ލޭގެ ކެންސަރަށް ހޯދި ފަރުވާގެ ތެރެއިން 3 ވަނަ މީހަކު އެޗްއައިވީން ސަލާމަތްވެއްޖެ

ހިއުމަން އިމިއުނޯޑެފިޝަންސީ ވައިރަސް ނުވަތަ އެޗްއައިވީއަކީ ނުރައްކާތެރި އެއިޑްސް ބަލިޖައްސާ ވައިރަހަށް ކިޔާނަމެވެ. އެޗްއައިވީއަކީ ގުދުރަތީގޮތުން އިންސާނާގެ ހަށިގަނޑުގައި އެކުލެވޭ ދިފާއީ ބާރު ނެތިކޮށް ހަލާކުކޮށްލާ ޖަރާސީމެކެވެ. މި ޖަރާސީމު ހަށިގަނޑަށް ވަންނަނީ ހަންގަނޑާއި، ތެތް ދުލިފަށް، އަދި މާބަނޑު މީހާގެ ބަނޑުގައިވާ މަސް ހުރަސްކޮށެވެ. އެކަކު ގައިން އަނެކަކު ގަޔަށް އާންމު ގޮތެއްގައި އެޗްއައިވީ އަރަނީ ހަށިގަނޑުގެ ދިޔައިންނެވެ. އެޗްއައިވީގެ ޝިކާރައަކަށް ވުމަށްފަހު މީހާގެ ދިރިއުޅުން އެތައް ގޮތަކުން ބަދަލުކޮށްލައެވެ. ކަނޑައެޅިގެން ދާއިމީ ލުޔެއް ލިއްބައިދޭ ފަރުވާއެއް ފެނިފައި ނެތުމީ އެންމެ ބޮޑު އެއް ސަބަބެކެވެ.

ކަން މިހެން އޮތްނަމަވެސް، ކޮންމެ ބައްޔަކަށް ފަރުވާއެއް ނުވަތަ އެބަލިން ރައްކާތެރިވުމުގެ މަގު ލައްވާފައިވެއެވެ. އިންސާނުންނަށް އޮތީ އެ ފަރުވާއެއް ހޯދަން ގަދައަޅައި މަސައްކަތްކުރުމެވެ. ޝިފާއެއް ލިބެން ނެތޭ ހީވާ ކިތަންމެ ކަމަކަށް، މާތް ﷲގެ ތަނަވަސް ރަހުމަތްފުޅުން ޝިފާ ލިބިގެންދެއެވެ.

އެޗްއައިވީގެ ޝިކާރައަކަށް ވެފައިވާ 38.4 މިލިއަނަށްވުރެ ގިނަ މީހުން ދުނިޔޭގެ އެކި ކަންކޮޅުތަކުގައި ތިބިއިރު، 3 ވަނަ މީހަކަށް މި ވަނީ ޝިފާ ލިބިފައެވެ. އެޗްއައިވީގެ ޖަރާސީމުން އެމީހާ ސަލާމަތްވެފައިވާކަން، ފްރާންސް ޕެސްޓަރ އިންސްޓިޓިއުޓްއިން އިއުލާންކުރީ ފެބުރުއަރީ 20 ވަނަ ދުވަހުއެވެ. އެމީހަކީ ބޯން މެރޯ ސްޓެމް ސެލް ޓްރާންސްޕްލާންޓްކުރި މީހެކެވެ.

ފްރާންސް ޕެސްޓަރ އިންސްޓިޓިއުޓްއިން އާންމުކުރި އިއުލާނުގައި ބުނެފައިވަނީ، އެ ޕޭޝަންޓް ޓްރާންސްޕްލާންޓް ހެދީ މީގެ 5 އަހަރު ކުރިން ކަމަށެވެ. އެ ޑޯނަރަކީ އެޗްއައިވީ އިންފެކްޝަނާ ދެކޮޅުހަދާ އާދަޔާ ޚިލާފު ޖީންތަކެއް ހުރި ޑޯނަރެއް ކަމަށް މައުލޫމާތު ލިބެއެވެ. ޓްރާންސްޕްލާންޓް ހެދި ޕޭޝަންޓް، އެންޓިރެޓްރޯވިއަލް ބޭސްތައް ބޭނުންކުރުން ހުއްޓާލިތާވެސް 44 މަސް ފާއިތުވެފައި ވާއިރު، މިހާރު ހަދާ ޓެސްޓުތަކުގައި، އެޗްއައިވީ އިންފެކްޝަންގެ ނިޝާނެއްވެސް ފެންނަން ނުހުންނަކަމަށް ފްރާންސް ޕެސްޓަރ އިންސްޓިޓިއުޓުން ބުނެއެވެ.

ޕޭޝަންޓުގެ ޒާތީ ވަނަވަރު ހާމަކޮށްފައި ނުވިނަމަވެސް، އެމީހާ ބޯން މެރޯ ސްޓެމް ސެލް ޓްރާންސްޕްލާންޓް ފަރުވާ ހޯދާފައިވަނީ ޑިސަލްޑޯފްގައި ލޭގެ ކެންސަރަށް ފަރުވާ ހޯދުމުގެ ތެރޭގައެވެ.

އެޗްއައިވީގެ ޝިކާރައަކަށް ވެފައިވާ މީހުންގެ ތެރެއިން އެންމެ ފުރަތަމަ ޝިފާ ލިބުނުކަމަށް ރިޕޯޓްކުރީ "ބަރލިން ޕޭޝަންޓް"ގެ ނަމުން ވަނަން ދީފައިވާ މީހެކެވެ. އެއީ 2007 ވަނަ އަހަރުއެވެ. އޭގެ ފަހުން 2 ވަނަ މީހެއްގެ ކޭސް ރިޕޯޓްކުރީ "ލަންޑަން ޕޭޝަންޓް"ގެ ގޮތުގައި 2016 ވަނަ އަހަރުއެވެ. "ޑިސަލްޑޯފް ޕޭޝަންޓް"އަކީ ދުނިޔޭގެ 3 ވަނައެވެ.

މި ދިރާސާގައި އިސްކޮށް ހަރަކާތްތެރިވި ސައެފް-ފީރިއޯން ބުނިގޮތުގައި މި ޕޭޝަންޓަށް ދިން ފަރުވާއަކީ މާ ފަސޭހަ ފަރުވާއެއް ނޫނެވެ. ޚަރަދު ބޮޑު، ނުރައްކާތައްވެސް ބޮޑު ފަރުވާއެކެވެ. ނަމަވެސް، މިއީ އެޗްއައިވީއަށް ފަރުވާއެއް ހޯދުމަށް ކުރަމުންދާ ދިރާސާގައި ކުރިއަށް އެޅުނު މުހިންމު ފިޔަވަޅެއްކަން އޭނާ ފާހަގަކުރެއެވެ. އެގޮތުން ބޯން މެރޯ ޓްރާންސްޕްލާންޓަށް ދާ އެޗްއައިވީ ޕޭޝަންޓުންނަށް، އެޗްއައިވީ ރެސިސްޓަންޓް ޖީން ތައާރަފުކުރުން ކަހަލަ ކަމެއް ކުރުމުގެ ފުރުސަތު ބޮޑެވެ.

އެޗްއައިވީން ޖައްސާ އެއިޑްސްބަލި 1980ގެ އަހަރުތަކުގައި ދެނެގަނެވުނު ފަހުން، އަދާ ހަމައަށް މި ބަލިމަޑުކަމުގައި 40 މިލިއަނެއްހާ މީހުން ވަނީ މި ދުނިޔެއާ ވަކިވެފައެވެ.