މީޑިއާގެ މިނިވަންކަމުގެ މުހިންމުކަމާއި ކޮމަންވެލްތު ޗާޓަރުގައި ހިމެނޭ އަސާސްތައް ދެމެހެއްޓުމަށް ކެނެޑާއިން ރާއްޖެއަށް ގޮވާލައިފި
ޚިޔާލު ފާޅުކުރުމުގެ މިނިވަންކަމަކީ އިންސާނީ ޒާތުގެ މައިގަނޑު ބައެއްކަމަށް ކެނެޑާއިން ދެކޭ
މީޑިއާ ބިލާ ދެކޮޅަށް ނޫސްވެރިން ބޭއްވި މުޒާހަރާގައި ފުލުހުން ނޫސްވެރިންނަށް އަނިޔާކުރަނީ
ރާއްޖޭގެ މީޑިއާ އަދި ބްރޯޑްކާސްޓިންގ ބިލު ފާސްކުރުމާ ގުޅިގެން، މީޑިއާގެ މިނިވަންކަމުގެ މުހިންމުކަމާއި ކޮމަންވެލްތު ޗާޓަރުގައި ހިމެނޭ އަސާސްތައް ދެމެހެއްޓުމަށް ކެނެޑާއިން ރާއްޖެއަށް ގޮވާލައިފިއެވެ.
ސްރީލަންކާގައި ހުންނަ ލަންކާ އަދި ރާއްޖޭގެ ކަންކަން ބަލަހައްޓާ ހައިކޮމިޝަނުން ބުނީ މޯލްޑިވްސް މީޑިއާ އެންޑް ބްރޯޑްކާސްޓިން ބިލް ތަސްދީގުކުރުމުން، މީޑިއާގެ މިނިވަންކަމުގެ މުހިންމުކަމާއި ކޮމަންވެލްތު ޗާޓަރުގެ ހިއްސާކުރެވޭ އަގުތައް ހިފެހެއްޓުމަށް ހަނދާންކޮށްދޭ ކަމަށެވެ.
ޚިޔާލު ފާޅުކުރުމުގެ މިނިވަންކަމަކީ އިންސާނީ ޒާތުގެ މައިގަނޑު ބައެއްކަމަށާއި، ރައްކާތެރި އަދި ފުދުންތެރި މުޖުތަމައެއް ބިނާކުރުމުގެ އެންމެ މުހިންމު އަސާސްތަކުގެ ތެރެއިން އެއް އަސާސްކަމުގައި ކެނެޑާއިން ދެކޭ ކަމަށް ބުނެފައިވެއެވެ. އަދި އެއްވެސް ފަރާތެއްގެ ނުފޫޒަކާ ނުލައި ޚިޔާލު ގެންގުޅުމުގެ ޙައްޤާއި، ޚިޔާލު ފާޅުކުރުމުގެ މިނިވަންކަމުގެ ޙައްޤަކީ އދ.ގެ އިންސާނީ ޙައްޤުތަކުގެ ޢާންމު ޤަރާރުގެ 19 ވަނަ މާއްދާގައި ކަށަވަރުކޮށްދީފައިވާ ޙައްޤެއް ކަމަށް ފާހަގަކޮށްފައިވެއެވެ. އަދި މަދަނީ އަދި ސިޔާސީ ޙައްޤުތަކާބެހޭ ބައިނަލްއަޤްވާމީ މުއާހަދާގެ 19 ވަނަ މާއްދާގައިވެސް މި ޙައްޤު އަލުން ތަކުރާރުކޮށްފައިވާކަން ކެނެޑާއިން ވަނި ބުނެފައެވެ.
މީގެ ތެރޭގައި އަނގަބަހުން، ލިޔުމުން، ޗާޕުކޮށްގެން ނުވަތަ އެހެން ޒަރީއާއަކުން ނަމަވެސް މަޢުލޫމާތާއި ޚިޔާލު ހޯދައި، ލިބިގަނެ އަދި ފޯރުކޮށްދިނުމުގެ މިނިވަންކަން ހިމެނެއެވެ. މި ޙައްޤުތަކަށް ހަނިކުރުމެއް ގެނެވޭނީ ހަމައެކަނި ބައިނަލްއަޤްވާމީ އިންސާނީ ޙައްޤުތަކުގެ ޤާނޫނާ އެއްގޮތްވާ ގޮތުގެ މަތިންނެވެ. މީޑިއާގެ މިނިވަންކަމަކީ ޑިމޮކްރެޓިކް މުޖުތަމަޢުތަކުގެ މުހިންމު ބައެއްކަމަށާއި، އިންސާނީ ޙައްޤުތަކާއި އަސާސީ މިނިވަންކަން ރައްކާތެރިކުރުމަށް ކޮންމެހެން ބޭނުންތެރި ކަމެއްކަމަށް ކެނެޑާއިން ގަބޫލުކުރެއެވެ. ސަރުކާރުތައް ޖަވާބުދާރީކުރުވުމަށްޓަކައި، ރައްޔިތުންނަށް ސައްޙަ މަޢުލޫމާތާއި ފުރިހަމަ ތަޙްލީލުތައް ފޯރުކޮށްދިނުމަށް މިނިވަން މީޑިއާއެއްގެ ބޭނުން ކޮންމެހެން ޖެހޭ ކަމަށް ބުނެފައިވެއެވެ.
