ސައުދީ ކޮރަޕްޝަންގެ މައްސަލާގައި މީހުން ހައްޔަރު ކުރުމަކީ ފެށުމެއް: އެޓާނީ ޖެނެރަލް

ކޮރަޕްޝަންގެ މައްސަލަތަކަކާއި ގުޅިގެން ސައުދީ އަރަބިއްޔާގެ އިސް ފަރާތްތަކެއް ހައްޔަރު ކުރުމަކީ އަދި ފެށުމެއް ކަމަށް އެގައުމުގެ އެޓާނީ ޖެނެރަލް ޝެއިޚް ސައުދު އަލް މުޖީބް ވިދާޅުވެއްޖެ އެވެ.

ސައުދީ ރަސްގެފާނު ސަލްމާން ބިން އަބްދުލްއަޒީޒުގެ ޝާޙީ ގަރާރަކުން އުފެއްދެވި އެންޓި ކޮރަޕްޝަން ކޮމިޓީގެ އަމުރަށް، ސައުދީ ޝާޙީ އާއިލާގެ އަމީރުންނާއި، ވަޒީރުން އަދި ކުރީގެ ވަޒީރުންނާއި ވިޔަފާރިވެރިންތަކެއް މިދިޔަ ހޮނިހިރު ދުވަހު ވަނީ ހައްޔަރުކޮށްފައެވެ.

މިކަމާއި ގުޅޭ ގޮތުން ނެރުނު ބަޔާނެއްގައި ސައުދީ އެޓާނީ ޖެނެރަލް ޝެއިޚް ސައުދު ވިދާޅުވީ، މިއީ އެގައުމުން ކޮރަޕްޝަން ނައްތާލުމުގެ މުހިންމު މަސައްކަތުގެ ފެށުމެއް ކަމަށެވެ.

ކޮރަޕްޝަންގެ ތަހުގީގުގައި ލިބިފައިވާ ކުރިއެރުންތަކާއި ގުޅޭ ގޮތުން ނެރުނު ބަޔާނުގައި ޝެއިޚް ސައުދު އަލް މުޖީބް ވިދާޅުވީ، ތަހުގީގުގެ ފުރަތަމަ މަރުހަލާ ފުރިހަމަވެފައިވާ ކަމަށެވެ. އަދި މުހިންމު ގިނަ ހެކިތަކެއް އެއް ކުރެވިފައިވާ ކަމަށާއި، ހައްޔަރު ކޮށްފައިވާ ފަރާތްތަކާއި ސުވާލު ކުރުމުގެ މަސައްކަތް ކުރިއަށްދާ ކަމަށް އޭނާ ވިދާޅުވި އެވެ.

މީގެ އިތުރުން، މިހާތަނަށް ކޮރަޕްޝަންގެ ތުހުމަތުގައި ހައްޔަރު ކުރެވިފައިވާ ހުރިހާ ފަރާތްތަކަށްވެސް ޤާނޫނީ ގޮތުން ލިބެންޖެހޭ ހުރިހާ ހައްގުތަކެއް ލިބިގެންދާނެ ކަމަށާއި، ޝަރީއަތްތައް ހިންގާނީ އަވަސް އަރުވާނުލައި، އާއްމުކޮށް ހުޅުވާލެވިގެން ކަމަށް ޝެއިޚް ސައުދު ވިދާޅުވި އެވެ.

ސައުދީ ވަލީއަޙުދު މުޙައްމަދު ބިން ސަލްމާންގެ ރިޔާސަތުގެ ދަށުން އެކުލަވާލާފައިވާ އެންޓި ކޮރަޕްޝަން ކޮމިޓީގެ އަމުރަށް ޝާހީ އާއިލާގެ 11 އަމީރަކާއި، 4 ވަޒީރެއް އަދި ކުރީގެ އެތައް ވަޒީރުންނެއް ހައްޔަރުކޮށްފައިވެއެވެ. ހައްޔަރު ކުރި ބޭފުޅުންގެ ތެރޭގައި މަޝްހޫރު ބިލިއަނަރ އަދި ވަލީއަޙުދު މުޙައްމަދު ބިން ސަލްމާން އާއި ދެބެއިންގެ ދެދަރި ބޭފުޅެއް ކަމަށްވާ އަލްވަލީދު ބިން ތަލާލް ހިމެނެއެވެ.

ބޮޑެތި ބާރުތަކާއެކު އެކުލަވާލާފައިވާ އެންޓި ކޮރަޕްޝަން ކޮމިޓީ އަކީ، ސައުދީ ރަސްކަމަށް ތައްޔާރު ކުރައްވަމުން ގެންދަވާ ވަލީއަޙުދު މުޙައްމަދުގެ ނުފޫޒާއި ބާރުގަދަ ކުރެއްވުމަށް ކުރައްވާ މަސައްކަތްތަކެއްގެ ގޮތުގައި ފާޑުކިޔާ ފަރާތްތަކުން ސިފަކުރެއެވެ.

ސައުދީ ރަސްގެފާނު ސަލްމާންގެ އިސްނެންގެވުމުގެ ގޮތުން ކުރައްވާ މިމަސައްކަތަށް ތާއީދު އޮތްކަން އެމެރިކާގެ ރައީސް ޑޮނަލްޑް ޓްރަމްޕް ވަނީ ހާމަކުރައްވާފައެވެ.

ޓްރަމްޕް ކުރެއްވި ޓްވީޓެއްގައި ވަނީ، ރަސްގެފާނު ސަލްމާން އަދި ވަލީއަޙުދު މުޙައްމަދު ކުރައްވާ މަސައްކަތްޕުޅަކީ ކޮބައިކަން އެދެބޭފުޅުންނަށް ރަނގަޅަށް އެނގިވަޑައިގަންނަވާނެ ކަމަށާއި، އެކަމުގެ ޔަގީންކަން އެބައޮތް ކަމަށް ވިދާޅުވެފައެވެ.