މިވަގުތު މޮނިޓަރިންގައި 27 ރަށެއް

ކޮވިޑް-19ގެ ހާލަތާއި ގުޅިގެން މިވަގުތު 27 ރަށެއް މޮނިޓަރިންގ ގައި އޮތްކަމަށް ހެލްތު ޕްރޮޓެކްޝަން އެޖެންސީ (އެޗްޕީއޭ)ން ބުނެފިއެވެ.

އެޗްޕީއޭއިން އެންމެފަހުން އާންމުކޮށްފައިވާ ތަފާސްހިސާބުތަކަށް ބަލާއިރު އެންމެ ގިނަ ދުވަސްވަންދެން މޮނިޓަރިންގ ގައި އޮތް ދެ ރަށަކީ ކ.މާފުއްޓާއި ހއ އިހަވަންދޫއެވެ. މި ދެ ރަށް މޮނިޓަރިންގ އަށް ލާފައިވަނީ މިދިޔަ ޑިސެމްބަރ މަހުގެ 31 ވަނަ ދުވަހުއެވެ. ބާކީ 25 ރަށް މޮނިޓަރިންގ އަށް ލާފައިވަނީ ހިނގަމުންދާ ޖެނުއަރީ މަހުގެ ތެރޭގައެވެ. އެގޮތުން މިހާރު މޮނިޓަރިންގ ގައި ހުރި ރަށްތަކަށް ބަލާލާއިރު ޖެނުއަރީ މަހުގެ 9 ވަނަ ދުވަހު ހދ. ނޮޅިވަރަމްފަރު މޮނިޓަރިންގ އަށް ލާފައިވާއިރު ޖެނުއަރީ މަހުގެ 14 ވަނަ ދުވަހު ށ.ފުނަދޫ، ބ.ދަރަވަންދޫ އަދި ދ.ބަނޑިދޫ އާއި ލ.ގަން ވަނީ މޮނިޓަރިންގ އަށް ގެނެސްފައެވެ. ޖެނުއަރީ މަހުގެ 16 ވަނަ ދުވަހު މޮނިޓަރިންގ އަށް ލާފައިވާ ރ.އުނގޫފާރާއި ގދ ގައްދޫގެ އިތުރުން ހދ ހަނިމާދޫ އަދިވެސް އޮތީ މޮނިޓަރިންގ ގެ ހާލަތުގައެވެ.

ޖެނުއަރީ މަހުގެ 19 ވަނަ ދުވަހު ކ.ގުރައިދޫ އާއި ބ. އޭދަފުށި ވަނީ މޮނިޓަރިންގ ގެ ހާލަތަށް ގެނެސްފައެވެ. ޖެނުއަރީ މަހުގެ 20 ވަނަ ދުވަހު ހއ.ދިއްދޫ މޮނިޓަރިންގ އަށް ލިއިރު 21 ވަނަ ދުވަހު ތ.ގުރައިދޫ ވަނީ މޮނިޓަރިންގ ގެ ހާލަތަށް ގެނެސްފައެވެ. ޖެނުއަރީ މަހުގެ 22 ވަނަ ދުވަހު 6 ރަށެއް މޮނިޓަރިންގ އަށް ލާފައިވެއެވެ. އެއީ ބ.ގޮއިދޫ، ޅ.ކުރެންދޫ، ހދ.ކުޅުދުއްފުށި، ލ.ދަނބިދޫ، ލ.ހިތަދޫ، ށ.ކަނޑިތީމު އަދި ވ.ކެޔޮދޫއެވެ.

23 ވަނަ ދުވަހު ނ.ކުޑަފަރި އަދި ގދ.ތިނަދޫ ވަނީ މޮނިޓަރިންގ އަށް ލާފައެވެ. 24 ވަނަ ދުވަހު 4 ރަށެއް މޮނިޓަރިންގ ގެ ހާލަތަށް ގެނެސްފައިވެއެވެ. އެއީ ގދ.މަޑަވެލި، އދ.މަހިބަދޫ، ދ.ކުޑަހުވަދޫ އަދި ދ.ހުޅުދެލިއެވެ.

ރަށްރަށަށް ބަލާލާއިރު އެންމެ ގިނަ ކޭސްތައް ރިޕޯޓްކުރަމުން އަންނަ ރަށްތަކުގެ ތެރޭގައި ހދ ކުޅުދުއްފުށި، ކ.ގުރައިދޫ، ފުވައްމުލައް ސިޓީ އަދި އައްޑޫސިޓީގެ ރަށްތައް ހިމެނެއެވެ. އެގޮތުން ކުޅުދުއްފުށީގައި 177 މީހުންނަށް ކޮވިޑް ޖެހިފައިވާއިރު ގުރައިދޫގައި 120 މީހުންނަށް ވަނީ ކޮވިޑް ޖެހިގެން ރިޕޯޓްކޮށްފައެވެ. ފުވައްމުލަކު ސިޓީން 192 މީހުންނަށް ކޮވިޑް ޖެހިގެން ރިޕޯޓްކޮށްފައިވާއިރު އައްޑޫ ސިޓީގެ ހިތަދޫން 244 މީހުން ވަނީ ކޮވިޑަށް ޕޮޒިޓިވްވެފައެވެ. މިއީ އެއް ރަށަކުން މިވަގުތު އެންމެ ގިނަ މީހުންނަށް ކޮވިޑް ޖެހިގެން ރިޕޯޓްކުރަމުން އަންނަ ރަށްވެސްމެއެވެ. އައްޑޫ ސިޓީ ފޭދޫގައި 152 މީހުން ކޮވިޑަށް ޕޮޒިޓިވްވެފައިވާއިރު އައްޑޫ ސިޓީ ހުޅުމީދޫން 164 މީހުން ވަނީ ޕޮޒިޓިވްވެފައިވެއެވެ. ރަށްރަށުން ޕޮޒިޓިވްވެފައިވާ ދިވެހިންގެ އަދަދު މިވަގުތު ހުރީ 2819ގައެވެ. ރަށްރަށުން ޕޮޒިޓިވްވެފައިވާ ބޭރު މީހުންގެ އަދަދު ހުރީ 231ގައެވެ.

ރާއްޖޭގައި މިވަގުތު އެކްޓިވް ކޭހުގެ ގޮތުގައި ގުނަމުން އަންނަނީ 15،721 ކޭހެވެ.