އައު ދިރާސާއަކުން ދައްކާގޮތުގައި، 50 އަށްވުރެ ގިނަ ބާވަތުގެ ކެންސަރު ދެނެގަތުމަށް ކުރެވޭ ލޭގެ ޓެސްޓަކުން ބަލި ދެނެގަތުމުގެ މަސައްކަތް އަވަސް ކުރެވިދާނެ އެވެ.

އުތުރު އެމެރިކާގައި ކުރެވުނު ތަޖުރިބާއެއްގެ ނަތީޖާ އިން ދައްކާގޮތުގައި، މި ޓެސްޓުން ވަރަށް ގިނަ ބާވަތުގެ ކެންސަރުތައް ދެނެގަނެވުނެވެ. އޭގެ ތެރެއިން ހަތަރުބައިކުޅަ ތިންބަޔަކީ އެއްވެސް ބާވަތެއްގެ ސްކްރީނިންގ ޕްރޮގްރާމެއް މިހާތަނަށް ނެތް ކެންސަރުތަކެވެ.

މި ޓެސްޓުން ދެބައިކުޅަ އެއްބަޔަށްވުރެ ގިނަ ކެންސަރުތައް ދެނެގަނެވުނީ ބަލީގެ ފުރަތަމަ މަރުޙަލާގައެވެ. މި މަރުޙަލާގައި ބައްޔަށް ފަސޭހަ އިން ފަރުވާ ކުރެވޭނެއެވެ. އަދި ފަސޭހަ އިން ރަނގަޅު ކުރެވިދާނެއެވެ.

އެމެރިކާގެ ބޭސް އުފައްދާ ކުންފުންޏެއް ކަމުގައިވާ ގްރެއިލް އިން އުފައްދާފައިވާ ގެލެރީ ޓެސްޓުން، ކެންސަރުގެ ޓިއުމަރުން ނެއްޓިފައިވާ ކެންސަރުގެ ޑީއެންއޭގެ ބައިތައް ލޭގައި ހުރިތޯ ދެނެގަނެވެއެވެ. މިހާރު އިނގިރޭސިވިލާތުގައި ދަނީ މި ޓެސްޓު ތަޖުރިބާ ކުރަމުންނެވެ.

މި ތަޖުރިބާގައި އެމެރިކާ އާއި ކެނެޑާގެ 25،000 މީހުން އެއް އަހަރު ދުވަހުގެ މުއްދަތަށް މޮނިޓަރ ކުރެވުނެވެ. އޭގެ ތެރެއިން ގާތްގަނޑަކަށް ކޮންމެ 100 މީހަކުން އެކަކަށް ޕޮޒިޓިވް ނަތީޖާ ލިބުނެވެ. މި ޕޮޒިޓިވް ނަތީޖާ ތަކުގެ ތެރެއިން 62 އިންސައްތައިގައި ފަހުން ކެންސަރު ހުރިކަން ކަށަވަރު ކުރެވުނެވެ.

މި ދިރާސާގެ އިސްފަރާތް ކަމުގައިވާ، އޮރެގަން ހެލްތު އެންޑް ސައިންސް ޔުނިވަރސިޓީގެ ރޭޑިއޭޝަން މެޑިސިންގެ އެސޯސިއޭޓް ޕްރޮފެސަރ ޑރ. ނިމާ ނަބަވިޒާދޭ ވިދާޅުވީ، މި ޑޭޓާ އިން ދައްކާގޮތުގައި މި ޓެސްޓުން ކެންސަރު ސްކްރީން ކުރުމުގެ އުސޫލުތަކަށް "އަސާސީ ބަދަލެއް" ގެނެވިދާނެ ކަމަށެވެ.

އޭނާ އިތުރަށް ވިދާޅުވީ، މި ޓެސްޓުން ވަރަށް ގިނަ ބާވަތުގެ ކެންސަރުތައް "ކުރީކޮޅު ދެނެގަނެވިދާނެ" ކަމަށެވެ. "އެއީ ކާމިޔާބު ފަރުވާ އެއް ދިނުމަށް ނުވަތަ ފަސޭހަ އިން ރަނގަޅު ކުރެވުމުގެ ފުރުޞަތު އެންމެ މުހިންމު ދަނޑިވަޅު" ކަމަށް އޭނާ ވިދާޅުވިއެވެ.

