''އެއީ ވޭންދެނިވި އެކަނިވެރިކުރުވާ ކަމެއް، އެކަމަކު އާއިލާގެ އެންމެން އެ ކެކުޅުން ތަހައްމަލް ކުރޭ'' މިއީ ކެންސަރާއި ހަނގުރާމަކޮށް ރަނގަޅުވި މީހަކު އެކަމުގެ ތަޖުރިބާ ހިއްސާކުރި ގޮތެވެ. ތެދެކެވެ. ކެންސަރު ބައްޔަކީ ނުރައްކާތެރި ބައްޔެކެވެ. އެހާމެ ވޭންދެނިވި ބައްޔެކެވެ. ދުނިޔޭގެ އެތައް ބަޔަކު މިބަލީގައި ދުނިޔެ ދޫކުރަމުންދާއިރު، ބައްޔާއި ދެކޮޅަށް ގިނަ ބަޔަކު ދަނީ ހަނގުރާމަ ކުރަމުންނެވެ. ބަލީގެ ނުރައްކާތެރިކަމުން މަރު ބައްޔެއްގެ ގޮތުގައި ސިފަ ކުރާ މީހުން ވެސް މަދެއް ނުވާނެއެވެ. ނަމަވެސް މިއަދު ހާލަތު ވަނީ ބަދަލުވާން ފަށާފައެވެ. ސިއްހީ ގޮތުން ލިބޭ ކުރިއެރުމާއެކު، އަވަސް ގޮތެއްގައި ފަރުވާ ދެވި މިބަލިން އެއްކޮށް ރަނގަޅުވާ މީހުންގެ އަދަދު ދަނީ އިތުރުވަމުންނެވެ. ބަލިން ރަނގަޅުވާ މީހުން އެކަން ހިއްސާކުރުމަކީ ބަލި ތަހައްމަލް ކުރާ މީހުންނަށް ލިބޭ ހިތްވަރަކަށް ވެސް ވެއެވެ.
ކެންސަރު ބަލިން ރަނގަޅުވެފައިވާ ހުސައިން ރަޝީދު ބުނެފައިވަނީ ކެންސަރު ބަލިޖެހުމަކީ ވަރަށް ވޭންލިބިދެނިވި އެކަނިވެރިކުރުވާ ކަމެއް ކަމަށާއި، އާއިލާގެ އެންމެން އެބައްޔެއްގެ ކެކުޅުން ތަހައްމަލްކުރަން ޖެހޭ ބައްޔެއް ކަމަށެވެ. މިބަލިން ސަލާމަތްވެވޭނީ ބަލިމީހާ ހިތްވަރާއެކު މިބައްޔާ ހަނގުރާމަކޮށްގެން ކަމަށެވެ. ހުސެއިން ރަޝީދު މިބައްޔާ ދެކޮޅަށް ނުކުތީ ނެތް ހިތްވަރުއާއެކު މާތްﷲށް ވަކީލުކޮށްގެންނެވެ. ގައިގައި އެތަކެއް ވޭނެއް އެޅިއެވެ. އެތައް ދުވަހެއް މާޔޫސްކަމުގައި ތަހައްމަލް ކުރިއެވެ. ނަމަވެސް އުންމީދު ކަނޑާލާނުލައި ބަލިން ސަލާމަތްވުމަށް މަސައްކަތް ކުރިއެވެ.
ހުސެއިން ރަޝީދު ކިޔާދިން ގޮތުގައި އޮޕަރޭޝަނަކީ މިބަލީގެ އެންމެ ފަސޭހަ މަރުހަލާއެވެ. ކީމޯއާއި ރޭޑިއޭޝަން ފަރުވާގެ މަރުހަލާއަކީ އެކަނިވެރިކުރުވާ ދުނިޔެމަތިން ފޫހިކުރުވާ މަރުހަލާއެކެވެ. އަދި ބައްޔާއި ކުރިމަތިލާންވީ ވަގުތަކީ ކީމޯއާއި ރޭޑިއޭޝަން ފަރުވާގެ ވަގުތު ކަމަށް އޭނާ ބުންޏެވެ.
