ކެނެޑާ އާއެކު ވިޔަފާރީގެ މަޝްވަރާތައް ހުއްޓާލައިފި ކަމަށް ޓްރަމްޕް ވިދާޅުވެއްޖެ 

އެމެރިކާ އިން ކެނެޑާ އާއެކު ކުރިއަށް ގެންދަމުން އަންނަ ވިޔަފާރީގެ މަޝްވަރާތައް ހުއްޓާލަން ނިންމާފައިވާ ކަމަށް، އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ޓްރަމްޕް މިހެން ވިދާޅުވީ، އޭނާގެ ޓްރުތު ސޯޝަލް މީޑިއާގައި ކުރެއްވި ޕޯސްޓެއްގަ އެވެ. ޓްރަމްޕް ވިދާޅުވީ މަޝްވަރާތައް ހުއްޓާލަން ޖެހުނީ ކެނެޑާ އިން ތައާރަފު ކޮށްފައިވާ ޑިޖިޓަލް ޚިދުމަތްތަކުގެ ޓެކްސްއ ގުޅިގެން ކަމަށެވެ. ޓްރަމްޕް ވިދާޅުވެފައި ވަނީ ކެނެޑޭގެ އެ ނުރަނގަޅު ޓެކްސްގެ ސަބަބުން، ވިޔަފާރީގެ ހުރިހާ މަޝްވަރާތަކެެއް ވަގުތުން ހުއްޓާލުމަށް ނިންމާފައިވާ ކަމަށެވެ.

އެ ޕޯސްޓުގައި ޓްރަމްޕް ވިދާޅުވީ ކެނެޑާ އިން އަންނަނީ އެމެރިކާގެ ދަނޑުވެރިންގެ އަތުން، ޑެއިރީގެ ބާވަތްތަކުން 400 އިންސައްތައާ ހަމައަށް ޓެރިފް ނަގަމުން އަންނަތާ ވެސް އަހަރުތަކެއް ވެއްޖެ ކަަަމަށެވެ. އަނެއްކާ މިހާރު، އެމެރިކާގެ ޓެކްނޮލޮޖީ ކުންފުނިތަކުގެ އަތުން ޑިޖިޓަލް ސާވިސް ޓެކްސް ނަގާނެ ކަމަށް ކެނެޑާ އިން އިއުލާން ކޮށްފައިވާއިރު، އެއީ އެމެރިކާ އަށް ސީދާ ހަމަލާ ދިނުން ރަމްޒުވާ ކަމެއް ކަމަށް ވެސް ޓްރަމްޕް ވިދާޅުވި އެވެ. 

އެހެންކަމުން ކެނެޑާ އާއެކު އެމެރިކާ އިން ކުރިއަށް ގެންދަމުން އަންނަ ވިޔަފާރީގެ ހުރިހާ މަޝްވަރާތަކެއް މިހާރުން މިހާރަށް ނިމުމަކަށް ގެނައުމަށް ރަސްމީކޮށް ނިންމީ ކަމަށާއި، އެމެރިކާ އާއެކު ވިޔަފާރި ކުރުމަށް ކެނެޑާ އިން ނަގާނެ ޓެރިފްތަކުގެ މައުލޫމާތު ކުރިއަށް އޮތް ހަތް ދުވަހުގެ ތެރޭގައި އަންގަވާނެ ކަމަށް ވެސް ޓްރަމްޕް ވިދާޅުވި އެވެ. 

ޓްރަމްޕްގެ މި ނިންމުމަކީ ދެ ޤައުމުގެ ދެ މެދުގައި އޮތް ވިޔަފާރީގެ ގުޅުމަށް އަސަރު ކުރާނެ ކަމެެއް ކަމަށް ތަޖުރިބާ ކާރުން ވަނީ އަންދާޒާ ކޮށްފަ އެވެ. ކެނެޑާ އަކީ އެމެރިކާގެ އެންމެ ބޮޑު ވިޔަފާރީގެ އެއް ބައިވެރިޔާ ކަމަށް ވުމާ އެކު، މި ނިންމުމުގެ ސަބަބުން ދެ ޤައުމުގެ އިޤްތިސާދަށް އަސަރު ކުރާނެ ކަމަށް ވެސް މާހިރުން އަންނަނީ ފާހަގަ ކުރަމުންނެވެ. އަދި އެކަމުގެ ކަންބޮޑުވުން ވެސް އަންނަނީ ފާޅު ކުރަމުންނެވެ.