ނެގެޓިވް ނަތީޖާ ލިބުނު މީހުންގެ ތެރެއިން 99 އިންސައްތަ އަށް ވުރެ ގިނަ މީހުންގެ ހަށިގަނޑުގައި ކެންސަރު ނެތްކަން މި ޓެސްޓުން ރަނގަޅަށް ދެނެގަނެވުނެވެ.

ގައިނެކޮލޮޖިކަލް، ބޮވެލް، ފުއްޕާމޭ އަދި ސަރވިކަލް ސްކްރީނިންގ އާ އެކު މި ޓެސްޓު ބޭނުން ކުރުމުން، ޖުމުލަ ގޮތެއްގައި ދެނެގަނެވުނު ކެންސަރުތަކުގެ އަދަދު ހަތް ގުނައަށް އިތުރުވިއެވެ.

އެންމެ މުހިންމު ކަމަކީ، ދެނެގަނެވުނު ކެންސަރުތަކުގެ ތެރެއިން ހަތަރުބައިކުޅަ ތިންބަޔަކީ އެއްވެސް ބާވަތެއްގެ ސްކްރީނިންގ ޕްރޮގްރާމެއް ނެތް ކެންސަރުތަކެވެ. މީގެ ތެރޭގައި އޮވެރިއަން، ލިވަރ، މައިދާ، ބްލެޑަރ އަދި ޕެންކްރިއަސްގެ ކެންސަރު ހިމެނެއެވެ.

މި ލޭގެ ޓެސްޓުން 10 ކޭސް ގެ ތެރެއިން 9 ކޭހުގައި ކެންސަރު ފެށުނު ގުނަވަން ރަނގަޅަށް ދެނެގަނެވުނެވެ.

މި ފާހަގަކޮށްލެވޭ ނަތީޖާތަކުން ދައްކާ ގޮތުގައި، މުސްތަޤުބަލުގައި ކެންސަރުގެ ކުރީކޮޅު ބަލި ދެނެގަތުމުގައި މި ލޭގެ ޓެސްޓަށް މުހިންމު ދައުރެއް އަދާކުރެވިދާނެއެވެ.

ނަމަވެސް، މި ދިރާސާގައި ބައިވެރިނުވާ ސައިންޓިސްޓުން ބުނާގޮތުގައި، މި ލޭގެ ޓެސްޓުން ކެންސަރުން މަރުވާ މީހުންގެ އަދަދު މަދުކުރެވޭކަން ދެއްކުމަށް އިތުރު ހެކި ބޭނުންވެއެވެ.

ޔޫކޭ ގެ އެންއެޗްއެސް އިން ކުރިން ބުނެފައިވަނީ، ނަތީޖާތައް ކާމިޔާބު ވެއްޖެ ނަމަ، އިތުރު އެއް މިލިއަން މީހުންނަށް މި ޓެސްޓުތައް ފުޅާކުރާނެ ކަމަށެވެ.

ގްރެއިލްގެ ބަޔޯފާމާގެ ރައީސް ސަރ ހަރޕާލް ކުމާރު މި ނަތީޖާ ތަކަކީ "ވަރަށް އުއްމީދީ" ނަތީޖާ ތަކެއް ކަމަށް ވިދާޅުވިއެވެ.

ބީބީސީ ރޭޑިއޯ 4 ގެ ޓުޑޭ ޕްރޮގްރާމަށް ވާހަކަ ދައްކަވަމުން އޭނާ ވިދާވިދާޅުވީ، "ކެންސަރުން މަރުވާ މީހުންގެ ތެރެއިން ގިނަ މީހުން މަރުވަނީ އެމީހުންގެ ކެންސަރު ދެނެގަނެވެނީ މާ ލަހުން ކަމަށް ވާތީއެވެ."

ގިނަ ކެންސަރުތައް ދެނެގަނެވެނީ "ވަރަށް ލަސް ހިސާބުން" ކަމަށް އޭނާ އިތުރަށް ވިދާޅުވިއެވެ. އަދި މަޤްޞަދަކީ "ކުރީކޮޅު ދެނެގަތުމަށް ބަދަލުވުން" ކަމަށާއި، އޭރުން "މާ ފައިދާހުރި އަދި ފަހަރެއްގައި ފަސޭހައިން ރަނގަޅު ކުރެވިދާނެ ފަރުވާތައް ބޭނުން ކުރުމުގެ ފުރުޞަތު ލިބޭނެ" ކަމަށް އޭނާ ވިދާޅުވިއެވެ.