މާޒިޔާއަށް މޮންޓަނީގްރޯގެ ޑިފެންޑަރެއް

މޮންޓަނީގްރޯގެ ޑިފެންޑަރު ނަމާންޏާ ކާޓާލް ރާއްޖޭގެ ޗެމްޕިއަން މާޒިޔާ ސްޕޯޓްސް އެންޑް ރެކްރިއޭޝަނަށް ސޮއިކޮށްފިއެވެ.

އުމުރުން 27 އަހަރުގެ ކާޓާލް އަކީ ޔޫރަޕުގެ ހަތަރު ގައުމެއްގެ ފުރަތަމަ ޑިވިޝަނުގައި ކުޅެފައިވާ ޑިފެންޑަރެކެވެ. ކާޓާލް އެންމެ ފަހުން ކުޅެފައިވަނީ މޮންޓަނީގްރޯގެ ފުރަތަމަ ޑިވިޝަނުގެ ކުލަބު ރޫޑާ ޕްލްޔެލީވިޔާއަށެވެ. އަދި އޭގެ ކުރިން އޭނާ ވަނީ ގްރީސް އާއި، ބޮސްނިއާ އަދި ސާބިއާގެ ފުރަތަމަ ޑިވިޝަނުގެ ޓީމުތަކަށް ކުޅެފައެވެ.

މި ސީޒަނަށް ސްކޮޑު ވަރުގަދަ ކުރުމުގެ ގޮތުން މާޒިޔާއިން ބިދޭސީ ޑިފެންޑަރެއް ގެނައިރު، މި އަހަރުގެ އޭއެފްސީ ކަޕުގެ ދެކުނު އޭޝިއާ ގްރޫޕުގެ ސީދާ ޖާގައެއް މާޒިޔާއަށް ވަނީ ލިބިފައެވެ. އަދި އެ ޓީމުން މިހާރު އަންނަނީ ޕްރެޒިޑެންޓްސް ކަޕުގައި ވާދަކުރަމުންނެވެ. ޕްރެޒިޑެންޓްސް ކަޕުގެ ފައިނަލުން ޖާގައެއް ހޯދަން ބުދަ ދުވަހުގެރޭ މާޒިޔާއިން ތާވަލުގެ އެއްވަނައިގައި އޮތް ވެލެންސިއާއާ ދެކޮޅަށް ކުޅޭއިރު، އެ މެޗުން މޮޅުވާން މާޒިޔާއަށް މަޖުބޫރެވެ. އެއާއެކު ކާޓާލް ވަނީ އަންގާރަ ދުވަހުގެ ހަވީރު މާޒިޔާއިން ކުރިއަށްގެންދިޔަ ފަރިތަކުރުންތަކަށް ނުކުމެފައެވެ.

ކާޓާލް އާއެކު މާޒިޔާގެ ސްކޮޑުގައި މިހާރު ބިދޭސީ ތިން ކުޅުންތެރިން ހިމެނެއެވެ. އެއީ މި ސީޒަނަށް މާޒިޔާއަށް ގެނައި ނޭޕާލުގެ ގައުމީ ފުޓްބޯޅަ ޓީމުގެ އެއްވަނަ ގޯލްކީޕަރު ކިރަން ކުމާރް ލިމްބޫ އިތުރުން ސެއިންޓް ވިންސެންޓުގެ ފޯވާޑް ކޮނޭލިއަސް ސްޓެވާޓް (ކޯނޭ) އެވެ. ދެން މި ސީޒަނަށް މާޒިޔާއިން ގެނައި އަނެއް ދެ ކުޅުންތެރިންނަކީ ގައުމީ ފުޓްބޯޅަ ޓީމުގެ ކެޕްޓަން އަކުރަމް އަބްދުލް ޣަނީ (އަކޫ) އާއި ޒުވާން ޑިފެންޑަރު ހައިޝަމް ހަސަން (ބިޑި) އެވެ.

މަޝްހޫރު ފުޓްބޯޅަ ކޯޗު މުޙައްމަދު ޝިޔާޒް (މޯހަން) ގެ އިރުޝާދުގެ ދަށުން މި ސީޒަނާ މާޒިޔާއިން ކުރިމަތިލާފައިވާއިރު، ޕްރެޒިޑެންޓްސް ކަޕަށްފަހު ދިވެހި ޕްރިމިއާ ލީގު ފެށުމަށް ތާވަލުކޮށްފައިވަނީ އަންނަ ފެބްރުއަރީ މަހުގެ ތެރޭގައެވެ. މާޒިޔާއަކީ އެންމެ ފަހުގެ ދެ ސީޒަނުގެވެސް ލީގު ޗެމްޕިއަނުންނެވެ.