ޖަރުމަން ލީގުގައި އާދީއްތަ ދުވަހުގެރޭ ކުޅުނު މެޗުން ހާތާ ބާލިން އަތުން ފަސޭހަކަމާއެކު އެންމެ ފަހުގެ ޗެމްޕިއަން ބަޔާން މިއުނިކް މޮޅުވެއްޖެއެވެ.

ރަށުން ބޭރުގައި ކުޅުނު މެޗުން ބަޔާން މޮޅުވީ 4-1 ގެ ނަތީޖާއަކުންނެވެ.

މި މެޗު ފަށައިގެން ބަޔާނުން މޮޅު ކުޅުމެއް ދެއްކިއިރު، މެޗުގެ ފުރަތަމަ ހާފުގައި އެ ޓީމުން ވަނީ ދެ ލަނޑުގެ ލީޑެއް ނަގާފައެވެ. އެގޮތުން މެޗުގެ 25 ވަނަ މިނެޓުގައި ކިންގްސްލީ ކޯމަން ނަގައިދިން ހުރަހަކުން ކޮރެންޓިން ޓޮލީސޯ ވަނީ ލަނޑެއް ޖަހައި، ބަޔާނަށް ލީޑު ނަގައިދީފައެވެ. އަދި ފުރަތަމަ ހާފުގެ ފަހު މިނެޓުގައި ޖޯޝުއާ ކިމިކް ހުރަސްކޮށްދިން ބޯޅައަކުން ތޯމަސް މުލާ ވަނީ ލަނޑެއް ޖަހައި، ބަޔާނުގެ ލީޑު ފުޅާކޮށްދީފައެވެ.

މި މެޗުގެ ދެވަނަ ހާފުގައިވެސް ބަޔާނުން ރަނގަޅު ކުޅުމެއް ދެއްކިއިރު، މެޗުގެ 75 ވަނަ މިނެޓުގައި ހާތާ ބާލިންގެ ގޯލްކީޕަރު އަލެކްސަންޑަ ޝްވޮލޯ ހެދި ގޯހެއްގެ ފައިދާ ނަގައި، ލެރޯއި ސާނޭ ވަނީ ބަޔާނުގެ ތިންވަނަ ލަނޑު ޖަހައިދީފައެވެ. އަދި އޭގެ ހަތަރު މިނެޓު ފަހުން ބަޔާނުގެ ހަތަރުވަނަ ލަނޑު ޖަހައިދިނީ ސާޖް ގްނާބްރީއެވެ. އެކަމަކު އޭގެ މިނެޓެއް ފަހުން ހާތާ ބާލިންއިން ވަނީ މި މެޗުގައި ޖެހި ހަމައެކަނި ލަނޑު ކާމިޔާބުކޮށްފައެވެ. ބަޔާނުގެ ޑިފެންޑަރުން ހެދި ގޯހެއްގެ ފައިދާ ނަގައި މި ލަނޑު އެ ޓީމަށް ކާމިޔާބުކޮށްދިނީ ޔާގެން އެކެލެންކަމްޕެވެ.

މި މޮޅާއެކު ތާވަލުގެ އެއްވަނައިގައި ބަޔާނުން އަލުން ހަ ޕޮއިންޓުގެ ލީޑެއް ނެގިއިރު، އެ ޓީމަށް ވަނީ ކުޅުނު 20 މެޗުން 49 ޕޮއިންޓް ލިބިފައެވެ. ދެވަނައިގައި އޮތް ބޮރޫޝިއާ ޑޯޓްމުންޑަށް 20 މެޗުން ލިބިފައިވަނީ 43 ޕޮއިންޓެވެ. އަދި ބަޔާން އަތުން ބަލިވި ހާތާ ބާލިން އޮތީ ތާވަލުގެ 13 ވަނައިގައި 20 މެޗުން 22 ޕޮއިންޓާއެކުއެވެ.