ކުރިޔަށް އޮތް ވިންޓަރ އޮލިމްޕިކްސް އާއި ދިމާކޮށް ޗައިނާގެ ވެރިރަށް ބެއިޖިންގ ގައި ކޮވިޑް-19 ފެތުރުން ކޮންޓްރޯލްކުރުމުގެ ގޮތުން ބެއިޖިންގ ގެ އެތެރޭގައި މީހުންނަށް އެއްތަނުން އަނެއްތަނަށް ދަތުރުކުރުމުގައި ކޮންޓްރޯލްތަކެއް ގެންގުޅެން ފަށައިފިއެވެ.

ބުރާސްފަތި ދުވަހު ބެއިޖިންގ އިން ފެނިފައިވާ ކޭސްތަކުގެ އަދަދު މަދުނަމަވެސް ފިޔަވަޅުތައް ވަރުގަދަކުރަން ނިންމާފައިމިވަނީ ކޮވިޑް ފެތުރުން މިހާރަށްވުރެވެސް ބޮޑަށް ކޮންޓްރޯލް ކުރުމުގެ ގޮތުންނެވެ. އެގޮތުން ބެއިޖިންގ ގެ ފެންގތާއީ ޑިސްޓްރިކްޓުގައި ދިރިއުޅޭ މީހުން ޒަރޫރީ ބޭނުމެއްގައި ނޫނީ އެމީހަކު އުޅޭ ސަރަހައްދުން އެހެން ސަރަހައްދަކަށް ނުދިޔުމަށް ވަނީ އަންގާފައެވެ. އަދި ކޮންމެ ދުވަހަކުވެސް ކޮވިޑް ޓެސްޓްކުރަން ޖެހޭ ގޮތަށް ވަނީ ހަމަޖައްސާފައެވެ.

އެޑިސްޓްރިކްޓަކީ ބެއިޖިންގ އިން މިހާރު ފެންނަމުންދާ ކޭސްތައް އެންމެ ގިނައިން ފެންނަމުންދާ ޑިސްޓްރިކްޓެވެ. އެއާއެކު އެޑިސްޓްރިކްގެ ބައެއް ސަރަހައްދުތައް ވަނީ ލޮކްޑައުންވެސްކޮށްފައެވެ.

ބެއިޖިންގ އިން ބުދަ ދުވަހު ފެނިފައިވަނީ ކޮވިޑްގެ 5 ކޭހެކެވެ. އެއީ އޭގެކުރީ ދުވަހާ އަޅާބަލާއިރު 14 ކޭސްގެ މަދުވުމެއްކަމަށް އެގައުމުގެ ނޭޝަނަލް ހެލްތު ކޮމިޝަން (އެންއެޗްސީ)ން ބުނެއެވެ.

ދުނިޔޭގެ އެހެން ގައުމުތަކާއި އަޅާބަލާއިރު ޗައިނާއިން ފެންނަ ކޭސްތަކުގެ އަދަދު މަދުނަމަވެސް ޗައިނާ ފާހަގަވަނީ ބޮޑެތި ފިޔަވަޅުތަކެއް އަދިވެސް އަޅަމުން އަންނަ ޤައުމެއްގެ ގޮތުގައެވެ. އެގޮތުން ކޭސްތައް ފެންނަ ހިސާބުތައް ލޮކްޑައުންކުރުމަށްފަހު އެސަރަހައްދުގައި އުޅޭ މީހުން ޓެސްޓްކުރުމަކީ ޗައިނާއިން މިހާރުވެސް ކުރަމުން އަންނަ ކަމެކެވެ.

ވަކިން ޚާއްސަކޮށް ކުރިޔަށް އޮތް އޮލިމްޕިކްސް ގޭމް އާއި ދިމާކޮށް ގިނަ ބަޔަކު ޗައިނާއަށް ދާނެތީ ކޭސްތައް ކޮންޓްރޯލްކުރުމަށް އަޅާ ފިޔަވަޅުތައް ވަނީ ވަރުގަދަކޮށްފައެވެ.

އޮލިމްޕިކް ގޭމްސް އިންތިޒާމުކުރާ ފަރާތުން ބުނެފައިވަނީ ޖެނުއަރީ މަހުގެ 26 ވަނަ ދުވަހު ގޭމްއާ ގުޅުންހުރި 23 މީހަކު ކޮވިޑަށް ޕޮޒިޓިވްވެފައިވާކަމަށެވެ.

ޖެނުއަރީ މަހުގެ 15 ވަނަ ދުވަހުގެ ފަހުން ބެއިޖިންގ އިން 60 ކޭސް ފެނިފައިވެއެވެ. ބެއިޖިންގ ގެ އޮފިޝަލުން ބުނެފައިވަނީ މީގެތެރެއިން ގިނަ ކޭސްތަކަކީ ޑެލްޓާ ވޭރިއަންޓްގެ ކޭސްތައް ކަމަށެވެ. ނަމަވެސް ވަރަށް މަދުން އޮމިކްރޯން ވޭރިއަންޓްގެ ކޭސްތައް ފެނިފައިވާކަމަށް ވަނީ ބުނެފައެވެ.

ޗައިނާގެ އަށް ޕްރޮވިންސަކުން ވަނީ އޮމިކްރޯން ވޭރިއަންޓް ފެނިފައެވެ. ނަމަވެސް ފެނިފައިވަނީ އޮމިކްރޯން ވޭރިއަންޓްގެ ކިތައް ކޭސްކަމެއް ޗައިނާއިން ހާމައެއްނުކުރެއެވެ.

ކޮވިޑް ޕެންޑަމިކް ފެށުނު ފަހުން ޗައިނާގެ ބޯޑަރު ވަނީ ގިނަ ބަޔަކަށް ބަންދުކޮށްފައެވެ. އަދި ޗައިނާއަށް އެތެރެވާ މީހުން ދެ ހަފްތާގެ ކަރަންޓީނުގެ މުއްދަތެއް ފުރިހަމަ ކުރަންޖެހެއެވެ.

ޗައިނާގެ އިމިގްރޭޝަން އޮފިޝަލުން ބުނާ ގޮތުގައި 2021 ވަނަ އަހަރު ޗައިނާއަށް އެތެރެވި އަދި ޗައިނާއިން ބޭރުވި މީހުންގެ ނިސްބަތް އޭގެކުރީ އަހަރާއި އަޅާބަލާއިރު ވަނީ 65.9 އިންސައްތަ ދަށަށްގޮސްފައެވެ.