ކެނެޑާގެ ބޮޑުވަޒީރު ކޮވިޑަށް ޕޮޒިޓިވްވެވަޑައިގެންފި

ކެނެޑާގެ ބޮޑުވަޒީރު ޖަސްޓިން ޓްރޫޑޯ ކޮވިޑް-19ށް ޕޮޒިޓިވްވެވަޑައިގެންފިއެވެ.

ކޮވިޑަށް ޕޮޒިޓިވްވެވަޑައިގަތްކަން އާންމު ކުރައްވައި ނެރުއްވި ބަޔާނުގައި އެމަނިކުފާނު ވިދާޅުވީ، ހޯމަ ދުވަހު ކޮވިޑަށް ހެއްދެވި ޓެސްޓު ޕޮޒިޓިވްވެފައިވާ ކަމަށެވެ. އަދި ކޮވިޑަށް ޕޮޒިޓިވްވެފައިވުމުން ހެލްތު ގައިޑްލައިންސްއާ އެއްގޮތްވާގޮތުގެ މަތީން ކަރަންޓީނުގައި ހުންނަވައި މަސައްކަތްތައް ކުރިޔަށް ގެންދަވާނެ ކަމަށް ވަނީ ވިދާޅުވެފައެވެ.

ޓްރޫޑޯ ވަނީ މިދިޔަ ހަފުތާގައި އެމަނިކުފާނުގެ ދަރިކަލުން ކޮވިޑަށް ޕޮޒިޓިވްވުމުން އައިސޮލޭޓް ވެފައެވެ. އެހެންނަމަވެސް އޭރު ހެއްދެވި ރެޕިޑް ޓެސްޓުން އެމަނިކުފާނު ވަނީ ނެގަޓިވްވެފައެވެ.

އުމުރުން 50 އަހަރުގެ ޓްރޫޑޯ ވަނީ 2020 ވަނަ އަހަރުގެ މާޗު މަހުވެސް އެމަނިކުފާނުގެ އަނބިކަނބަލުން ކޮވިޑަށް ޕޮޒިޓިވްވެވަޑައިގަތުމުން އައިސޮލޭޓްވެފައެވެ. އެހެންނަމަވެސް އެ ފަހަރު އެމަނިކުފާނު ކޮވިޑަށް ޕޮޒިޓިވްވެވަޑައިގެންފައެއް ނުވެއެވެ.

މިދިޔަ މަސްތަކުގެ ތެރޭގައި ކެނެޑާގެ ކެބިނެޓްގެ ގިނަ ވަޒީރުންތަކެއް ވަނީ ކޮވިޑަށް ޕޮޒިޓިވްވެފައެވެ. އޭގެ ތެރޭގައި ޚާރިޖީ ވަޒީރު ވެސް ހިމެނިވަޑައިގަންނަވައެވެ.