ޕީޕީއެމްގެ ސަރުކާރެއްގައި ވަޒީފާދޭނީ ހަމައެކަނި ޕީޕީއެމްއަށް ނިސްބަތްވާ ފަރާތްތަކަށް: ޔާމީން
ސިޔާސީ ކަންކަމުގައި، "މިނެދޭ ނާޅިން މިނެދޭން" އެބަޖެހޭކަމަށް ވިދާޅުވި
އިދިކޮޅުން ބޭއްވި ޖަލްސާއެއްގައި ރައީސް ޔާމީން ވާހަކަ ދައްކަވަނީ
2023ގައި އިދިކޮޅު ކޯލިޝަނުން ވެރިކަމަށް އައިސްފިނަމަ ސަރުކާރުގެ ވަޒީފާތައް ދޭނީ ހަމައެކަނި ޕީޕީއެމް/ޕީއެންސީއަށް ނިސްބަތްވާ ފަރާތްތަކަށް ކަމަށް ކުރީގެ ރައީސް އަބްދުﷲ ޔާމީން ވިދާޅުވެއްޖެއެވެ.
ކޮމަންޑޫ ދާއިރާއަށް ޕީޕީއެމްއިން ވާދަކުރައްވާ ކެންޑިޑޭޓް މޫސާ ފަތުހީއަށް ކެމްޕޭން ކުރެއްވުމަށް ބޭއްވި ޖަލްސާއެއްގައި ވާހަކަ ދައްކަވަމުން ރައީސް ޔާމީން ވިދާޅުވީ، 2023ގައި ޕީޕީއެމްގެ ސަރުކާރެއް ގާއިމުވެއްޖެނަމަ، ސަރުކާރުގެ ކުންފުނިތަކާއި މުއައްސަސާތަކުގެ ވަޒީފާތަކަށް ނަންގަވާނީ ޕީޕީއެމްއަށް ނިސްބަތްވާ ފަރާތްތައް ކަމަށެވެ. އަދި އެހެން ބަޔަކަށް ޖާގަވެސް ނޯންނާނެކަމަށް ރައީސް ޔާމީން ވިދާޅުވިއެވެ.
ރައީސް ޔާމީން ވިދާޅުވީ، މިހާރު ޕީޕީއެމްއާއެކު މަސައްކަތްކުރާ މީހުންނަށް ޖާގަ އޮންނާނެކަމަށެވެ.
ޔާމީން ވިދާޅުވީ، ދެވަނަ ފަހަރަށް ވެރިކަމަށް އާދެވިއްޖެނަމަ، ޕީޕީއެމްގެ ސިޔާސީ ހަރަކާތްތަކުގައި ބައިވެރިވުމުގެ ސަބަބުން ވަޒީފާ ގެއްލުނު މީހުންނަށް ވަޒީފާތައް އިއާދަ ކުރައްވާނެ ކަމަށެވެ. އެގޮތަށް ކުރައްވާއިރު، ކުރިން ތިބި މަގާމަށްވުރެ ބޮޑު މަގާމެއް ދެއްވާނެ ކަމަށާއި އަދި އެކަމުގައި ހިލޭ ގާނޫނީ އެހީވެސް ފޯރުކޮށްދޭނެކަމަށެވެ. ސިޔާސީ ކަންކަމުގައި ކަންކަން ކުރަންވީ ގޮތް ދަސްވީ މި ސަރުކާރުން ކަމަށާއި، އެ ދަސްވި ކަންކަން އެމަނިކުފާނުގެ ސަރުކާރެއްގައިވެސް ކުރައްވާނެކަމަށެވެ. ރައީސް ޔާމީން ވަނީ ސިޔާސީ ކަންކަމުގައި "މިނެދޭ ނާޅިން މިނެދޭން" އެބަޖެހޭކަމަށް ވިދާޅުވެފައެވެ.
އެމްއެމްޕީއާރްސީ ޚިޔާނާތާ ގުޅިގެން ރައީސް ޔާމީނުގެ މައްޗަށް އުފުލާފައިވާ ދައުވާގެ ޝަރީއަތްތަކާ ގުޅޭގޮތުންވެސް މި ޖަލްސާގައި އެމަނިކުފާނު ވާހަކަ ދައްކަވާފައިވެއެވެ. އެގޮތުން ދައުލަތުން ހެކި އުފައްދާކަމަށް ޔާމީން ތުހުމަތު ކުރައްވައެވެ. އިދިކޮޅުގެ މަގުސަދަކީ އެކަންކަން ހުއްޓުވުންކަމަށްވެސް ރައީސް ޔާމީން ވިދާޅުވިއެވެ.
ރައީސް ޔާމީން އިތުރަށް ވިދާޅުވީ، މަޖިލިސް އިންތިޚާބު ޕީޕީއެމްއަށް ގެއްލިގެން ދިޔައީ ޖުމްހޫރީ ޕާޓީއާއެކު ވެވިފައިވާ އެއްބަސްވުމެއްގެ ދަށުން ބައެއް ގޮނޑިތައް އެ ޕާޓީއަށް ދޫކޮށްލުމުގެ ސަބަބުން ކަމަށެވެ. އެހެންނަމަވެސް، ޕީޕީއެމްގައި ރައީސް ޔާމީނުގެ ބަސް ހިނގާކަމުގައިވާނަމަ، ރައްޔިތުންގެ މަޖިލީހުގެ އެއްވެސް ދާއިރާއެއް އެހެން ބަޔަކަށް ދޫކޮށްނުލައްވާނެ ކަމަށްވެސް ވިދާޅުވިއެވެ.
