އިންޑިއާގެ ޑިފެންސްގެ ވެރިޔާ ޖެނެރަލް ބިޕިން ރަވަތު ދަތުރު ކުރެއްވި އިންޑިއާގެ ވައިގެ އަސްކަރިއްޔާގެ ހެލިކޮޕްޓަރު ވެއްޓުވީ އުޑުމަތި ބަނަވެ ވިލާތައް ބޯވުމުގެ ސަބަބުންކަމަށް ތަހުގީގުން ހާމަވެއްޖެއެވެ.

އިންޑިޔާގެ ސަރުކާރުން ނެރުނު ބަޔާނެއްގައި ބުނެފައިވަނީ މިކަން އެނގުނީ އެ ހާދިސާ ތަހުގީގު ކުރުމުން ކަމަށެވެ. އުޑުމަތި ބަނަވެ ވިލާތައް ބޯވެފައިވަނިކޮށް އެ ސަރަހައްދަށް ހެލިކޮޕުޓަރު ވަނުމުން ދަތުރުކުރުމުގައި އުނދަގޫތަކެއް ކުރިމަތިވެ އެ ހެލިކޮޕްޓަރު ވެއްޓުނީ ކަމަށް ބަޔާނުގައި ބުނެފައިވެއެވެ. އެ ހާދިސާގައި ޖެނެރަލް ބިޕިންނާއި އޭނާގެ އަނބިކަނބަލުން މަދޫލިކާ ރަވާތާއެކު ޖުމުލަ 14 މީހުން މަރުވިއެވެ. އޭގެ ތެރޭގައި އިންޑިޔާގެ އަސްކަރިއްޔާގެ ބައެއް އިސްވެރިންވެސް ހިމެނެއެވެ.

އެ ހެލިކޮޕްޓަރަކީ ރަޝިއާއިން އުފައްދާފައިވާ އެމްއައި 17ވީ5 މަރުކާގެ ހެލިކޮޕްޓަރެކެވެ. މި ހާދިސާ ހިނގާފައިވަނީ 8 ޑިސެމްބަރ 2021ގައެވެ.

ޖެނެރަލް ބިޕިން އިންޑިޔާގެ ޗީފް އޮފް ޑިފެންސް ސްޓާފް ކަމަށް އައްޔަންކުރެވުނީ 2019 ވަނަ އަހަރުގައެވެ. އޭގެ ކުރިން އޭނާ ހުންނެވީ އިންޑިއާގެ އެއް މިލިއަން ފައުޖުގެ ޗީފްގެ ގޮތުގައެވެ.

އުމުރުފުޅުން 63 އަހަރުގެ ބިޕިން އަކީ ހިތްވަރުގަދަ އޮފިސަރެއްގެ އިތުރުން ނަމޫނާ ކޮމާންޑަރެކެވެ. ބިޕިން އުފަންވެވަޑައިގަތީ 16 މާޗް 1958 ގައި އުތުރު އިންޑިއާގެ އުއްތަރަޚާންދަށެވެ.