"ރައީސް މުއިއްޒު ރައްޔިތުންގެ ލޮލުގަ އަނދުން އެޅުވުމަށް ނޫން ގޮތަކަށް ކަމެއް ނުކުރައްވާ"
20 ނޮވެމްބަރު 2025 | ބުރާސްފަތި 03:32ލޯކަލް ކައުންސިލް އިންތިހާބު ކާމިޔާބު ކުރުމަށްޓަކާ ދައްކާ ދަޅައެއްގެ ގޮތުން، ރައީސް މުއިއްޒު ވަޑައިގަންނަވާ ކޮންމެ ރަށަކަށް އަރިހުގައި އުވަދޯންޔަކާ ހައިމާކެއް ގެންދަވާ ބިންގާތައް އަޅަމުންދާ ކަމަށް ވިދާޅުވި
ވެރިކަމަށް ދެ އަހަރު ދުވަސް ވީއިރު، ރައީސް މުއިއްޒު ވަނީ އެތައް ބިންގާ އެެއް އަޅުއްވާފަ
ރައީސް ޑރ. މުޙައްމަދު މުޢިއްޒު ވެރިކަމަށް ވަޑައިގެން ރައްޔިތުންގެ ލޮލުގައި އަނދުން އެޅުވުމަށް ނޫންގޮތަކަށް އެއްވެސް ކަމެއް ނުކުރައްވާ ކަމަށް އެމްޑީޕީގެ ކުރީގެ ނައިބު ރައީސް މުޙައްމަދު ޝިފާޒް ވިދާޅުވެއްޖެއެވެ.
ރާއްޖެ ޓީވީގެ ފަލަސުރުޚީ ޕްރޮގްރާމުގައި ވާހަކަދައްކަވަމުން ޝިފާޒް ވިދާޅުވީ، ލޯކަލް ކައުންސިލް އިންތިހާބު ކާމިޔާބު ކުރުމަށްޓަކާ ދައްކާ ދަޅައެއްގެ ގޮތުން، ރައީސް މުއިއްޒު ވަޑައިގަންނަވާ ކޮންމެ ރަށަކަށް އަރިހުގައި އުވަދޯންޔަކާ ހައިމާކެއް ގެންދަވާ، ޖެހުނު ތަނެއްގައި، ގުނާ އަދަދު ނުކުރެވޭހާ ބިންގާތައް އަޅަމުންދާ ކަމަށެވެ. ރައީސް މުއިއްޒު ހަމައެކަނި ބިންގާއެއް އެޅުމަށްޓަކާ މި ހުރިހާ ހަރަދެއް ކުރައްވާއިރު ބޮޑެތި ބޭފުޅުން އަތް ޖައްސަވަން ތިއްބަވާކަމަށް ވެސް ޝިފާޒް ފާހަގަކުރެއްވި އެވެ.
އެމްޑީޕީ ގެ ކުރީގެ ނައިބް ރައީސް މުޙައްމަދު ޝިފާޒް ރާއްޖެ ޓީވީގެ ފަލަ ސުރުހީ ޕްރޮގްރާމްގައި ވާހަކަ ދައްކަވަނީ
ނަމަވެސް މިއީ ހަމައެކަނި ދައްކާލަން ކުރާ ކަމަކަށް ވުމުން މިހެން މަސައްކަތް ފަށާ ތަންތަނުގެ ބިންގާ އެޅުން ފިޔަވާ އިތުރު މަސައްކަތެއް ނުހިނގާނެ ކަމަށް ޝިފާޒް ވިދާޅުވި އެވެ. ޝިފާޒް ވިދާޅުވި ގޮތުގައި، ބައެއް ބޭފުޅުންނަށް ރައީސް މުއިއްޒަކީ ޖޯކަރެއްގެ ގޮތުގައި ސިފަކުރެވުނަސް، ހަގީގަތަކީ ރައީސް މުއިއްޒު ރައްޔިތުންގެ ލޮލުގައި އަނދުން އެޅުވުން ނޫންގޮތަކަށް އެއްވެސް ކަމެއް ނުކުރައްވަނީ ތަންދޮރު ނޭނގިގެން ނޫން ކަމަށާއި، އެއީ ހުންނަ ނުލަފާކަމާއި ޖާހިލުކަން ކަމުގަ އެވެ.
ރައްޔިތުންގެ މަޖިލީހުގެ މެމްބަރުންނަށް މިއަދު އޮތް ހަމައެކަނި ގޮތަކީ ރައީސް މުއިއްޒުއަށް އަޅުދާސްތު ދެންނެވުން ކަމަށް އިޝާރާތް ކުރައްވާ ޝިފާޒް ވިދާޅުވީ، ސަރުކާރުގެ ފަރާތުން ބަޖެޓް ހުށަހަޅާފައިވާ ގޮތުން އެއްވެސް ދާއިރާއެއްގެ މަސައްކަތެއް ކުރިޔަށްދާނީ މަޖިލީހުގެ މެމްބަރުން ރައީސް މުއިއްޒުއަށް ތައުރީފު ކޮށް ސަނާ ކިޔާ މިންވަރަށް ރިއާޔަތް ކުރައްވާ ރައީސް މުއިއްޒުގެ ހެޔޮފުޅުކަމުން ކަމަށެވެ.
