ލިންގާޑް ހޯދަން ނިއުކާސަލުން މަސައްކަތްކުރަނީ

މެންޗެސްޓާ ޔުނައިޓެޑަށް ކުޅެމުން އަންނަ އިންގްލެންޑުގެ މިޑްފީލްޑަރު ޖެސޭ ލިންގާޑް ހޯދަން ނިއުކާސަލް ޔުނައިޓެޑުން މަސައްކަތްކުރަމުން އަންނަ ކަމަށް ރިޕޯޓުތައް ބުނެފިއެވެ.

އުމުރުން 29 އަހަރުގެ ލިންގާޑް ޔުނައިޓެޑާއެކު މިހާރު ހަދާފައި އޮތް އެއްބަސްވުން މި ސީޒަން ނިމުމުން ހަމަވާނެއެވެ. އެއާއެކު ލިންގާޑުގެ އެއްބަސްވުން އާކުރުމުގެ މަޝްވަރާތައް ޔުނައިޓެޑުން ފެށި ނަމަވެސް، އިނގިރޭސި މީޑިއާ ރިޕޯޓުތައް ބުނާ ގޮތުން ޔުނައިޓެޑުން ފުރުސަތު ލިބުން މަދުވުމާއެކު، ކުލަބު ބަދަލުކުރަން ލިންގާޑް ބޭނުންވެއެވެ. އެހެންކަމުން ޔުނައިޓެޑުގެ އެއްބަސްވުން އާކުރަން އޭނާ ދެކޮޅު ހަދާފައިވާ ކަމަށްވެސް ރިޕޯޓުތައް ބުނެއެވެ.

އެއާއެކު ލިންގާޑް ހޯދަން އިނގިރޭސި ގިނަ ކުލަބުތަކުން މަސައްކަތްކުރަމުން އަންނައިރު، ރިޕޯޓުތައް ބުނާ ގޮތުން ލިންގާޑް ހޯދަން ނިއުކާސަލުން މިހާރު ވަނީ ޝައުގުވެރިކަން ފާޅުކޮށްފައެވެ. އަދި މި ފަހަރުގެ ޓްރާންސްފާ ބާޒާރު ބަންދުވުމުގެ ކުރިން ލިންގާޑް ހޯދަން ނިއުކާސަލުން ބޭނުންވާ ކަމަށާއި، އަދި ޔުނައިޓެޑާއެކު ލިންގާޑް މިހާރު ހަދާފައި އޮތް އެއްބަސްވުން މި ސީޒަން ނިމުމުން ހަމަވާނެތީ، އޭނާ ގެންދަން ނިއުކާސަލުން މަސައްކަތްކުރަނީ ލޯނު އެއްބަސްވުމެއްގެ ދަށުން ކަމަށްވެސް ރިޕޯޓުތައް ބުނެއެވެ.

މި ވަގުތު ދުނިޔޭގެ އެންމެ މުއްސަނދި ކުލަބުގެ ގޮތުގައި އޮތް ނިއުކާސަލަށް މި ޓްރާންސްފާ ބާޒާރުގައި 200 މިލިޔަން ޕައުންޑް ޚަރަދުކުރެވޭއިރު، އެ ޓީމުން ދާދި ފަހުން ވަނީ ސްޕެއިނުގެ އެތުލެޓިކޯ މެޑްރިޑަށް ކުޅެމުން އައި އިންގްލެންޑުގެ ޑިފެންޑަރު ކިއެރަން ޓްރިޕިއާގެ ސޮއި ހޯދާފައެވެ. މިއީ ސައުދީ އަރަބިއްޔާގެ ވަލީއަހުދު މުޙައްމަދު ބިން ސަލްމާނުގެ ހިއްސާއާއެކު ސައުދީގެ ޕަބްލިކް އިންވެސްޓްމަންޓް ފަންޑް (ޕީއައިއެފް) އިން ނިއުކާސަލް ގަތް ފަހުން އެ ޓީމުން ކުރި ފުރަތަމަ ޓްރާންސްފާއެވެ.

ލިންގާޑް ހޯދަން ނިއުކާސަލުން މަސައްކަތްކުރަމުން އަންނައިރު، މިދިޔަ އަހަރުގެ ފިނި މޫސުމުގެ ޓްރާންސްފާ ބާޒާރުގައި އޭނާ ވަނީ ލޯނު އެއްބަސްވުމެއްގެ ދަށުން ވެސްޓް ހޭމް ޔުނައިޓެޑަށް ބަދަލުވެ، އެ ޓީމުގައި ތަފާތު މޮޅު ކުޅުމެއް ދައްކާފައެވެ. އެގޮތުން ވެސްޓް ހޭމަށް ކުޅެދިން 16 މެޗުގައި ލިންގާޑް ވަނީ ނުވަ ލަނޑު ޖަހާފައެވެ.

އޭގެ ފަހުން މި ސީޒަނަށް ލިންގާޑް އަލުން ޔުނައިޓެޑާ ގުޅުނު ނަމަވެސް، މި ފަހަކަށް އައިސް ޔުނައިޓެޑުގެ ފުރަތަމަ އެގާރައިން ލިންގާޑަށް ފުރުސަތު ލިބުން ވަނީ މަދުވެފައެވެ. އެކަމަކު އޭނާ ވަނީ މިހާތަނަށް އެ ޓީމަށް ކުޅެދިން 224 މެޗުގައި 35 ލަނޑު ޖަހާފައެވެ. އަދި މީގެ ކުރިން އޭނާ ވަނީ ޔުނައިޓެޑާއެކު އެފްއޭ ކަޕާއި، އިނގިރޭސި ލީގު ކަޕާއި، އެފްއޭ ކޮމިއުނިޓީ ޝީލްޑުގެ އިތުރުން ޔުއެފާ ޔޫރޮޕާ ލީގު ކާމިޔާބުކޮށްފައެވެ.