ކެނެޑާއިން މިފަދައިން ބުނެފައިވަނީ ރައީސް ޑރ. މުހައްމަދު މުއިއްޒު، މީޑިއާ ބިލު ތަސްދީގުކޮށް، ރާއްޖޭގެ މިނިވަން މީޑިއާއާއި ރައްޔިތުންނަށް މިނިވަން ކަމާއެކު ބަސް ބުމުގެ ހައްގު ކަފުންކޮށް ވަޅުލާފައިވަނިކޮށެވެ.
މި ގާނޫނުގެ ދަށުން ސަރުކާރުން ބޭނުންވެއްޖެނަމަ މި ގާނޫނުގެ ދަށުން އުފައްދާ ކޮމިޝަން މެދުވެރިކޮށް ނޫސްތައް ބަންދުކުރުމާއި، ލައިސަންސް ހިފެހެއްޓުމާއި، ނޫސްވެރިންނަށް ދައުވާ ކުރުމާއި ބްރޯޑްކާސްޓިންގ ހުއްޓުވުމުގެ ބާރު ލިބިފައިވެއެވެ.
މި ޤާނޫނުގެ މަޤްޞަދަކީ، ދިވެހިރާއްޖޭގެ ނޫސްވެރިކަމުގެ މިނިވަންކަން ކުރިއަރުވައި ތަރައްޤީކޮށް، ދިވެހިރާއްޖޭގައި ނޫސްވެރިކަމުގެ މިނިވަންކަން ދެމެހެއްޓުމާއެކު، ދޮގު ޚަބަރު ފެތުރުން ހުއްޓުވުމާއި ނޫސްވެރިންނަށް ދިވެހިރާއްޖޭގެ ޖުމްހޫރިއްޔާގެ ޤާނޫނުއަސާސީން ލިބިދޭ ޙައްޤުތައް ޒިންމާދާރުކަމާއެކު ބޭނުންކުރާކަން ކަށަވަރުކުރުމުގެ ގޮތުން މީޑިއާތަކުގައި މަސައްކަތްކުރާ ނޫސްވެރިންނާއި އެހެނިހެން ފަރާތްތަކުން ޢަމަލުކުރާނެ ހަމަތަކާއި އުސޫލުތައް ކަނޑައަޅައި، އެ އުސޫލުތައް ހިންގުމަށާއި ޒަމާނާ އެއްގޮތަށް ނޫސްވެރިކަމުގެ މިނިވަންކަން ކުރިއެރުވުމުގެ ގޮތުން ނޫސް މަޖައްލާ ރަޖިސްޓްރީކުރުމަށް ލުއިފަސޭހަ އަދި ހަރުދަނާ މިންގަނޑުތަކެއް ތަޢާރަފުކުރުމާއި، ބްރޯޑްކާސްޓިންގ މީޑިއާ ވެސް ހިމެނޭގޮތުން މީޑިއާގެ ކަންކަން ރެގިއުލޭޓްކުރާނެ ވަކި މުއައްސަސާއެއް އުފެއްދުން ކަމަށް ސަރުކާރުން ބުނި ނަމަވެސް މި ގާނޫނާއެކު ސަރުކާރުން ކުރާ ވައްކަމުގެ ވާހަކަ ދެއްކުން މަނާވެ، ސަރުކާރުގެ ތެރޭގައި ކޮރަޕްޝަނާއި ފަސާދަ އޮތް މިންވަރުގެ ވާހަކަ އާންމުންނަށް ދެން ނުދެއްކޭނެއެވެ. އަދި އެ ވާހަކަތަކަކީ ސަރުކާރުން ދޮގެއްކަމަށް ބުނެފި ނަމަ އެވާހަކަ ދެއްކި މީހަކާއި ނޫހަކަށް ވެސް ފިޔަވަޅު އެޅެއެވެ.
މީގެ އިތުރުން މި ގާނޫނުގެ ދަށުން ނޫސް މަޖައްލާ، ޓީވީ ރޭޑިއޯ އަދި އޮންލައިންތައް ރެގިއުލޭޓް ކުރެވޭ އިރު ސޯޝަލް މީޑިއާ (ޓިކްޓޮކް، އެކްސް، ފޭސްބުކް، އިންސްޓަގްރާމް) ތައް ވެސް ރެގިއުލޭޓް ކުރެވެއެވެ. އަދި ވަކި މީޑިއާތައް ޖޫރިމަނާކުރެވޭ މާއްދާ އޮތްގޮތަށް ގާނޫނުގައި އޮތް އިރު، ތެދު ހަބަރަކީ ކޮބައިކަން ކަނޑައެޅުމުގެ ބާރު ވެސް ލިބެނީ ބިލުގެ ދަށުން އުފައްދާ ކޮމިޝަނަށެވެ.
