށް

އެއްވެސް ތަފްސީލެއް ނެތި ސަރުކާރުން ރައްޔިތުންގެ މަޖިލީހަށް ފޮނުވި ބަޖެޓް ފާސްކުރައްވަނީ، ރައީސް މުއިއްޒުގެ ހެޔޮފުޅު ކަމަށް އާދޭސް ދަންނަވާނެ އަޅުންތަކެއް މަޖިލީހުގައި ބައިތިއްބައިގެން ވެރިކަން ކުރެއްވުމަށް ކަމަށް އެމްޑީޕީގެ ކުރީގެ ނައިބު ރައީސް މުޙައްމަދު ޝިފާޒް ވިދާޅުވެއްޖެ އެވެ.

ރާއްޖެ ޓީވީގެ ފަލަސުރުޚީ ޕްރޮގްރާމުގައި ވާހަކަ ދައްކަވަމުން ޝިފާޒް ވިދާޅުވީ، ސަރުކާރަށް ދެ އަހަރު ވީ އިރު ގައުމަށް ލިބުނު އެންމެ ބޮޑު ގެއްލުމަކީ، ވީނުވީއެއް ނޭނގި މި ސަރުކާރުން 100 ބިލިއަން ރުފިޔާއަށްވުރެ ގިނަ ދެ އަހަރުގެ ދައުލަތުގެ ބަޖެޓް ގެއްލުވާލުން ކަމުގަ އެވެ. އަންނަ އަހަރަށް ހުށަހަޅާފައިވާ ބަޖެޓް ފާސްކުރާ އިރު ވެސް ސަރުކާރު އެކައުންޓަބަލް ކުރެވޭނެ ގޮތަކަށް، ވަކި ރަށަކަށް ހާއްސަކޮށްފައިވާ ޕްރޮޖެކްޓްތަކުގެ ތަފްސީލު ބަޖެޓުން ފެންނަން ނެތްކަން ޝިފާޒް ފާހަގަކުރެއްވި އެވެ.

މިގޮތަށް ބަޖެޓް ފާސްކުރައްވަނީ ރައީސް މުއިއްޒުގެ ހެޔޮފުޅުކަމަށް އާދޭސް ދަންނަވާނެ އަޅުންތަކެއް ރައްޔިތުންގެ މަޖިލީހުގެ މެންބަރުންގެ ގޮތުގައި ބައިތިއްބައިގެން ވެރިކަން ކުރައްވަން ކަމަށް ޝިފާޒް ވިދާޅުވި އެވެ.

ސަރުކާރަށް ދެ އަހަރު ވީ އިރު ގައުމަށް ލިބުނު އެންމެ ބޮޑު ގެއްލުމަކީ، ވީނުވީއެއް ނޭނގި މި ސަރުކާރުން 100 ބިލިއަނަށް ވުރެ ގިނަ، ދެ އަހަރުގެ ދައުލަތުގެ ބަޖެޓު ގެއްލުވާލި މައްސަލަ. ގެއްލުވާލިއޭ މި ދަންނަވަނީ ބަޖެޓް ފާސްކުރާ އިރު ނެތް އެޔަށް އެކައުންޓަބަލް ކުރެވޭނެ ގޮތެއް. މިއީ ޕްރޮގްރާމް ބަޖެޓެއް ނޫން، ޕޮރޮގްރާމް ބަޖެޓެއް ވިއްޔާ ވަކި ވަކި ރަށްރަށަށް ހުރި ޕްރޮޖެކްޓްތަކުގެ ތަފްސީލު ބަޖެޓުން ފެންނަން އޮންނާނެ. ތަފްސީލެއް ނެތި ރައްޔިތުންގެ މަޖިލީހުން ބަޖެޓެއް ފާސް ކުރާނީ، ހަގީގަތުގަވެސް ރައީސުލްޖުމްހޫރިއްޔާގެ ހެޔޮފުޅުކަމަށް އާދޭސް ދަންނަވާ، ރައްޔިތުންގެ މަޖިލީހުގެ މެމްބަރުންގެ ގޮތުގައި ރައީސް މުއިއްޒުގެ އަޅުން ބައިތިއްބައިގެން ވެރިކަން ކުރުމުގެ ބޭނުމުގަ.

