އިޓަލީގެ ހޮސްޕިޓަލްތައް ވެކްސިން ނުޖަހާ އުމުރުން ދޮށީ މީހުންނައިގެން ފުރެނީ

އިޓަލީގައި މިދިޔަ އަހަރުން ފެށިގެން އޮމިކްރޯން ވޭރިއަންޓުގެ ސަބަބުން ކުރިމަތިވެފައިވާ ސާރޖުގައި ހޮސްޕިޓަލްތަކުގައި އެޑްމިޓްކުރާ މީހުންގެ ތެރޭގައި ގިނައީ ވެކްސިން ނުޖަހާ ތިބި އުމުރުން ދުވަސްވީ މީހުންނާއި ބޫސްޓަރ ޑޯޒް ނުޖަހާ ތިބި އުމުރުން ދުވަސްވީ މީހުންކަމަށް އެޤައުމުގެ ޑާޓާތަކުން ހާމަވެއްޖެއެވެ.

މިދިޔަ އަހަރުގެ ނޮވެމްބަރު މަހުގެ ފަހު ކޮޅުން ފެށިގެން އިޓަލީއަށް އައު ސަރޖެއް ކުރިމަތިވެފައިވާއިރު މިހާރު ހޮސްޕިޓަލްތަކުގައި އެޑްމިޓްކޮށްފައިވާ އަދަދަށް ބަލާއިރު މިސަރޖްގެ ޕީކާ ހިސާބަށް އާދެވިފައިވާކަމަށް ބެލެވޭކަމަށް އިޓަލީގެ ޑޮކްޓަރުން ބުނެއެވެ.

ނޮވެމްބަރ މަހުގެ 19 އިން ޖެނުއަރީ މަހުގެ 2 ވަނަ ދުވަހުގެ ނިޔަލަށް އިޓަލީގެ ކޮވިޑްގެ ހާލަތާއި ގުޅޭގޮތުން ޝާއިއުކޮށްފައިވާ ލިޔުމުން އިޓަލީގައި މިހާރު ހާލަތު ގޯސްވުމާއި ހިސާބަށް ދަނީ ކޮންބަޔެއްކަން ދެނެގަތުމަށް ވަނީ ފަސޭހަވެފައެވެ.

އެލިޔުމުގައި ވަނީ އޮމިކްރޯން ވޭރިއަންޓް ޖެހިގެން މީހުންނަށް ބޮޑުވަރުވުން ކުޑަ ނަމަވެސް އޮމިކްރޯން ވޭރިއަންޓް ޖެހުމުން އެމީހުންގެ ސިއްހަތަށް ނުރައްކާވާ މިންވަރު ފާހަގަކޮށްފައެވެ.

ޑިސެމްބަރ މަހުގެ 3 އިން ޖެނުއަރީ މަހުގެ 2 ވަނަ ދުވަހުގެ ނިޔަލަށް ހޮސްޕިޓަލްތަކުގައި އެޑްމިޓްކޮށްފައިވާ މީހުންނަށް ބަލާއިރު ވެކްސިން ނުޖަހާ 100،000 މީހުންގެ ތެރެއިން 248 މީހުން ވަނީ އެޑްމިޓްކޮށްފައެވެ. އެއަދަދު ނޮވެމްބަރ މަހުގެ 10 އިން ޑިސެމްބަރު މަހުގެ 19 އަށް ހުރީ 172 ގައެވެ.

ވެކްސިން ނުޖަހާ މީހުންގެ ތެރެއިން ހޮސްޕިޓަލްތަކުގައި އެންމެ ގިނައިން އެޑްމިޓްކޮށްފައިވަނީ އުމުރުން 80 އަހަރުން މަތީގެ މީހުންނެވެ. އޭގެފަހުން އުމުރުން 60 އަހަރާއި 79 އަހަރާ ދެމެދު މީހުންނެވެ.

މީގެއިތުރުން އައިސީޔޫގައި އެޑްމިޓްކޮށްފައިވާ މީހުންނަށް ބަލާއިރުވެސް ވެކްސިން ނުޖަހާ 100،000 މީހުންގެ 42 މީހުން ވަނީ އައިސީޔޫއިން ފަރުވާ ހޯދާފައެވެ.

ކުރިޔަށް އޮތް ހަފްތާގައި ކޭސްތަކުގެ އަދަދު މަދުވާނެކަމަށް ބެލެވޭތީ ހޮސްޕިޓަލްތަކުގައި އެޑްމިޓްކުރާ މީހުންގެ އަދަދުވެސް މަދުވާނެކަމަށް ވަނީ ބެލެވިފައެވެ.