އިޓާލިއަން ލީގުގައި ހޮނިހިރު ދުވަހުގެރޭ ފަހު ވަގުތު އެޑިން ޒެކޯ ޖަހައިދިން ލަނޑާއެކު ވެނެޒިއާ އަތުން ޗެމްޕިއަން އިންޓަ މިލާން މޮޅުވެއްޖެއެވެ.

އަމިއްލަ ދަނޑުގައި ކުޅުނު މެޗުން އިންޓަ މޮޅުވީ ފަހަތުން އަރައި 2-1 ގެ ނަތީޖާއަކުންނެވެ.

މި މެޗު ފަށައިގެން އިންޓަގެ ޒެކޯއަށް ރަނގަޅު ފުރުސަތެއް ލިބުނު ނަމަވެސް، އޭނާ ފޮނުވާލި ބޯޅަ ވެނެޒިއާގެ ގޯލްކީޕަރު ލޫކާ ލެއްޒެރީނީ ވަނީ ދިފާއުކޮށްފައެވެ. އެއާއެކު މި މެޗުގައި އެންމެ ފުރަތަމަ ލަނޑު ޖަހައި ލީޑު ނެގީ ވެނެޒިއާއިންނެވެ. މެޗުގެ 19 ވަނަ މިނެޓުގައި އީތަން އަމްޕާޑޫ ނަގައިދިން ހުރަހަކުން މި ލަނޑު އެ ޓީމަށް ކާމިޔާބުކޮށްދިނީ ތޯމަސް އޮންރީއެވެ.

އެކަމަކު ފުރަތަމަ ހާފު ނިމުމުގެ ކުރިން އިންޓައިން ވަނީ ނަތީޖާ އެއްވަރުކޮށްފައެވެ. މި ހާފު ނިމެން ފަސް މިނެޓަށް ވެފައި ވަނިކޮށް އޭރިއާ ތެރެއިން ލިބުނު ބޯޅައަކުން މި ލަނޑު އެ ޓީމަށް ކާމިޔާބުކޮށްދިނީ ނިކޯލޯ ބަރެއްލާއެވެ. އަދި މި މެޗުން އިންޓަ މޮޅުވީ މެޗުގެ ފަހު މިނެޓުގައި ޒެކޯ ކާމިޔާބުކޮށްދިން ލަނޑާއެކުއެވެ. އޭނާ މި ލަނޑު ކާމިޔާބުކޮށްފައިވަނީ ޑެންޒެލް ޑަމްފްރީސް ނަގައިދިން ހުރަހަކުންނެވެ.

މި މޮޅާއެކު ތާވަލުގެ އެއްވަނައިގައި އިންޓައިން ފަސް ޕޮއިންޓުގެ ލީޑެއް ނެގިއިރު، ކުޅުނު 22 މެޗުން އެ ޓީމަށް ވަނީ 53 ޕޮއިންޓް ލިބިފައެވެ. ދެވަނައިގައި އޮތް ވާދަވެރި އޭސީ މިލާނަށް 22 މެޗުން 48 ޕޮއިންޓް ލިބިފައިވާއިރު، ތިންވަނައިގައި އޮތް ނާޕޮލީއަށް 22 މެޗުން ލިބިފައިވަނީ 46 ޕޮއިންޓެވެ. އަދި ހަތަރުވަނައިގައި އޮތް އެޓަލާންޓާއަށް 22 މެޗުން ވަނީ 43 ޕޮއިންޓް ލިބިފައެވެ.