އުވަދޯންޔެއް ހުރިހާ ރަށަކަށް ދުއްވައިފި، ފޯކު ލިފްޓަކާ ހައިމާކަކާ ބާޖަކަށް އަރުވައިގެން. ބޮޑެތި ބޮޑެތި ބޭފުޅުންތިބޭ ހަމަ ރީއްޗަށް އަތްތިލަބަޑި ޖަހަން ތަނެއްގެ ބިންގާ އަޅާލާކަމަށްޓަކާ. އެހުރިހާ ހަރަދެއް އެކުރީ ހަމަ އެކަނި ބިންގާ އަޅަން. އެޔަށްފަހު އެއްވެސް މަަސައްކަތެއް ނުކުރާނެ. ލޯކަލް ކައުންސިލް އިންތިހާބު ކާމިޔާބު ކުރުމަށްޓަކާ ދައްކާލުމަކަށް ކުރާ ކަމެއް އެއީ. ޖޯކަރެއްގެ ގޮތުގައި ރައީސް މުއިއްޒު ފެނުނު ކަމުގައި ވިޔަސް، ހަގީގަތަކީ ނުލަފާ ކަމާއި ޖާހިލުކަން. ހަމަ ޖާހިލުކަން. ތަންދޮރު ނޭނގިގެނެއް ނޫން. ހަމަ ރާއްޖޭގެ ރައްޔިތުންގެ ލޮލުގަ އަނދުން އެޅުވުމަށް ނޫންގޮތަކަށް ކަމެއް ނުކުރައްވާ. ރައްޔިތުންގެ މަޖިލީގެ މެމްބަރުން އެތިބީ އަޅުދާސްތު ކުރަން ޖައްސާފަ. ބަޖެޓުގައެއް ނޯންނާނެ އެއިން މެމްބަރެއްގެ ދާއިރާ އަށް އޮތް އަދަދެއް ފެންނާކަށް. މެމްބަރުން ރައީސް މުއިއްޒު އަަށް ތައުރީފުކޮށް ސަނާ ކިޔާވަރަކަށް ރިއާޔަތް ކުރައްވާ ރައީސް މުއިއްޒުގެ ހެޔޮފުޅުކަމުން ނޫނީ އެއްވެސް ރަށެއްގައި ކަމެއް ނުކުރެވޭ ގޮތަށް ބަޖެޓް މި އޮތީ.އެމްޑީޕީގެ ކުރީގެ ނައިބު ރައީސް މުހައްމަދު ޝިފާޒް
މި ސަރުކާރަށް ދެ އަހަރު ވީއިރު ސަރުކާރުގެ ކަންކަން ހުރި ގޮތުގެ ވާހަކަ ދައްކަވަމުން ޝިފާޒް ވިދާޅުވީ، ދާދިފަހުން ރެކޯޑެއް ހައްދަވަން ވެގެން ބިޑަކާ ނުލާ 200 އަށް ވުރެ ގިނަ ޕްރޮޖެކްޓް ބަހާލި ގޮތައް ކުރިޔަށް އޮތް ތަނުގައިވެސް އިތުރު ޕްރޮޖެކްޓްތައް ބިޑަކާ ނުލާ ރައީސް މުއިއްޒު ބޭނުން ބަޔަކަށް ދެއްވާނެ ކަމަށެވެ.
ޝިފާޒް ވިދާޅުވީ، ދެން ފެނުނީ ރާއްޖޭގައި އެންމެ ރަނގަޅަށް ހިނގަހިނގާ ހުރި ދެ ކުންފުނިކަމަށްވާ ބީއެމްއެލް އަދި އެމްއޭސީއެލް ލައްވާ ބޮޑު ހިލަޖެހުމާ، ބަނދަރު ހަދާ ނެރުބައްތި ޖެހުމުގެ މަސައްކަތް ކުރުވާތަން ކަމަށެވެ. ގައުމީ ބޭންކު މެދުވެރިކޮށް އެތައް ބިލިއަން ރުފިޔާގެ މަޝްރޫއު ހިންގަން ރައީސް މުއިއްޒު ނިންމަވާފަވާއިރު، މީގެ ކުރިން ރައީސް މުއިއްޒު ވަނީ ބޭންކް އޮފް މޯލްޑިވްސް ބޮލުގަ މާލީ ބަޣާވާތެއް ގެންނަން އުޅުނުކަމުގެ ތުހުމަތު އަޅުވާފަ އެވެ. ނަމަވެސް މި ބަޣާވާތް ތަހުގީގު ކުރަމުންދާ ކަމަށް ސަރުކާރުން ހާމަކުރިފަހުން މިހާރު އަހަރަކަށް ވުރެ ގިނަ ދުވަސް ވީއިރުވެސް މިކަމާގުޅިގެން އެޅުނު އެއްވެސް ފިޔަވަޅެއް ސަރުކާރުން ހިއްސާކޮށްފަ ނުވާކަން ޝިފާޒް ފާހަގަކުރެއްވި އެވެ.
މި ސަރުކާރަށް ދެ އަހަރު ވެގެން ފަޓާސް އަރުވަމުން މަޑު ހިނގުމެއްގައި ދެފަރާތައް ހިންގަވަމުން ރައީސް މުއިއްޒު ވާހަކަ ދެއްކެވިޔަސް، މިރާއްޖެއަށް ވަމުންދާ ގޮތާއި ރާއްޖޭގެ ބަޖެޓަށް ވީގޮތްވެސް ދިވެހިރައްޔިތުންނަށް އެނގޭ ކަމަށް ޝިފާޒް ވިދާޅުވި އެވެ.