އެމްޑީޕީގެ ކުރީގެ ނައިބު ރައީސް މުހައްމަދު ޝިފާޒް

އަންނަ އަހަރަށް ފާސްކުރުމަށް މަޖިލީހަށް ފޮނުވާފައިވާ 64.2 ބިލިއަން ރުފިޔާގެ ބަޖެޓާ ބެހޭގޮތުން ވާހަކަދައްކަވަމުން ޝިފާޒް ވިދާޅުވީ، މީގެ ކުރިން ދެ އަހަރަށް 100 ބިލިއަނަށްވުރެ ގިނަ ރުފިޔާ ފާސްކޮށްފައިވާ ކަމަށެވެ. ނަމަވެސް އެ ބަޖެޓުން ރާއްޖޭގެ ރަށެއްގައި ގަލެއް ބޭއްވިފައި ނެތް އިރު، މި ސަރުކާރު ވެރިކަމަށް އައި އިރު ހިނގަހިނގާ ހުރި މަޝްރޫއުތައް ވެސް ހުއްޓިފައިވާކަން ޝިފާޒް ފާހަގަކުރައްވި އެވެ.

100 ބިލިއަނަށްވުރެ ގިނަ ރުފިޔާއަށް ވީ ގޮތެއް ނޭނގިގެން އުޅޭއިރު މި ފެންނަނީ ފުޓްސަލް ދަނޑެއް ހުޅުވަންވެސް ރައީސް މުއިއްޒު އަދި ނައިބު ރައީސް ބޮޑު ހަރަދުކޮށްގެން ވަކިވަކި އެއަރޓެކްސީތަކުގައި އެއްރަށަކަށް ވަޑައިގަންނަވާ މަންޒަރު ކަމުގައި ޝިފާޒް ވިދާޅުވި އެވެ. އަދި މިއީ ދައުލަތުގެ ފައިސާ އިސްރާފުކުރުމުގެ ސާފު މިސާލެއް ކަމަށްވެސް ޝިފާޒް ވިދާޅުވި އެވެ.

ދައުލަތުގެ ފައިސާ މިކަހަލަ ކަންކަމަށް އިސްރާފުކުރުމުގެ އިތުރުން، މަޖިލީސް މެންބަރުންނަށް ބެހުމަށާއި، އެކި ތަންތަނުގައި ފައިސާ ރައްކާކޮށްގެން ރައީސް މުއިއްޒު ދައުލަތުގެ ހަޒާނާއިން ވައްކަން ކުރައްވާ ކަމަށް ޝިފާޒް ތުހުމަތުކުރެއްވި އެވެ. ރައީސް މުއިއްޒު ވައްކަން ކުރައްވާ ވާހަކަ ކިތަންމެ ބާރަށް ދެއްކިޔަސް، ތިމަންމަނިކުފާނުގެ ބޮލުގައި ވައްކަމުގެ ތުހުމަތު އަޅުވައިފި ކަމަށް ވިދާޅުވެ ތަހުގީގެއް ހިންގަވަން ރައީސް މުއިއްޒަށް މިހާރު ކެރިވަޑައިނުގަންނަވާނެ ކަމަށް ޝިފާޒް ވިދާޅުވި އެވެ. ވައްކަން ކުރައްވަނީ އެހާވެސް ހާމަކަން ބޮޑު ގޮތެއްގައި ކަމަށް ޝިފާޒް ފާހަގަކުރެއްވި އެވެ.

ދިވެހިރާއްޖޭގެ ތާރީހުގައި އެންމެ ބޮޑު ބަޖެޓުތައް ފާސްކޮށްފައިވަނީ މިސަރުކާރުންނެވެ. ނަމަވެސް އަހަރުން އަހަރަށް ފާސް ކުރާ ބަޖެޓް ހުސްވާއިރު، ރާއްޖޭގެ އެއްވެސް ހިސާބެއްގައި އެކަށީގެންވާ ތަރައްގީގެ މަޝްރޫއެއް ސަރުކާރުގެ ފަރާތުން ފަށާފައި ނުވުމަކީ ރައްޔިތުންގެ ބޮޑު ކަންބޮޑުވުމެކެވެ. އަނެއްކޮޅުން ބަޖެޓުގައި ތަފްސީލުތައް ނުހިމަނާ، މަޖިލިސް މެމްބަރުން އަޅުވެތިކޮށްގެން، ރައީސް މުއިއްޒު ގެންދަވަނީ އެމަނިކުފާނުގެ ދޫފުޅުން ބޭރުކުރައްވާ ކޮންމެ ބަހަކީ ފުއްދަވާނޭ ވައުދެއްކަމަށް ރައްޔިތުންނަށް ވިސްނައިދޭން މަސައްކަތް ކުރައްވަމުންނެވެ.