"ކެންސަރުގެ ވޭނީ ދަތުރުގަ ނުރޯށޭ ނުބުނެ، ތަދުވާނޭ، އެހެނަސް ކެތްކޮށްލާނީއޭ މީހަކު ބުނިނަމަ..."

އެއީ އަދާ ޖެހުނުއިރުވެސް ދާއިމީ ފަރުވާއެއް ކަނޑައެޅިގެން ހޯދިފައި ނެތް ކެންސަރު ބަލީގެ ޕޭޝަންޓެއްކަން ސަބްރީން ޢަބްދު އައްޒަހްރާ ޙުސައިނަށް އެނގުނީ އޭނާގެ އުމުރުން އެންމެ 11 އަހަރުގައެވެ. މިއަދު އޭނާގެ އުމުރަކީ 26 އަހަރެވެ. މާތް ﷲގެ ތަނަވަސް ރަޙްމަތްފުޅާއެކު ހެޔޮ ހާލުގައެވެ.

ކެންސަރުގެ ވޭނީ ދަތުރަށް ލުއިލިބި، ކާމިޔާބުގެ މަންޒިލަށް ދެވުނުނަމަވެސް ފަހަރެއްގައިވެސް އެ ދުވަސްތައް މަތިން ސަބްރީން ހަނދާން ނައްތައެއްނުލައެވެ. މިއަދު އޭނާއަކީ، ކުޑަކުއްޖެއްގެ ގޮތުގައި ޚުދު އޭނާވެސް ފަރުވާ ހޯދި ހޮސްޕިޓަލުގައި، ކެންސަރު ބަލީގެ ޝިކާރައަކަށް ވެފައި ތިބި ކުދިންނަށް ހިތްވަރު ދިނުމުގެ މަސައްކަތުގައި އަވަދިނެތި އުޅެމުންދާ ދަރުމަވެރިއެކެވެ.

އިންތިހާ ޅަ އުމުރެއްގައި ކެންސަރު ޖެހި، ފަރުވާގެ މުއްދަތުގައި ހޭދަވި ވޭނީ ދުވަސްތަކުގެ ހަނދާން އައުކުރުމަކީ ސަބްރީން އެންމެ ފުރަތަމަ ކުރާހިތްވި ކަމެއް ނޫނެވެ. އެ ދުވަސްތަކުގެ އެއްވެސް ހަނދާނެއް، ސިކުނޑީގައި ރައްކައުކޮށް، އައުކުރާކަށްވެސް އޭނާގެ ހިތެއް ނުރުހުނެވެ. ނަމަވެސް، ކުޑަކުދިންނާއެކު އެ މާހައުލުގައި މަސައްކަތް ކުރަން ފެށި ހިސާބުން އެ ވިސްނުން ބަދަލުވާންފެށި ކަމަށް ސަބްރީން ކިޔައިދިނެވެ.

ކެންސަރު ބަލީގެ ވޭން އުފުލަމުންދާ ކުދިންނަށް ހިތްވަރު ދިނުމުގައި ދެމިހުރުން ވެފައި ވަނީ، ސަބްރީންގެ ދިރިއުޅުމުގެ ދަތުރަށް ލިބޭ ތަސައްލީއަކަށެވެ.

ސަބްރީން ބުނާގޮތުގައި، ކެންސަރު ބަލީގައި އޭނާ ކުރި ތަޖުރިބާތަކަކީ، އުމުރުން ހަގު އެތައް ޕޭޝަންޓުންނެއް އަޑުއަހަން ބޭނުންވެފައި ތިބި އެތައް ވާހަކައެއް ހިއްސާކުރުމުގެ ފުރުސަތު ތަނަވަސްކޮށްދޭ ކަމެކެވެ. ދާއިރާއިން ތަޖުރިބާއާއި ޢިލްމު ހާސިލުކޮށްގެން ތިބި ޞިއްޙީ ޚިދުމަތްތެރިންނަކީ ފަހަރެއްގައިވެސް ދެރަ ބައެކޭ ދަންނަވަނީއެއް ނޫނެވެ.

ޅައުމުރުގައި ކެންސަރު ބަލީގެ ބިރާއި ވޭން ތަހައްމަލުކުރި ދުވަސްވަރު، އެހެން މީހަކު އޭނައަށް އެ ވާހަކަތައް ކިޔައިދިން ނަމައޭ ހިތަށް އެރި އެތައް ވާހަކައެއް، މިއަދު އެ ހާލުގައި ތިބި ކުދިންނަށް ސަބްރީން ކިޔައިދެއެވެ.

ޢިރާޤުގައި ކެންސަރު ބައްޔަށް ފަރުވާ ހޯދަމުންދާ ކުދިންނާއެކު ސަބްރީން ހޭދަ ކުރަމުން ދަނީ އުފާވެރި ވަގުތުތަކެކެވެ. އެކިއެކި ހަރަކާތްތަކުގައި އެ ކުދިންނާއެކު ސަބްރީން ބައިވެރިވެ، ކުޅެހަދައެވެ. ކެންސަރު ބައްޔާބެހޭ އެތައް މަޢުލޫމާތެއް ފޯރުކޮށްދެއެވެ. އެ ހުރިހާ ކަމަކަށްވުރެވެސް ބޮޑަށް، ބަލިން ރަނގަޅުވާނެ ކަމުގެ އުންމީދު ކަނޑާނުލުމަށް ކެނޑިނޭޅި ހިތްވަރު ދެއެވެ.