މޭރީގެ މަރު: މާވިންއަށް ވަކީލަކު އައްޔަނު ކުރުމަށް 10 ދުވަސްދީ، 30 ދުވަހަށް ބަންދު

އައިޖީއެމްއެޗްގައި މަސައްކަތް ކުރަމުން ދިޔަ ފިލިޕީންސްގެ އަންހެން ނަރުހެއް ކަމަށްވާ މޭރީ ގްރޭސްގެ މަރުގެ މައްސަލައިގެ ޝަރީއަތުގެ އަޑުއެހުމެއް ބުރާސްފަތި ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.

މި މައްސަލައިގައި ދައުލަތުން ދައުވާކުރަނީ މޭރީގެ ފިރިމީހާ ފިލިޕީންސްގެ ރައްޔިތެއްކަމަށްވާ މާރވިން އެސް.ވައި ވާރގަސްއާއި ޅ.ހިންނަވަރު، މާފިނި، ހަލީމަތު ލަމްޙާ އަބްދުއްރަހްމާނުގެ މައްޗަށެވެ. ބުރާސްފަތި ދުވަހު ފުރަތަމަ ކުރިއަށް ގެންގޮސްފައިވަނީ މާވިންގެ މައްޗަށް ކުރާ ދައުވާގެ ބައެވެ. މާވިން ވަނީ ކުރިއަށްދާން ބޭނުންވަނީ ވަކީލަކާއެކުކަމަށް ބުނެފައެވެ. އޭނާ ވަކީލަކު ހަމަޖައްސާފައިވީނަމަވެސް، ކޯޓަށް އެ މައުލޫމާތުތައް ހިއްސާކޮށްފައެއް ނުވެއެވެ. ދައުލަތުންވެސް ވަނީ ވަކީލަކާއެކު އަޑުއެހުމުގައި ބައިވެރި ވުމުގެ ފުރުސަތު ދެއްވުމަށް އެދިލައްވާފައެވެ.

މާވިންގެ މައްސަަލައިގެ މުއްދަތު މަޖިލީހުގައި އޭނާގެ ވަކީލު ބައިވެރިވި ނަމަވެސް، ބުރާސްފަތި ދުވަހު ކޯޓުން ފުލުހުން މެދުވެރިކޮށް އޭނާއަށް ގުޅާލުމަށް ކުރި މަސައްކަތް ކާމިޔާބުވެފައެއް ނުވެއެވެ.

މާވިންގެ ބަންދުގެ މުއްދަތު ހަމަވަނީ 20 ޖެނުއަރީއަށް ކަމަށްވުމާއެކު، ދައުލަތުން ވަނީ އޭނާގެ ބަންދުގެ މުއްދަތު އިތުރު ކޮށްދެއްވުމަށް އެދިފައެވެ. އަދި ވަކީލަކު ނެތް ނަމަވެސް، ބަންދުގެ މުއްދަތު ހަމަވާތީ ބަންދު މުރާޖައާ ކުރުމަށްފަހު، ފަހުން ވަކީލަކާއެކު އަލުން ބަންދު މުރާޖައާއަށް ހުށައަޅައިގެން ދިފާއަށް ކުރިއަށް ގެންދެވިދާނެކަމަށް ދައުލަތުގެ ވަކީލާ ވިދާޅުވިއެވެ.

ޝަރީއަތުން ވަނީ މާވިންއަށް ވަކީލަކު އައްޔަނު ކުރުމަށް 10 ދުވަހުގެ މުއްދަތެއް ދެއްވާފައެވެ. އަދި ބަންދު މުރާޖައާ ބައި ވަނީ ކުރިއަށް ގެންގޮސްފައެވެ.

މި މައްސަލައިގައި މާވިން ބަންދު ކުރުމަށް ދައުލަތުން އެދެނީ 2 ސަބަބަކަށް ބަލާފައެވެ. އެއީ މާވިންގެ މައްޗަށް ތުހުމަތު ކުރެވޭ މިންވަރަށް ގިނަ ހެކިތަކެއް ހުރުމާއި، މާވިންގެ ފަރާތުން ހެއްކަށް ނުފޫޒު ފޯރުވައި މުޖުތަމައުގެ ސަލާމަތަށް ނުރައްކާ އޮތުމުންކަަމަށް ދައުލަތުގެ ވަކީލާ ވިދާޅުވިއެވެ. ދައުލަތުން ވަނީ މާވިން ޝަރީއަތް ނިމެންދެން ބަންދު ކުރުމަށް އެދިފައެވެ.

އެކަމާ ގުޅިގެން އެއްވެސް އެއްޗެއް ބުނަން ބޭނުން ނުވާކަމަށް މާވިން ބުނެއެވެ. އެހެންނަމަވެސް އޭނާ ވަނީ ދޫނިދޫ ކަސްޓޯޑިއަލްގެ ބަދަލުގައި ޖަލަށް ބަދަލުކޮށްދިނުމަށް އެދިފައެވެ. އެގޮތުން ކަސްޓޯޑިއަލްގައި ހުންނަތާ 85 ދުވަސްވެފައިވާކަމަށް އޭނާ ބުނެއެވެ.

ކްރިމިނަލް ކޯޓުގައި މި މައްސަލަ ބައްލަވަނީ ގާޒީ ހުސައިން ފާއިޒު ރަޝާދެވެ. ގާޒީ ވަނީ މާވިންއަށް ވަކީލަކު އައްޔަނު ކުރުމުގެ ފުރުސަތު ލިއްބައިދިނުމަކީ އެންމެ ރަނގަޅު ގޮތް ކަމަށް ނިންމަވައި، 30 ދުވަހުގެ މުއްދަތަށް އޭނާ ބަންދު ކުރުމަށް ނިންމަވާފައެވެ. މި މައްސަލައިގައި ވަކީލަކު އައްޔަނު ކުރުމުން އިތުރު އަޑުއެހުމެއް ބާއްވަވާނެކަމަށް ގާޒީ ވިދާޅުވިއެވެ. އަދި ދޫނިދޫ ކަސްޓޯޑިއަލްގެ ބަދަލުގައި ޖަލަށް ބަދަލުކޮށްދިނުމަށް އެދުނު އެދުމާއި ގުޅޭގޮތުން އަންނަ އަޑުއެހުމެއްގައި ގޮތެއް ނިންމަވާނެކަމަށް ގާޒީ ވިދާޅުވިއެވެ.