ކޯޓުތަކުގެ ފަނޑިޔާރުންނާއި މުވައްޒަފުން ޕޮޒިޓިވްވާ މިންވަރަށް ބަލައި، ފިޔަވަޅު އެޅުއްވުމުގެ ބާރު އިސް ފަނޑިޔާރަށް

ކޯޓުތަކުގެ ފަނޑިޔާރުންނާއި މުވައްޒަފުން ޕޮޒިޓިވްވާ މިންވަރަށް ބަލައި އެކަމާއި ގުޅިގެން އަޅަން ޖެހޭ ފިޔަވަޅުތައް އެޅުއްވުމުގެ ބާރު އިސް ފަނޑިޔާރަށް ލިބިގެންވާކަމަށް ބަޔާންކޮށް، ސިއްޙީ ކުއްލި ނުރައްކަލުގެ ޙާލަތަށް ބަލައި ޝަރުއީ ކޯޓުތަކުން އަމަލުކުރާނެ ގޮތުގެ އުސޫލު އާންމުކޮށްފިއެވެ.

ޑިޕާޓްމަންޓް އޮފް ޖުޑީޝަލް އެޑްމިނިސްޓްރޭޝަން (ޑީޖޭއޭ) އިން ވަނީ އެ އުސޫލު އާންމުކޮށް، ހޯމަ ދުވަހުން ފެށިގެން އެއަށް އަމަލުކުރުމަށް އަންގާފައެވެ.

އުސޫލުގައި ބުނެފައިވާ ގޮތުން، ސިއްޙީ ކުއްލި ނުރައްކަލުގެ ޙާލަތަށް އަންނަ ބަދަލުތަކަށް ބަލައި، ޚިދުމަތްތައް މެދުނުކެނޑި ފޯރުކޮށްދެވޭނެ ގޮތަށް ކުރީބައިގައި އިންތިޒާމުތައް ރާވަން ޖެހެއެވެ. އެގޮތުން ސަރުކާރުގެ ކަމާބެހޭ ފަރާތްތަކުން އަޅަމުންދާ ފިޔަވަޅުތަކާއި، ކޯޓުތަކުގެ ފަނޑިޔާރުންނާއި މުވައްޒަފުން ޕޮޒިޓިވްވާ މިންވަރަށް ރިއާޔަތްކޮށް ފިޔަވަޅުތައް އަޅުއްވާނީ އެ ކޯޓެއްގެ އިސް ފަނޑިޔާރުކަމަށް ވަނީ ބަޔާންކޮށްފައެވެ. އަދި މުޖުތަމައުގައި ބަލި ފެތުރޭ މިންވަރާއި، ކޯޓުތަކުގެ ޚިދުމަތްތައް ދޭ ގޮތުން ބަލި ފެތުރިގެން ދިއުމަށް އޮތް ފުރުސަތުތަކާއި، ކޯޓުތަކުގެ ޚިދުމަތްތަކަށް ބުރޫ އަރާފާނެ ނިސްބަތަށް ބަލައި އެކަމާއި ގުޅިގެން އަޅަން ޖެހޭ ފިޔަވަޅުތައް އެ ކޯޓެއްގެ އިސްފަނޑިޔާރަށް އެޅުއްވިދާނެއެވެ.

މީގެއިތުރުން، ޙާލަތަށް ރިއާޔަތްކޮށް އެޅިދާނެ ފިޔަވަޅުތައްވެސް އުސޫލުގައި ވަނީ ބަޔާންކޮށްފައެވެ. އެގޮތުން ޤާނޫނުތަކާއި ޤަވާއިދުތަކާއި، ސުޕްރީމް ކޯޓުގެ އެންގުންތަކާ ޚިލާފުނުވާ ގޮތެއްގެ މަތިން ޚިދުމަތްތައް އޮންލައިންކޮށް ހަމަޖެއްސުމުގެ ކަންކަން ކުރެވިދާނެކަމަށް އުސޫލުގައި ބުނެއެވެ. އަދި ކޯޓުތަކުގެ އެކި ފަންކްޝަންތައް އެވަގުތަކަށް އެކަށީގެންވާ ގޮތެއްގެ މަތިން ގޭގައި ތިބެގެން ހިންގޭ ގޮތަށް މުވައްޒަފުންގެ މަސައްކަތުގެ ތާވަލު ހަމަޖެއްސުންވެސް ހިމެނެއެވެ. މުވައްޒަފުން ގޭގައި މަސައްކަތްކުރާ ގޮތަށް ހަމަޖެއްސި ނަމަވެސް މުވައްޒަފުންގެ މަސައްކަތްތައް ސުޕަވައިޒް ކުރުމާއި، ޖަވާބުދާރީ ކުރުވުމުގެ ކަންކަން ކުރިއަށްދާން ޖެހެއެވެ.

އަދި ޚިދުމަތްތައް ފޯރުކޮށްދޭ ގޮތާއިމެދު ގެނެވޭ ބަދަލުތަކުގެ ސަބަބުން ޑޭޓާ މެނޭޖްމަންޓަށް އަސަރުކޮށްފާނެ މިންވަރު ބަލައި، އެކަށީގެންވާ ރައްކާތެރިކަމުގެ ފިޔަވަޅުތައް ކޯޓުތަކުން އަޅަންޖެހޭކަމަށްވެސް ބަޔާން ކުރެއެވެ.

ރައްކާތެރިކަމުގެ ގޮތުން އެ ކޯޓެއްގެ އިސްގާޒީ އަޅުއްވާ ފިޔަވަޅުތައް އެ ފިޔަވަޅެއް އަޅުއްވަން ނިންމެވިތާ 3 ދުވަހުގެ ތެރޭގައި ޑީޖޭއޭއަށް އަންގަންވެސް ޖެހެއެވެ. އަދި ބަލި ފެތުރުން ކޮންޓްރޯލް ކުރުމަށް އަޅަންޖެހޭ ފިޔަވަޅުތަކަށް ސަމާލުކަން ދިނުމާއި، ކޯޓުތަކުގެ ސާފުތާހިރުކަމަށް ސަމާލުކަންދީ، ކޯޓުތަކުގެ މުވައްޒަފުންނަކީވެސް އެ ބަދަލުތައް ހޭނި، ޚިދުމަތްތައް އެންމެ ފުރިހަމައަށް ދިނުމަށް ތައްޔާރަށް ތިބޭ ބަޔަކަށް ހަދައި، އެ ސަޤާފަތް އާލާ ކުރުމަށްވެސް އުސޫލުގައި ހަނދާން ކޮށްދީފައިވެއެވެ.