ރާއްޖެ އިހު އޮތް ޑިކްޓޭޓަރޝިޕަށް ދާން ފުރުސަތު ނުދޭނަން، އޭގެ ކުރިން ރައީސް މުއިއްޒު ވެރިކަމުން ބާލާނަން: ޝިފާޒް
9 އޮކްޓޯބަރު 2025 | ބުރާސްފަތި 12:38ސަރުކާރުގެ އެންމެ ބޮޑު އަމާޒަކީ ޤައުމު ކުރީގައި އޮތް ޚުދުމުޚުތާރު ޑިކްޓޭޓަރޝިޕަށް އަނބުރާ ގެންދިއުން
އެމްޑީޕީގެ ކުރީގެ ނައިބު ރައީސް މުހައްމަދު ޝިފާޒު: ވިދާޅުވީ ކުރިން އޮތް ޚުދުމުހުތާރު ޑިކްޓޭޓަރޝިޕަށް ދެން މި ގައުމު ދާން ފުރުސަތު ނުދެއްވާނޭ ކަމަށް
ދިވެހި ރާއްޖެ އިހު އޮތް ޑިކްޓޭޓަރޝިޕް އަށް ދާން ފުރުސަތު ނުދޭނޭ ކަމަށާއި އެ ބަދަލުގެނައުމުގެ ކުރިން ކޮންމެ ގޮތެއް ހަދާފައި ނަމަވެސް ރައީސް ޑރ މުހައްމަދު މުއިއްޒު ރައީސްކަމުގެ މަގާމުން ދުރުކުރާނެ ކަމަށް އެމްޑީޕީގެ ކުރީގެ ނައިބު ރައީސް މުހައްމަދު ޝިފާޒު ވިދާޅުވެއްޖެ އެވެ.
ރާއްޖެ ޓީވީގެ ފަލަސުރުޚީ ޕްރޮގްރާމުގައި ވާހަދައްކަވަމުން ޝިފާޒް ވިދާޅުވީ މި ސަރުކާރުގެ އެންމެ ބޮޑު އަމާޒަކީ މީގެ ކުރިން ގައުމު އޮތް ޚުދުމުހުތާރު ޑިކްޓޭޓާރަޝިޕް އަށް ގައުމު އަނބުރާ ގެން ދިއުން ކަމަށް މިހާރު ބެލެވެން ފަށާފައިވާ ކަމަށެވެ. އެގޮތުން ގައުމުގައި ހުރި ހުރިހާ ބާރުތަކެއް އަމިއްލަ މުށުތެރެއަށް ލައްވައިގެން އެ ކުރައްވަނީ އެ މަސައްކަތް ކަމަށް އޭނާ ވިދާޅުވި އެވެ.
ޝިފާޒް ވިދާޅުވީ ރައީސް މުއިއްޒުގެ ހީލަތްތެރި ރޭވުމުގެ ތެރެއިން ގައުމުގެ އިހު އޮތް ގޮތަށް ބަދަލު ކުރަން މިއަދު ގައުމުގެ އެއްވެސް ރައްޔިތަކުން ނޭދޭ ކަމަށާއި އެގޮތަށް އެކަން ކުރަން ރެޑީ ނޫން ކަމަށެވެ. އަދި އެ ބަދަލު ގެނައުމާއި ދެކޮޅަށް ކުރެވެން އޮތް ހުރިހާ މަސައްކަތެއް ކޮށް، އެކަމާއި ދެކޮޅަށް ތެދުވާނޭ ކަމަށް ޝިފާޒް ވިދާޅުވި އެވެ.
ޝިފާޒް ވިދާޅުވީ ކުރީގައި އޮތް ހާލަތަށް ނުވަތަ ޑިކްޓޭޓަރޝިޕް އަށް މި ގައުމު އަނބުރާ ރުޖޫއަ ކުރަން އުޅުމަކީ ވަރަށް ނުބައި ވިސްނުމެއްގެ ތެރެއިން ކުރާ ކަމެއް ކަމަށެވެ.
ޝިފާޒް ވިދާޅުވީ ހުރިހާ ބާރެއް މުށުތެރެއަށް ލިޔަސް މި ސަރުކާރަށް އެކަން ނުކުރެވޭނޭ ކަމަށާއި އަދި އެކަން ކުރަން ފުރުސަތު ވެސް ރައްޔިތުން ނުދޭނޭ ކަމަށެވެ.
އިހު އޮތް ގޮތަށް ޑިކްޓޭޓަރޝިޕް އަކަށް ގައުމު ބަދަލުކުރަންޏާ އެ ބުނަނީ ތިމަންނަ ނޫން މީހަކު ދެން މި ގައުމުގައި ނުހުންނާނޭ. ތިބޭފުޅުން ދޭހާ ލާރިއެއް އެއީ ތިމަންނަގެ ބޭނުމެއް ދޭ ލާރިއޭ. ތިމަންނާއޭ މިތަނުގައި ކޮންމެ ކަމެއް ކުރަން ޖެހޭނީ. ޚުތުބާ ހަދަން ޖެހޭނީ އެބޭފުޅާ. އިސްލާމީ ކަންތައްތަކާއި ބެހޭ އެންމެ މަތީ މަޖިލީހުގެ ރައީސް ނޫނީ އިސްލާމިކް މިނިސްޓްރީއެއް ބަހައްޓަފާނެ، މިނިސްޓަރަކަށް ވާންޖެހޭނީ އެ ބޭފުޅާ، އަދި ރައީސްގެ މަގާމުގައި ހުންނަވައިގެން. ޓްރެޜަރީގައި ވެސް ފިނޭންސް މިނިސްޓްރީގައި ވެސް ހުންނަންޖެހޭނީ ސްޓޭޓް މިނިސްޓަރެއް، އެ ބޭފުޅާ ވާންޖެހޭނީ މިނިސްޓަރަކަށް. ޑިފެންސް މިނިސްޓަރަކަށް ވެސް ވާން ޖެހޭނީ އެބޭފުޅާ. އެ ޑިކްޓޭޓަރޝިޕަށް ކިޔާނަމެއް އެއީ އެހެން ގޮތަކަށް ބަދަލުކުރުން އެއީ. ޖީލެއް ވަރަށް ބޮޑު ގުރުބާނީއެއް ވެގެން ބަދަލުކުރި މާޒީއެއް އިޔާދަކުރާކަމަށް ވަންޏާމު ރާއްޖެ ޓީވީ މެދުވެރިކޮށް ރައީސް މުއިއްޒަށް ދަންނަވަން. އެމަގަށް އެ ބަދަލު ގެންނާކަށް ރެޑީއެއް ނޫން އަޅުގަނޑުމެން. ހެދު ކޮންމެ އެއްޗެއް ހަދާފައިވެސް އެ ބަދަލާއި ދެކޮޅަށް ތެދުވާނަން. ކުރެވުނު ކޮންމެ ކަމެއް ކޮށްގެން ވެސް ރައީސް މުއިއްޒު މަގާމުން ދުރުކުރާނަން.މުހައްމަދު ޝިފާޒު
ޝިފާޒް ތަކުރާރު ކޮށް ވިދާޅުވީ މި ގައުމުގައި ކުރިން އޮތް ޑިކްޓޭޓަރޝިޕް އަކަށް އަލުން އެނބުރިދާން ދިވެހި ރައްޔިތުން ބޭނުން ނުވާ ކަމަށާއި އެކަން އެގޮތަށް ވިޔަ ނުދެއްވާނޭ ކަމަށެވެ.
