ޖަރުމަނުވިލާތުގައި ދުވާލެއްގެ މައްޗަށް ކޮވިޑް ޖެހޭ މީހުންގެ އަދަދު ފުރަތަމަ ފަހަރަށް ދެ ލައްކައިން މައްޗަށް

ޖަރުމަނުވިލާތުގައި ދުވާލެއްގެ މައްޗަށް ކޮވިޑް-19 ޖެހޭ މީހުންގެ އަދަދު ފުރަތަމަ ފަހަރަށް ދެ ލައްކައިން މައްޗަށް ޖެހިލައިފިއެވެ.

މިއާއެކު ބޮޑެތި ކުންފުނިތަކަށް ވަނީ ސްޓާފުންގެ ދަތިތަކާ ކުރިމަތިލާން ޖެހިފައެވެ. ޖަރުމަނުވިލާތުގެ އިންސްޓިޓިއުޓް ފޮރ އިންފެކްޝިއަސް ޑިޒީސް އިން ރިޕޯޓްކޮށްފައިވާ ގޮތުގައި ފާއިތުވި 24 ގަޑިއިރު ޖަރުމަނުން 203،136 މީހުންނަށް ކޮވިޑް ޖެހިފައިވެއެވެ. އެއީ މީގެ ހަފްތާއެއް ކުރިއާ އަޅާބަލާއިރު 69،600 ކޭސް އިތުރު އަދަދެކެވެ.

ނަމަވެސް ހޮސްޕިޓަލްތަކަށް އަދި ބާރު ބޮޑުނުވާކަމަށް އެޤައުމުން ބުނެއެވެ. އެހެންނަމަވެސް ކުރިޔަށް އޮތް ހަފްތާތަކުގައި އެހާލަތު ބަދަލުވެގެންދާނެ ކަމަށް އެސޯސިއޭޝަން އޮފް އެމަރޖެންސީ އެންޑް އިންޓެންސިވް ކެއަރ ޑޮކްޓަރުންގެ ފަރާތުން ވަނީ ބުނެފައެވެ. އެ އެސޯސިއޭޝަނުން ބުނެފައިވަނީ ދުވާލެއްގެ މައްޗަށް ފެންނަ ކޭސްތަކުގެ އަދަދު ތިން ލައްކައިން މައްޗަށް އަރައިފިނަމަ ޖަރުމަނުވިލާތުގެ ސިއްޙީ ނިޒާމަށް ބޮޑެތި ގޮންޖެހުންތަކާއި ކުރިމަތިލާން ޖެހޭނެއެވެ.

ޖަރުމަނުވިލާތުގެ ހެލްތު މިނިސްޓަރު ވަނީ ފެބްރުއަރީ މަހުގެ މެދުތެރޭގައި ދުވާލެއްގެ މައްޗަށް ފެންނަ ކޭސްތައް ހަތަރު ލައްކައަށް އަރާނެކަމަށް އަންދާޒާކުރައްވާފައެވެ.

ކޭސްތަކުގެ އަދަދު މައްޗަށްދާއިރު ބައެއް ހޮސްޕިޓަލްތަކުގައި މަސައްކަތްކުރާ ގިނަ އަދަދެއްގެ ސްޓާފުންވެސް އަންނަނީ ބަލިވަމުންނެވެ. އެގޮތުން ބައެއް ހޮސްޕިޓަލްތަކުގެ ތިންބައިކުޅަ އެއްބައި ސްޓާފުން ބަލިވެގެން ރިޕޯޓްކޮށްފައިވާކަމަށް ޖަރމަން ހޮސްޕިޓަލް ފެޑެރޭޝަނުން ބުނެއެވެ.

އެޤައުމުގެ ޤާނޫނު ހަދާ މަޖިލީހުގައި ވަނީ ކޮވިޑް-19 ވެކްސިން ޖެހުން މަޖުބޫރުކުރުމާމެދު ބަހުސްކޮށްފައެވެ. އެކަމާއި ދެކޮޅަށް އޭރު ޤާނޫނު ހަދާ މަޖިލީސް ކައިރީގައި ދިޔައީ މުޒާހަރާކުރަމުންނެވެ.

އެއީ ޖަރުމަނުވިލާތުގެ ޤާނޫނުއަސާސީ އާއި ޚިލާފުކަމެއްކަމަށް ބުނެ ބައެއް މެމްބަރުންވަނީ ވެކްސިން ޖެހުން މަޖުބޫރުކުރުމާ ދެކޮޅު ހައްދަވާފައެވެ.