ޕެންޝަން ބޯޑުގެ މެމްބަރުންނަށް ބިރު ދައްކައިގެން ފައިސާ ޗާޕްކުރަނީ މުސާރަ ދޭން ވެސް ފައިސާ ނެތިގެން: ޔާމީން

ސަރުކާރުން ޕެންޝަން ފަންޑުގެ ބޯޑުގެ މެމްބަރުންނަށް ބިރު ދައްކައިގެން ފައިސާ ޗާޕްކުރަން އުޅެނީ މުސާރަ ދޭނެ އިތުރު އެއްވެސް ގޮތެއް ނެތިގެން ކަމަށް ކުރީގެ ރައީސް އަބްދުﷲ ޔާމީން އަބްދުލްގައްޔޫމް ވިދާޅުވެއްޖެއެވެ.

ބުރާސްފަތި ދުވަހުގެ ރޭ ޕީއެންއެފް އިން ބޭއްވި ޖަލްސާގައި ވާހަކަދައްކަވަމުން ޔާމީން ވިދާޅުވީ ކޮންޓްރެކްޓަރުންނަށް ދައްކަން ޖެހޭ ފައިސާ ހުރި ކަމަށް ބުނެ 2.5 ބިލިއަން ޗާޕެއް ނުކުރާނެ ކަމަށެވެ. ސަބަބަކީ އެއިން ވާނެ އެއްކަމެއް ވެސް ނެތުން ކަމަށް ޔާމީން ވިދާޅުވިއެވެ. ޔާމީން ވިދާޅުވީ އެ "ހުވަނދަކަށް ވެސް" ނުވާނެ ކަމަށެވެ.

ޕެންޝަން އޮފީސް މެދުވެރިކޮށް ސަރުކާރުން އެމްއެމްއޭ ލައްވާ ޗާޕު ކުރާ 2.5 ބިލިއަން ރުފިޔާގެ ވާހަކަދައްކަވަމުން ޔާމީން އިތުރަށް ވިދާޅުވީ އެކަން އެ ކުރަނީ މިވަގުތަށް އެ ނޫން އިތުރު އެއްވެސް ގޮތެއް ނެތިގެން، މުޅިން ގޮތް ހުސްވެގެން ކަމަށެވެ.

އެއީކީ ނޫން މަގުސަދަކީ. އެކަމެއް ނުވެސް ކުރާނެ. މިއީ ހަމަ ދެންމެ ތި ވާހަކައިގަ ފެށްޓެވި ގޮތަށް، މުސާރަ ދޭނެ ލާރި ވެސް ނެތީ. ކުރެވޭނެ އެއްވެސް ކަމެއް ނެތީމަ ހަމަ އެކަމަށް، ހަމަ އެކަމަށް މިވަގުތުން މިވަގުތަށް އޮތް ހައްލަކީ މިއީ ކަމަށް ވާތީ މިކަން މި ކޮށްލަނީ

ކުރީގެ ރައީސް އަބްދުﷲ ޔާމީން އަބްދުލްގައްޔޫމް

ފައިސާ ޗާޕުނުކޮށް އިގްތިސާދު ހިފެހެއްޓުމަކީ ރައީސް ޑރ.މުހައްމަދު މުއިއްޒުގެ ރިޔާސީ ވައުދުފުޅެކެވެ. ނަމަވެސް ރައްޔިތުންނަށް އޮޅުވާލައި، މިސަރުކާރުން މަސައްކަތް ކުރަމުންދަނީ ޕެންޝަން އޮފީސް މެދުވެރިކޮށް ފައިސާ ޗާޕު ކުރުމަށް މަސައްކަތް ކުރަމުންނެވެ.

ފައިސާ ޗާޕު ކުރުމަށް މަސައްކަތް ކުރަނީ އެމްއެމްއޭ އިން ޕެންޝަން އޮފީހަށް ފައިސާ ދިނުމުން، އެ އޮފީހުން ފައިނޭންސް މިނިސްޓްރީގެ ބޮންޑަކަށް އިންވެސްޓު ކޮށްގެން ނެވެ.

އެކަމާ ގުޅިގެން ކުރީގެ ފިނޭންސް މިނިސްޓަރު އިބްރާހިމް އަމީރު ވިދާޅުވީ ޕެންޝަން އޮފީސް މެދުވެރިކޮށް ސަރުކާރުން އެމްއެމްއޭ ލައްވާ ޗާޕު ކުރާ 2.5 ބިލިއަން ރުފިޔާއަކީ ދައުލަތުގެ ޚަރަދަށް ޒިންމާވުމުގެ ގާނޫނާ ޚިލާފަށް ކުރާ ކަމެއް ކަމަށެވެ. އަދި ރައީސް ޑރ. މުހައްމަދު މުއިއްޒު އިންތިޚާބުތެރޭގައި އަދި މިހާރު ވެސް ތަކުރާރުކޮށް ދައްކަމުން އަންނަ އެންމެ ބޮޑު ވާހަކަ އަކީ މިސަރުކާރުން ފައިސާ ޗާޕް ނުކުރާނެ ވާހަކަ ކަމަށެވެ.

އަމީރު ވިދާޅުވީ ފައިސާ ޗާޕް ނުކޮށް 2.5 ބިލިއަން ރުފިޔާ ސަރުކާރުގެ ޓީ-ބިލްސް ޕެންޝަން އޮފީސް މެދުވެރިކޮށް، އެމްއެމްއޭ އިން ގަންނާނެ ގޮތެއް ނޯންނާނެ ކަމަށެވެ. އެވަރުގެ ކެޕޭސިޓީ އެއް އެމްއެމްއޭ ގެ ޖެނެރަލް ރިޒާވްގަ ނުހުންނާނެ ކަމަށާއި، ޖެނެރަލް ރިޒާވްގައި ހުރީ ގާތްގަނޑަކަށް 1.4 ބިލިއަން ރުފިޔާ ކަމަށެވެ. އަދި މިއީ އެމްއެމްއޭ ކުރު މުއްދަތުގެ ލައިބިލިޓީސް ކަވަރު ކުރަންވެސް ހުންނާނެ ފައިސާ ކަމަށް އަމީރު ފާހަގަކުރެއްވިއެވެ.