ބޭސްފަރުވާގެ ކަންކަމުގައި ގޮންޖެހުންތަކެއް ހުރުމުން، ކެނެބިސް ޓްރެފިކް ކުރުމުގެ ދައުވާ އުފުލާފައިވާ މީހަކު ބަންދުން ދޫކޮށްލައިފި

ބޭސްފަރުވާގެ ކަންކަމުގައި ގޮންޖެހުންތަކެއް ހުރުމުން، ކެނެބިސް ޓްރެފިކް ކުރުމުގެ ދައުވާ އުފުލާފައިވާ މީހަކު ބަންދުން ދޫކޮށްލުމަށް ކްރިމިނަލް ކޯޓުން ނިންމައިފިއެވެ.

މި މައްސަލަ ކްރިމިނަލް ކޯޓުގައި ކުރިއަށް ގެންދަވަނީ ގާޒީ މުޙައްމަދު މިސްބާޙެވެ. މި މައްސަލައިގައި ކެނެބިސް ޓްރެފިކް ކުރުމުގެ ދައުވާ އުފުލާފައިވަނީ 4 މީހެއްގެ މައްޗަށެވެ. އެއީ ގއ.ވިލިނގިލި ޒޫމް، މުޙައްމަދު ތަޤިއްޔު، ކ.މާފުށީ ވާރޭވިލާ އަހުމަދު އަހުނަފް އަސްފާޤް، ގދ.ވާދޫ ޗިޗަންޑާގޭ ވިޝާމް މުޙައްމަދުގެ އިތުރުން ގއ.ވިލިނގިލީ ނައިންފްލާވަރ އީމާން މުޙައްމަދެވެ.

މި މައްސަލައިގައި ދައުވާ ލިބުނު އިތުރު ފަރާތެއްކަމަށްވާ އަމްޖަދު އަބްދުއްސައްތާރު ދައުވާއަށް އިއުތިރާފުވެ، އެތަކެއްޗަކީ އޭނާގެ ތަކެތިކަމަށް ވަނީ ބުނެފައެވެ. އެއާއެކު އޭނާގެ މައްޗަށް އަވަސްނިޔާގެ ޝަރީއަތް ހިންގައި، އޭނާ އުމުރަށް ޖަލަށް ލުމާއެކު، އެއްލައްކަ ރުފިޔާއިން ޖޫރިމަނާ ކުރުމަށް ކްރިމިނަލް ކޯޓުން 2020 ވަނަ އަހަރު ވަނީ ޙުކުމް ކޮށްފައެވެ. އެއަށް ފަހު، 19 ސެޕްޓެމްބަރު 2021 ގައި އަޙްމަދު އަހުނަފް އަސްފާޤު އާއި އީމާން މުޙައްމަދު އާއި ވިޝާމް މުޙައްމަދު އާއި މުޙައްމަދު ތަޤިއްޔު ބަންދުން ދޫކޮށްލުމަށް އެކޯޓުން އަމުރުކުރުމުން ދައުލަތުން އެބައި އިސްތިއުނާފުކޮށް، އެމައްސަލަ ނިމުނީ ދައުލަތާއި އެއްކޮޅަށެވެ.

އެމީހުން ބަންދުން ދޫކޮށްލުމަށް ކްރިމިނަލް ކޯޓުން ކުރިން ނިންމި ނަމަވެސް، ހައިކޯޓުން ވަނީ އެނިންމުން ބާތިލު ކޮށްފައެވެ. އެއާއެކު އެމީހުންގެ ބަންދު ދެމެހެއްޓުމަށް ކްރިމިނަލް ކޯޓަށް ދައުލަތުން ވަނީ ހުށައަޅާފައެވެ. އަދި އެމީހުންގެ މައްޗަށް ދައުވާ ފޯމުގައި ބަޔާންކޮށްފައިވާ ހެކިތައް އަދިވެސް އެގޮތުގައި އެބަހުރި ކަމަށާއި، މުޖުތަމައަށް ނުރައްކާވާ ސަބަބުތައް ހުރިކަމަށް ދައުލަތުން ބުނެއެވެ. ވުމާއެކު ކުރިން ހުރި ހެކިތަކާއި ސަބަބުތަކަށް ބަލައި އަނެއްކާވެސް އެމީހުން ބަންދު ކުރުމަށް ދައުލަތުން ވަނީ އެދިފައެވެ.

އެހެން ނަމަވެސް، މި މައްސަލައިގައި ހިމެނޭ މުހައްމަދު ތަޤިއްޔު ބަންދުގައި ހުންނައިރު، ދުވާލަކު 5 ފަހަރު އިންސުލިން ޖަހަން ޖެހުމާއި، ލޮލުގެ ޑޮކްޓަރަކަށް ދައްކަން ޖެހޭތީ އޭނާއަކީ އެކަށީގެންވާ ފަރުވާ ދޭންޖެހޭ މީހެއްކަމަށް ކަރެކްޝަންސްއިން ވަނީ ބަޔާންކޮށް ޕީޖީ އޮފީހަށް ސިޓީ ފޮނުވާފައެވެ. އަދި ކަރެކްޝަންސްއިން އޭނާގެ ބޭސްފަރުވާގެ ކަންކަން ކުރުމުގައި ގޮންޖެހުންތަކެއް ހުރިކަން ފާހަގަ ކޮށްފައިވާކަމަށް ދައުލަތުގެ ވަކީލާ ވިދާޅުވިއެވެ. ދައުލަތުން ވަނީ ޝަރުތުތަކާއެކު އޭނާ ބަންދުން ދޫކޮށްލުމަށް އެދިލައްވާފައެވެ.

އަޑުއެހުމުގައި ވާހަކަ ދައްކަމުން ތަޤިއްޔު ވަނީ ދައުލަތުގެ ޝަރުތުތަކަށް އޭނާ ބޯލަނބާނެކަމަށް ބުނެފައެވެ.

މިމައްސަލައިގައި ގާޒީ މިސްބާޙު ވަނީ ޝަރުތުތަކާއެކު ތަޤިއްޔު ބަންދުން ދޫކޮށްލުމަށް އަމުރުކުރައްވާފައެވެ. ދެން ތިބި 3 މީހުން ބަންދުން ދޫކޮށްލާނެ ސަބަބެއް ނެތްކަމަށް ގާޒީ ވަނީ ނިންމަވާފައެވެ.

މި މައްސަލައާއި ގުޅޭގޮތުން ފުލުހުން ބުނެފައިވަނީ ކޯޓް އަމުރެއްގެ ދަށުން ހ. ވައިފިނި ހަވަނަ ފްލޯ ފާސްކުރިއިރު ގިނަ އަދަދެއްގެ މަސްތުވާތަކެތި ފެނިފައިވާ ކަމަށެވެ. އަދި މަނާ ބޭހާއި ބަނގުރާ ކަމަށް ޝައްކު ކުރެވޭ ދިޔާ އެއްޗެއްސާއި ގިނަ އަދަދެއްގެ ފައިސާވެސް ވަނީ ފެނިފައެވެ.