ސަރުކާރުގެ ވަޒީފާތަކުން ޕީޕީއެމް ނޫން ބަޔަކަށް ޖާގަ ނޯންނާނެކަމަށް ޔާމީނު ވިދާޅުވި ނަމަވެސް، ޕީޕީއެމްގެ ރާގު ބަދަލުވެއްޖެ

2023 ގައި އިދިކޮޅު ކޯލިޝަނުން ވެރިކަމަށް އައިސްފިނަމަ ސަރުކާރުގެ ވަޒީފާތައް ދޭނީ ހަމައެކަނި ޕީޕީއެމް/ޕީއެންސީއަށް ނިސްބަތްވާ ފަރާތްތަކަށް ކަމަށް ކުރީގެ ރައީސް އަބްދުﷲ ޔާމީން ވިދާޅުވި ނަމަވެސް، އެކަމުގައި އެމަނިކުފާނު ނިސްބަތްވެވަޑައިގަންނަވާ ޕީޕީއެމްގެ ރާގު ބަދަލުވެއްޖެއެވެ.

ކޮމަންޑޫ ދާއިރާއަށް ޕީޕީއެމްއިން ވާދަކުރައްވާ ކެންޑިޑޭޓް މޫސާ ފަތުހީއަށް ކެމްޕޭން ކުރެއްވުމަށް ބޭއްވި ޖަލްސާއެއްގައި ވާހަކަފުޅުދައްކަވަމުން ރައީސް ޔާމީން ވިދާޅުވީ، 2023 ގައި ޕީޕީއެމްގެ ސަރުކާރެއް ޤާއިމުވެއްޖެނަމަ، ސަރުކާރުގެ ކުންފުނިތަކާއި މުއައްސަސާތަކުގެ ވަޒީފާތަކަށް ނަންގަވާނީ ޕީޕީއެމްއަށް ނިސްބަތްވާ ފަރާތްތައް ކަމަށެވެ.

ރައީސް ޔާމީން ވިދާޅުވީ، މިހާރު ޕީޕީއެމްއާއެކު މަސައްކަތްކުރާ މީހުންނަށް ޖާގަ އޮންނާނެކަމަށެވެ.

އެހެންނަމަވެސް ޕީޕީއެމް އިން ވަނީ ރައީސް ޔާމީނުގެ ވާހަކައިގެ މަފްހޫމް އޮޅޭ ގޮތަށް އެޚަބަރު މީޑިއާތަކުން ގެނެސްދީފައިވާކަމަށް ބުނެފައެވެ. އެޕާޓީ ނޫން އެހެން ޕާޓީތަކުގެ މެންބަރުންނަށް ވަޒީފާ ނުދެއްވާނެ ކަމަށް ރައީސް ޔަމީން ވިދާޅުވެފައި ނުވާނެކަމަށް ޕީޕީއެމްގެ ބަޔާނުގައި ބުނެފައިވެއެވެ. އެހެންނަމަވެސް، ވަޒީފާ ދެއްވާނީ ހަމައެކަނި ޕީޕީއެމްއަށް ނިސްބަތްވާ ފަރާތްތަކަށް އެކަނި ކަމަށާއި، އެހެން ބަޔަކަށް ޖާގަވެސް ނޯންނާނެކަމަށް ރައީސް ޔާމީން ވަނީ ވާހަކަފުޅުދައްކަވަމުން ވިދާޅުވެފައިވެއެވެ.

ޔާމީން ވިދާޅުވީ، ދެވަނަ ފަހަރަށް ވެރިކަމަށް ހޮވިވަޑައިގެންފިނަމަ، ޕީޕީއެމްގެ ސިޔާސީ ހަރަކާތްތަކުގައި ބައިވެރިވުމުގެ ސަބަބުން ވަޒީފާ ގެއްލުނު މީހުންނަށް ވަޒީފާތައް އިއާދަ ކުރައްވާނެ ކަމަށެވެ. އެގޮތަށް ކުރައްވާއިރު، ކުރިން ތިބި މަޤާމަށްވުރެ ބޮޑު މަޤާމެއް ދެއްވާނެ ކަމަށާއި އަދި އެކަމުގައި ހިލޭ ޤާނޫނީ އެހީވެސް ފޯރުކޮށްދެއްވާނެކަމަށެވެ. ސިޔާސީ ކަންކަމުގައި ކަންކަން ކުރަންވީ ގޮތް ދަސްވީ މި ސަރުކާރުން ކަމަށާއި، އެ ދަސްވި ކަންކަން އެމަނިކުފާނުގެ ސަރުކާރެއްގައިވެސް ކުރައްވާނެކަމަށެވެ. ރައީސް ޔާމީން ވަނީ ސިޔާސީ ކަންކަމުގައި "މިނެދޭ ނާޅިން މިނެދޭން" އެބަޖެހޭކަމަށް ވިދާޅުވެފައެވެ.

ޕީޕީއެމްއިން ވަނީ ހުރިހާ ފަރާތްތަކަށްވެސް ވަޒީފާގެ ފުރުޞަތުތައް ރައީސް ޔާމީނު ތަނަވަސްކޮށްދެއްވާނެކަމަށް ބުނެފައެވެ.