ވުލްވްސްއަށް ކުޅެމުން އައި ސްޕެއިނުގެ ފޯވާޑް އެޑަމާ ޓްރައޯރޭ އަލުން އަނބުރާ ބާސެލޯނާއަށް ބަދަލުވެއްޖެއެވެ.

އުމުރުން މިހާރު 26 އަހަރުގެ ޓްރައޯރޭ އަލުން ބާސާއާ ގުޅުނީ މި ސީޒަނުގެ ނިޔަލަށް ލޯނު އެއްބަސްވުމެއްގެ ދަށުންނެވެ. މި މުއްދަތުގައި ބާސާއިން ޓްރައޯރޭގެ މުސާރަ ދައްކާއިރު، މި ސީޒަން ނިމުމުން ޓްރައޯރޭ ގަތުމުގެ ފުރުސަތު ބާސާއަށް ލިބެއެވެ. އެގޮތުން ވުލްވްސްއަށް 30 މިލިޔަން ޕައުންޑް ދެއްކުމަށްފަހު ޓްރައޯރޭގެ އެއްބަސްވުން ދާއިމީކުރުމުގެ ފުރުސަތު ބާސާއަށް އެބައޮތް ކަމަށް ރިޕޯޓުތައް ބުނެއެވެ.

ޓްރައޯރޭ އަލުން ބާސާއާ ގުޅުނުއިރު، މި ފަހަރުގެ ޓްރާންސްފާ ބާޒާރުގައި އޭނާ ގަންނަން ޓޮޓެންހަމް ހޮޓްސްޕާއިން ވަނީ މަސައްކަތްކޮށްފައެވެ. އިނގިރޭސި މީޑިއާ ރިޕޯޓުތައް ބުނާ ގޮތުން ޓްރައޯރޭ ގަންނަން ޓޮޓެންހަމުން ދެ ފަހަރެއްގެ މަތިން ބިޑް ކުރި ނަމަވެސް، ވުލްވްސްއިން ވަނީ އެ ދެ ހުށަހެޅުންވެސް ބަލައިނުގަންނަން ނިންމާފައެވެ.

ބާސާއިން މި ސީޒަނަށް ޓްރައޯރޭގެ ސޮއި ހޯދިއިރު، މި ފަހަރުގެ ޓްރާންސްފާ ބާޒާރުގައި އެ ޓީމަށް ކުޅެމުން އަންނަ ފްރާންސްގެ ފޯވާޑް އޮސްމާނޭ ޑެމްބެލޭ ކުލަބު ދޫކޮށްލާނެ ކަމަށް ބެލެވެއެވެ. އެގޮތުން ޑެމްބެލޭއަށް ބާސާއިން ހުށަހަޅާ އައު އެއްބަސްވުމުގައި ސޮއިނުކުރާ ނަމަ، އޭނާ ވިއްކާލާން އެ ކުލަބު އޮތީ ތައްޔާރަށް ކަމަށް ރިޕޯޓުތައް ބުނެއެވެ.

ބާސާގެ މަޝްހޫރު ލަ މާސިއާ އެކެޑަމީން ތަމްރީނުވި ޓްރައޯރޭ އެންމެ ފުރަތަމަ ސީނިއާ ކެރި ފެށީވެސް ބާސާއިންނެވެ. އެކަމަކު ބާސާގެ ސީނިއާ ޓީމަށް ޓްރައޯރޭ އެންމެ ހަތަރު މެޗު ކުޅެދިންއިރު، އެ ކުލަބު ދޫކޮށް 2015 ވަނަ އަހަރު އޭނާ އެންމެ ފުރަތަމަ ބަދަލުވީ އެސްޓަން ވިލާއަށެެވެ. އޭގެ ފަހުން މިޑްލްސްބަރާގައި ދެ ސީޒަން ހޭދަކުރުމަށްފަހު، 2018 ވަނަ އަހަރު ޓްރައޯރޭ ވުލްވްސްއާ ގުޅުނީ 18 މިލިޔަން ޕައުންޑުގެ ފީއަކަށެވެ.

ޓްރައޯރޭ ވުލްވްސްއާ އެކު ހަދާފައިވާ އެއްބަސްވުމުގައި ބާކީ 18 މަސް ދުވަސް އޮތްއިރު، އޭނާ ވަނީ މިހާތަނަށް އެ ޓީމަށް ކުޅެދިން 154 މެޗުގައި 11 ލަނޑު ޖަހާފައެވެ. އަދި 2020 ވަނަ އަހަރު ޓްރައޯރޭ ސްޕެއިނުގެ ގައުމީ ފުޓްބޯޅަ ޓީމުން ޖާގަ ހޯދިއިރު، އޭނާ ވަނީ މިހާތަނަށް އެ ޓީމަށް އަށް މެޗު ކުޅެދީފައެވެ.