މިހާރު މިގައުމުގެ ވެރިކަމުގައި، ހުރީ ދިވެހި ރައްޔިތަކަށް އިހުތިރާމެއް، ގަދަރެއް ކުރާނެ ބޭފުޅެއް ނޫން، އެއީ ގައުމު ލޫޓުވާ ވެރިއެއް: ޝިފާޒް
ރައީސް މުއިއްޒަކީ ދިވެހި ރައްޔިތުންނަށް އިހުތިރާމާއި ގަދަރެއް ނުކުރާ ބޭފުޅެއް ނޫން
ލޫޓުވައިފި ލޫޓުވައިފި އެއްވުމުގައި އެމްޑީޕީގެ ކުރީގެ ނައިބު ރައީސް މުހައްމަދު ޝިފާޒް ވާހަކަ ދައްކަވަނީ - 03 އޮކްޓޯބަރު 2025
މިހާރު ރާއްޖޭގެ ވެރިކަމުގައި ހުންނެވި ވެރިޔާ، ރައީސް ޑރ މުހައްމަދު މުއިއްޒަކީ ދިވެހި އެއްވެސް ރައްޔިތަކަށް އިހުތިރާމެއް، ގަދަރެއް ކުރާނޭ ބޭފުޅެއް ނޫން ކަމަށާއި އެއީ މުޅި ގައުމު ލޫޓުވަމުން ދާ ވެރިއެއް ކަމަށް އެމްޑީޕީގެ ކުރީގެ ނައިބު ރައީސް މުހައްމަދު ޝިފާޒު ވިދާޅުވެއްޖެ އެވެ.
ހުކުރު ދުވަހުގެ ރޭ ކުރިއަށް ގެންދާ ލޫޓުވާލައިފި އެއްވުމުގައި ވާހަކަދައްކަވަމުން ޝިފާޒު ވިދާޅުވީ ރާއްޖެއަށް ސުލްހަވެރި ހަރަކާތް ތައާރަފް ކުރީ އެމްޑީޕީން ކަމަށާއި، އިސްލާހީ ބަދަލު ރާއްޖެއަށް ގެނެސްފައިވަނީ އެމްޑީޕީން ކަމަށެވެ.
އަދި ބުރަ މަސައްކަތުން ބަޔަކު ބޮޑެތި ގުރުބާނީ ތަކެއް ވެ، ދާ އޮހޮރުވައިގެން ގައުމަށް ގެނެސްފައިވާ އިސްލާހީ ބަދަލުތައް އޮޔާލާ ފުނޑުފުނޑުކޮށްލާއިރު، ބަލަހައްޓައިގެން ނުތިބޭނެ ކަމަށް ޝިފާޒު ވިދާޅުވިއެވެ.
ޝިފާޒު ވިދާޅުވީ އެމްޑީޕީ އަކީ ސިޔާސީ ހަރަކާތް ދުވަހަކުވެސް ސިއްރުން ހިންގި ބައެއް ނޫން ކަމަށާއި އެމްޑީޕީން ކުރާކަމެއް ކުރާނީ ފާޅުގައި އެންމެނަށް ވެސް ފެންނަ ގޮތަށް ކަމަށެވެ. އެގޮތުން މި އެއްވުމަށް ނިކުމެ މިތިބީ ފާޅުގައި މި އަނިޔާވެރި ވެރިކަން ސައިޒުކުރަން ކަމަށް އޭނާ ވިދާޅުވި އެވެ.
ޝިފާޒް ވިދާޅުވީ މިހާރު ވެރިކަމުގައި އެ ހުންނެވި ބޭފުޅާ، ރައީސް މުއިއްޒުއަކީ ދިވެހިން ލެޔާއި ދައު އޮހޮރުވާލައިގެން ހޯދި ހައްގުތަކުގައި އެއްވެސް ހިއްސާއެއް އޮތް ބޭފުޅެށް ނޫން ކަމަށާއި އެހެންކަމުން އެ ބޭފުޅާއަށް ކޮންމެ ގޮތެއް ވަރިހަމަވާނެ ކަމަށެވެ. އެހެން ކަމުން ދިވެހި ރައްޔިތުން މި ނުކުތީ އެކަން އެ ބޭފުޅާއަށް ކަމަކަށް ހަދަން ކަމަށް ޝިފާޒް ވިދާޅުވި އެވެ.