މީގެ އިތުރުން ހުސެއިން ރަޝީދު އޭނާ ފަރުވާ ފެށީ އާއިލާ މެންބަރުންނާއި ވަކިން އެކަނިމާއެކަނި ހުރެއެވެ. އެދުވަހު ސަޕޯޓު ގުރޫޕެއް ވެސް ނެތް ކަމަށާއި ކެންސަރ ސޮސައިޓީއެއް ވެސް ނެތް ކަމަށް އޭނާ ބުންޏެވެ. އެހެންކަމުން މިބަލީގައި ކާމިޔާބު އެދޭ މީހުންނަށް ހިތްވަރަކީ ވަރަށް މުހިންމު އެއްޗެކެވެ. އަދި އެފަދަ މީހުންނާއި އާއިލާތަކަށް ހިއްވަރު ދިނުމަށް ވެސް އޭނާ އެދިފައިވެއެވެ.
އަހަރެން މިބައްޔާ ކުރިމަތިލީއިރު އަތުގައި އޮތީ ދެޓިކެޓު. އެއީ މާތްﷲގެ އޯގާވަންތަވެރިކަމާއެކު ހައްޖުގެ އަޅުކަން އަދާކޮށްގެން މާލެއައި ޓިކެޓާއި މިބައްޔާ ހަގުރާމަކުރަން ލިބިފައި އޮތް ޓިކެޓު. ކޮންމެ ޓިކެޓެއްވެސް އޯކޭކަމަށް ނިންމާ މާތްﷲއަށް ވަކީލުކޮށްގެން މިބައްޔާ ހަނގުރާމަފެށީ.ހުސެއިން ރަޝީދު
ހުސެއިން ރަޝީދުގެ ހިތްވަރާއެކު، މާތްﷲގެ އިރާދަފުޅާއެކު އޭނާ ވަނީ މިއަދު ކެންސަރު ބަލިން ސަލާމަތްވެފައެވެ. މިބަލިން ސަލާމަތްވިތާ 20 އަހަރު އަންނަ މާޗް މަހުގެ 3 ވަނަ ދުވަހު ފުރުނު ނަމަވެސް އަދިވެސް އޭނާގެ ހިތުން އެބިރުވެރިކަން ފިލައިގެން ނުދެއެވެ. އެއީ އޭނާ ކެންސަރާއި ހަނގުރާމަ ކުރި ދުވަސްވަރަކީ ރާއްޖެ އެހާ ބޮޑަށް ކެންސަރަށް ހޭލުންތެރި ދުވަސްވަރަކަށް ނުވާތީއެވެ. ގިނަ ކަންތައްތަކާއި ކުރިމަތިލާން ޖެހިފައިވާތީއެވެ.
ނަމަވެސް މިހާރު ވަނީ ވަރަށް ބޮޑަށް ހާލަތު ބަދަލުވެފައެވެ. ދަތުރުފަތުރަށް ބޮޑެތި ބަދަލުތަކެއް އައިސްފައެވެ. ކެންސަރު ބަލި ތަހައްމަލް ކުރަމުންދާ މީހުންނަށް އެހީވުމަށް ކެންސަރ ސޮސައިޓީ ފަދަ ގިނަ ޖަމިއްޔާތައް ހުރެއެވެ. ސިއްހީ ފަރުވާ ފުޅާވެ، ޚިދުމަތް އަވަހަށް ހޯދެއެވެ. ފަރުވާއަށް މާލީ ތަނަވަސްކަން ނުލިބި ހިތް މާޔޫސްވާކަށް މިއަދު ނުޖެހެއެވެ. ހުރިހާ ގޮތަކުން ވެސް ވަނީ ކުރިއެރުން ލިބިފައެވެ. މީގެ އިތުރުން ކެންސަރުގެ ތަފާތު ބަލިތަކަށް އާއްމުން ހޭލުންތެރިކުރުވައި، ކެންސަރަށް މީހާ ހުށަހެޅިގެންދާ އެންމެހައި ކަންކަމުން ދުރުވުމަށް ކަމާބެހޭ ހުރިހާ ފަރާތްތަކުން ވެސް ތަކުރާރުކޮށް ދަނީ އިލްތިމާސް ކުރަމުންނެވެ. އެހެންކަމުން މިބަލި ތަހައްމަލު ކުރަމުންދާ ހުރިހާ ފަރާތްތަކުން ވެސް އައުހިތްވަރަކާއެކު ބައްޔާއި ހަނގުރާމަ ކުރުން ބުއްދިވެރިއެވެ.
