މި ސަރުކާރަކީ ރައްޔިތުންގެ ނިކަމެތިކަމުގެ "އެޑްވާންޓޭޖް" އިންތިހާ އަށް ނަގާ ސަރުކާރެއް: ޝިފާޒް
ބޯހިޔާވަހިކަމުގެ މައްސަލައިގައި ހައްލު ހޯދާނުދީ ސަރުކާރުން ދަނީ އާއްމުން ތަޅުވަމުން ކަމަށް ޝިފާޒް ވިދާޅުވި
ޝިފާޒް ރާއްޖެޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަނީ
ރައީސް ޑރ.މުހައްމަދު މުއިއްޒުގެ މި ސަރުކާރަކީ ރައްޔިތުންގެ ނިކަމެތިކަމުގެ އެޑްވާންޓޭޖް އިންތިހާ އަށް ނަގާ ސަރުކާރެއް ކަމަށް އެމްޑީޕީގެ ކުރީގެ ނައިބު ރައީސް މުހައްމަދު ޝިފާޒު ވިދާޅުވެއްޖެ އެވެ.
ރާއްޖެ ޓީވީގެ ފަލަސުރުޚީ ޕްރޮގްރާމުގައި ވާހަކަ ދައްކަވަމުން ޝިފާޒް ވިދާޅުވީ ބޯހިޔާވަހިކަމުގެ މައްސަލައި ގައި ވެސް އެކަމަށް ހައްލު ހޯދާ ނުދީ މި ސަރުކާރުން ދަނީ އާއްމުން ތަޅުވަމުން ކަމަށެވެ. ބޯހިޔާވަހިކަމުގެ ޝަކުވާ އަކީ ޤައުމުގައި އެންމެ ބޮޑު އެއް ޝަކުވާ ކަމަށް ޝިފާޒް ވަނީ ވިދާޅުވެފަ އެވެ. ވޯޓުގެ ބޭނުމަށް އާއްމުން ތަޅުވަމުންދާ ކަމަށް ވެސް އޭނާ ވަނީ ވިދާޅުވެފަ އެވެ. ކެމްޕެއިންތަކުގެ ބޭނުމަށް ރައްޔިތުންގެ އުދާސްތަކުގެ ވާހަކަ ބޭނުން ކުރާ ކަމަށް ވެސް އޭނާ ވަނީ ވިދާޅުވެފަ އެވެ. މިއީ މީގެ ކުރިން ވެސް ޕީޕީއެމް ޕީއެންސީގެ ވެރިކަމުގައި އަމަލުކުރި ގޮތް ކަމަށް ޝިފާޒް ވިދާޅުވި އެވެ.
"އިންތިޚާބު ނިމޭ ދުވަހަކީ މާދަމާ ކަމަށް ވަންޏާ. މިރޭ އެ ކަރުދާސްކޮޅު އަތަށް ދީފާނެ އޭ. އިންތިޚާބެއްގެ ވޯޓުގެ ބޭނުމަށް ދިވެހިން ތަޅުވަނީ. މިކަހަލަ ޝަކުވާ އެއް ކުރީމަ އެ މީހަކު ލައްވާ ސަރުކާރަށް ސަނާކިޔުއްވަނީ. އެއީ ރައީސް އޮފީހުގެ ޕީއާރް ޓީމަކީ އެކަމަށް ވަރަށް މޮޅު ބައެއް ކަމަށް އެ ބޭފުޅުން ދެކޭ. އަޅުގަނޑު ދަންނަވާނީ ރައީސުލްޖުމްހޫރިއްޔާ ޅޮސް އުނދޯލީގައި ނުބައިންދާށޭ." ޝިފާޒް ވިދާޅުވި އެވެ.
ޝިފާޒް ވިދާޅުވީ ސަރުކާރުން ކަންކަން ކުރާ ގޮތާއި މެދު އާއްމުން ވެސް ވިސްނަން ޖެހޭ ކަމަށެވެ. ޝިފާޒް ވަނީ މި ސަރުކާރަށް ކަންކަން ރަނގަޅަށް މެނޭޖް ނުކުރެވޭ ކަމަށް ވެސް ވިދާޅުވެފަ އެވެ. އާއްމުން ތިބީ މި ސަރުކާރަށް ވޯޓު ދޭ ކަހަލަ ގޮތަކަށް ނޫން ކަމަށާއި މިހާރު ވޯޓެއް ނެގިޔަސް ސަރުކާރު ވާނީ ބަލި ކަމަށް ޝިފާޒް ވިދާޅުވި އެވެ.
