ކާނީގެ ކާމިޔާބަށް، އެމެރިކާ އިން މަރުޙަބާ ކިޔައިފި
މަރުޙަބާގައި، އެމެރިކާގެ 51 ވަނަ ސްޓޭޓަށް ކެނެޑާ ހެދުމާ ގުޅޭ ގޮތުން ޓްރަމްޕް ދައްކަވާފައިވާ ވާހަކަ ގެނެސްފައި ނުވެއެވެ.
ކެނެޑާގެ ބޮޑު ވަޒީރު މާކް ކާނީ
ކެނެޑާގައި ކުރިއަށް ގެންދިޔަ އާންމު އިންތިޚާބުގައި ބޮޑު ވަޒީރު މާކް ކާނީގެ ލިބަރަލް ޕާޓީ އިން ހޯދި ކާމިޔާބަށް، އެމެރިކާ އިން މަރުޙަބާ ކިޔައިފި އެވެ.
އެމެރިކާގެ ރައީސް ޑޮނަލްޑް ޓްރަމްޕްގެ އިންޒާރުތަކާ ދެކޮޅަށް ކުރިއަށް ގެންދިޔަ ކެމްޕެއިނަށް ފަހު، ލިބަރަލް ޕާާޓީ އިން ހޯދި ކާމިޔާބަށް އެމެރިކާ އިން ވަނީ މަރުޙަބާ ކިޔައިފަ އެވެ.
އެމެރިކާގެ ސްޓޭޓް ޑިޕާޓްމަންޓުން ކާނީ އަދި ލިބަރަލް ޕާޓީ އަށް މަރުޙަބާ ކިޔާފައި ވަނީ ޑިޕްލޮމެޓިކް އުސޫލުތަކުންނެވެ. އަދި އެ މަރުޙަބާގައި، އެމެރިކާގެ 51 ވަނަ ސްޓޭޓަށް ކެނެޑާ ހެދުމާ ގުޅޭ ގޮތުން ޓްރަމްޕް ދައްކަވާފައިވާ ވާހަކަ ގެނެސްފައި ނުވެ އެވެ.
ސްޓޭޓް ޑިޕާޓްމަންޓުގެ ތަރުޖަމާނު ޓެމީ ބްރޫސް ވިދާޅުވެފައިވާ ގޮތުގައި، ބޮޑު ވަޒީރު ކާނީ އަދި އޭނާގެ ލިބަރަލް ޕާޓީ އިން ހޯދާފައިވާ ކާމިޔާބަށް އެމެެރިކާ އިން މަރުހަބާ ކިޔާ ކަމަށެވެ. އަދި އެެމެރިކާ އާއި ކެނެޑާގެ ގުޅުމަކީ ދުނިޔޭގެ އެންމެ ފުޅާ ގުޅުންތަކުގެ ތެރޭގައި ހިމެނޭ ގުޅުމެއް ކަމަށް ވެސް އޭނާ ވިދާޅުވި އެވެ.
މީގެ އިތުރުން އެމެރިކާ އިން އޮތީ ބޮޑު ވަޒީރު ކާާނީގެ ސަރުކާރާ އެކު ފުރިހަމަ އަށް މަސައްކަތް ކުރުމުގެ އުންމީދުގައި ކަމަށް ވެސް އޭނާ ވަނީ ވިދާޅުވެފަ އެވެ.
ވިޔަފާރީގެ އިންސާފުވެރިކަމާއި، ޣައިރު ޤާނޫނީ އިމިގްރޭޝަން ހުއްޓުވުމާއި، އެހެނިހެން ނުރައްކާތެރި މަސްތުވާތަކެތި ފެތުރުން ހުއްޓުވުން، އަދި މި ސަރަހައްދުގައި ޗައިނާގެ ކޮމިއުނިސްޓް ޕާޓީގެ ނުފޫޒު ކުޑަކުރުން ފަދަ މުހިންމު މައްސަލަތަކުގައި ކާނީގެ ސަރުކާރާއެކު މަސައްކަތް ކުރުމަށް އެމެރިކާ އިން އުންމީދު ކުރާ ކަމަށް ބްރޫސް ވިދާޅުވި އެވެ.