ޝިފާޒު ވިދާޅުވީ ހުކުރު ދުވަހުގެ ރޭ ގެ ބޮޑު އެއްވުމުގެ ކުރިން ފުލުހުންގެ އިންޓެލްގެ ވެރިޔާ ވެސް ބަދަލުކޮށް އެ މަގާމަށް ރައީސް މުއިއްޒުގެ އަނބިކަނބަލުން ސާޖިދާގެ ބޭބެއެއް އަޔަން ކޮށްފައިވާ ކަމަށެވެ. އަދި މުޅި ފުލުސް އޮފީހުގައި މިވަގުތު އޮތީ ސާޖިދާގެ ބޭބެގެ ކޮންޓްރޯލް ކަމަށް ވެސް އޭނާ ވިދާޅުވި އެވެ.
އަދި ފުލުހުންގެ މުއައްސަސާއަކީ މިވަގުތު ވަރަށް ހަރުދަނާ އުސޫލުތަކެއް ގާއިމްވެ، ހަރުދަނާ ވަމުން އަންނަ މުއައްސަސާއެއް ކަމަށާއި އެ މުއައްސަސާ ސިޔާސީ ބޭނުމަށް ހަލާކުރަން ފުރުސަތު ނުދެއްވާނޭ ކަމަށް ޝިފާޒު ވިދާޅުވި އެވެ.
ސިފާޒް ވިދާޅުވީ ސަރުކާރު މުއައްސަސާތައް ވެސް މުށުތެރެއަށް ލައިގެން ބަގުޑިބައްދައިގެން ހުންނެވި ރައީސް މުއިއްޒަކީ މި ގައުމަށް، ދިވެހި ރައްޔިތުންނަށް އެއްވެސް އަގަލެއް ކުލުނެއް ހުރި ބޭފުޅެއް ކަމަށާއި އެބޭފުޅާއަކީ ދިވެހިރައްޔިތުންނަށް އެއްވެސް ގަދަރެއް އިހުތިރާމެއް ވެސް ކުރައްވާނޭ ބޭފުޅެއް ނޫންކަމަށެވެ.
ތިބޭފުޅުން ވިދާޅުވެއްޖެ ވަރަށް ސާފުކޮށް، ހައްގަކުން ހައްގަކުން ރައްޔިތުންގެ މުޅި ހައްގުތައް އެދަނީ ލޫޓުވަމުން، ލޫޓުވައި ނިންމައިފި. އެ ލޫޓުވި ހައްގުތާއި ހެދި މި ނުކުތީ. އަޅުގަނޑުމެން ނުކުންނާނީ ރައީސް މުއިއްޒު ސައިޒް ކުރަން. ވެރިކަމުން ދުކުރުމުގެ މި އަޒުމުގަ. މި ހިތްވަރުގަ. ރައީސް މުއިއްޒު އިސްތިއުފާ. ބޮޑު ވަގު މުއިއްޒު، ބޮޑު ލުޓޭރު މުއިއްޒު އިސްތިއުފާ.އެމްޑީޕީގެ ކުރީގެ ނައިބު ރައީސް މުހައްމަދު ޝިފާޒު
ޝިފާޒު ވިދާޅުވީ ރައީސް މުއިއްޒަކީ މުޅި އެންސްޕާ ވެސް ހުސްކޮށް ލޫޓުވާލައި މުޅި އާސަންދަ ވެސް ލޫޓުވާލި ބޭފުޅެއް ކަމަށެވެ. އެހެން ކަމުން އެންމެ ވަގުތުކޮޅަކަށް ވެސް ރައީސް މުއިއްޒު ވެރިކަމުގައި ބަހައްޓަން ދިވެހި ރައްޔިތުން ބޭނުން ނުވާ ކަމަށް ޝިފާޒު ވިދާޅުވި އެވެ.
