އިޓާލިއަން ކަޕުގެ ގަދަ 16 ގައި ބުދަ ދުވަހުގެރޭ ކުޅުނު މެޗުން އެމްޕޯލީ ބަލިކޮށް ކުއާޓާ ފައިނަލުގެ ޖާގައެއް އިންޓަ މިލާނުން ހޯދައިފިއެވެ.

އަމިއްލަ ދަނޑުގައި ކުޅުނު މެޗުން އިންޓަ މޮޅުވީ 3-2 ގެ ނަތީޖާއަކުންނެވެ.

މި މެޗުގައި އެންމެ ފުރަތަމަ ލަނޑު ޖަހައި ލީޑު ނެގީވެސް އިންޓައިންނެވެ. މެޗުގެ 13 ވަނަ މިނެޓުގައި ޑެންޒެލް ޑަމްފްރީސް ނަގައިދިން ހުރަހަކުން މި ލަނޑު އެ ޓީމަށް ކާމިޔާބުކޮށްދިނީ އަލެކްސިސް ސަންޗޭޒެވެ. އޭގެ ފަހުން މި މެޗުގެ ފުރަތަމަ ހާފުގައި އެމްޕޯލީން ފޮނުވާލި ގިނަ ހަމަލާތަކެއް އިންޓަގެ ގޯލްކީޕަރު އަންދްރޭ ރަޑޫ ވަނީ ދިފާއުކޮށްފައެވެ.

އެކަމަކު މެޗުގެ ދެވަނަ ހާފު ފަށައިގެން އަމްޕޯލީން ވަނީ އެ ޓީމު ކޮޅަށް ނަތީޖާ އަނބުރާލާފައެވެ. އެގޮތުން މެޗުގެ 61 ވަނަ މިނެޓުގައި އޭރިއާ ތެރެއިން ލިބުނު ފުރުސަތަކުން ނަދީމް ބައިރާމީ ވަނީ އެ ޓީމަށް ނަތީޖާ އެއްވަރުކޮށްދީފައެވެ. އަދި 76 ވަނަ މިނެޓުގައި އެމްޕޯލީން ލީޑު ނެގިއިރު، މި ލަނޑަކީ އިންޓަގެ ގޯލްކީޕަރު ރަޑޫ އަތުން ބައިކޮޅަށް ވަން ލަނޑެކެވެ.

މި މެޗުން ބަލިވާން ދަނިކޮށް އިންޓަ ސަލާމަތްވީ މެޗުގެ އިތުރު ވަގުތުގައި އަންދްރޭ ރަނޮކިއާ ޖަހައިދިން ލަނޑުންނެވެ. އެއާއެކު މެޗުގެ ފުރިހަމަ ވަގުތު ހަމަވިއިރު ދެ ޓީމު އެއްވަރުވެފައި އޮތުމުން، ނަތީޖާ ނެރުމަށް އިތުރު ވަގުތުގެ ދެ ހާފު ވަނީ ކުޅެފައެވެ. މި މެޗުން އިންޓަ މޮޅުވީ އިތުރު ވަގުތުގެ ފުރަތަމަ ހާފުގައި ބަދަލު ކުޅުންތެރިއެއްގެ ގޮތުގައި ކުޅެން އެރި ސްޓެފާނޯ ސެންސީ ކާމިޔާބުކޮށްދިން ލަނޑުންނެވެ.

މި މޮޅާއެކު މި ސީޒަނުގެ އިޓާލިއަން ކަޕުގެ ކުއާޓާއަށް އިންޓަ ދަތުރުކުރިއިރު، ކުއާޓާގެ މެޗުތައް ކުޅުމަށް ތާވަލުކޮށްފައިވަނީ އަންނަ ފެބްރުއަރީ މަހުގެ ތެރޭގައެވެ. މީގެ ކުރިން އިޓާލިއަން ކަޕުގެ ކުއާޓާއަށް މުބާރާތުގެ އެންމެ ކާމިޔާބު ޓީމު ކަމަށްވާ ޔުވެންޓަސް އާއި އޭސީ މިލާނުވެސް ވަނީ ދަތުރުކޮށްފައެވެ.