ސިނަމާލެ ބްރިޖް ޕާކިންގ ޒޯންގައި ކޮވިޑަށް ޓެސްޓްކުރާ ސެންޓަރެއް
ހުޅުމާލެ ފޭސް 2 ގެ އެޗް8 ޓަވަރުންވެސް ސާމްޕަލް ނަގައިދޭ
ކޮވިޑް ސާމްޕަލް ނެގުމަށް ހުޅުމާލެ ރުއްގަނޑުގައި ހަދާފައިވާ ތަން
ސިނަމާލެ ބްރިޖް ޕާކިންގ ޒޯންގައި ބުދަ ދުވަހުން ފެށިގެން ކޮވިޑަށް ޓެސްޓްކުރުމަށް ސެންޓަރެއް ހުޅުވާފައި ހުންނާނެކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ން ބުނެފިއެވެ.
އެޗްޕީއޭއިން ބުނީ އެތަނުން ކޮންމެ ހޮނިހިރު ދުވަހަކުން ފެށިގެން ބުރާސްފަތި ދުވަހާއި ހަމައަށް ހެނދުނު 9ން މެންދުރު 12ށް އަދި މެންދުރުފަހު 3ން އިރުއޮއްސި 6ށް ސާމްޕަލް ނަގައި ދޭނެކަމަށެވެ. މީގެއިތުރުން ހުކުރު ދުވަހު މެންދުރުފަހު 3ން އިރުއޮއްސި 6ށް ސާމްޕަލް ނަގައިދެމުންދާނެކަމަށް އެޗްޕީއޭއިން ބުނެއެވެ.
ރާއްޖޭގައި މިވަގުތު ކޮވިޑް-19ގެ ނަންބަރުތައް ރިކޯޑް މިންވަރަކަށް އިތުރުވަމުން އަންނައިރު އެޗްޕީއޭއިން އަންނަނީ ސާމްޕަލް ނެގުމަށް އިތުރު ސެންޓަރުތައް ގާއިމުކުރަމުންނެވެ. އެގޮތުން މިހާރު ހުޅުމާލެ ފޭސް 2 ގައި ދިރިއުޅޭ ފަރާތްތަކަށް ޚާއްސަކޮށްގެން ހިޔާ ފްލެޓްގެ "އެޗް8" ޓަވަރުގައި ކޮވިޑަށް ޓެސްޓްކުރުމުގެ ސެންޓަރެއްވެސް ވަނީ ގާއިމުކޮށްފައެވެ. އެޗްޕީއޭއިން ބުނީ އެތަނުން ކޮންމެ ދުވަހަކު މެންދުރުފަހު 3:30ން ފެށިގެން އިރުއޮއްސި 6:30ން ވަންދެން ޚިދުމަތް ދެމުންގެންދާނެކަމަށެވެ.
މީގެއިތުރުން ހުޅުމާލެ ރުއްގަނޑު 1 ގައި ހަދާފައިވާ ސެންޓަރުންވެސް ކޮވިޑަށް ޓެސްޓްކުރެވޭނެއެވެ. އެތަން ކޮންމެ ހޮނިހިރު ދުވަހަކުން ބުރާސްފަތި ދުވަހެއްގެ ހެނދުނު 9:30ން 12:30ށް އަދި މެންދުރު ފަހު 3:30ން އިރުއޮއްސި 6:30ށް ހުޅުވާފައި ހުންނައިރު ކޮންމެ ހުކުރު ދުވަހެއްގައި މެންދުރުފަހު 3:45ން އިރުއޮއްސި 6:45ށް އެތަނުން ސާމްޕަލް ނަގައިދޭނެއެވެ.
މީގެއިތުރުން މާލެއިން ސޯޝަލް ސެންޓަރުން ކޮންމެ ހޮނިހިރު ދުވަހަކުން ބުރާސްފަތި ދުވަހެއްގެ ހެނދުނު 9:00ން 12:00ށް އަދި މެންދުރު ފަހު 3:00ން އިރުއޮއްސި 6:00ށް އަދި ކޮންމެ ހުކުރު ދުވަހެއްގައި މެންދުރުފަހު 3:00ން އިރުއޮއްސި 6:00ށް ސާމްޕަލް ނަގައިދޭނެއެވެ. އަދި ހެންވޭރު ފުޓްބޯޅަ ދަނޑުން ކޮންމެ ދުވަހަކު މެންދުރުފަހު 3:30ން ފެށިގެން އިރުއޮއްސި 6:30ށް ސާމްޕަލް ނަގައިދެމުންދާނެއެވެ.
ކޮވިޑަށް ޓެސްޓްކުރުމަށް ޕީސީއާރު ޓެސްޓް ހެދުމުގެ އިތުރުން ކޮވިޑް ޖެހިފައިވޭތޯ ބެލުމަށް ހަދާ، އެންމެ އަވަހަށް ނަތީޖާ ލިބޭ ރެޕިޑް އެންޓިޖެން ޓެސްޓް ވެސް އެޗްޕީއޭގެ ކޮވިޑަށް ޓެސްޓުކުރާ ސެންޓަރުތަކުގައި މިދިޔަ އާދިއްތަ ދުވަހުން ފެށިގެން ވަނީ ހަދައިދޭން ފަށާފައެވެ. އެކަމަކު އެ ޓެސްޓް ހަދާނީ ބަލީގެ އަލާމާތް ހުންނަ މީހުންގެއެވެ.
