68 މަޝްރޫއުއެއްގެ މަސައްކަތް ނުހުއްޓި ކުރިއަށްދޭ: އާޒިމް
16 ޖެނުއަރީ 2022 | އާދީއްތަ 17:33މިހާރު 50ށްވުރެ ގިނަ މަޝްރޫއު ނިންމައި ސަރުކާރާއި ހަވާލުކުރެވި، ރައްޔިތުންނަށް އޭގެ ފައިދާ ލިބޭ
އެމްޓީސީސީގެ ސީއީއޯ އާދަމް އާޒިމް
ރާއްޖޭގައި މިހާރު ވެސް 68 މަޝްރޫއުގެ މަސައްކަތް ނުހުއްޓި ކުރިއަށްދާ ކަމަށް މޯލްޑިވްސް ޓްރާންސްޕޯޓް އެންޑް ކޮންޓްރެކްޓިން ކޮމްޕެނީ (އެމްޓީސީސީ) ސީއީއޯ އާދަމް އާޒިމް ވިދާޅުވެއްޖެއެވެ.
ހޯރަފުށީގެ މަގު ހެދުމުގެ މަޝްރޫއުގެ އަމަލީ މަސައްކަތް ފެށުމަށް ބޭއްވި ޚާއްސަ ރަސްމިއްޔާތުގައި ވާހަކަދައްކަވަމުން އާޒިމް ވިދާޅުވީ މިސަރުކާރުގެ ތިން އަހަރުގެ ތެރޭގައި 150 މަޝްރޫއު އެމްޓީސީސީއާ ހަވާލުކޮށްފައިވާ ކަމަށާއި، އެއީ ޖުމްލަ ގޮތެއްގައި އެވްރެޖްކޮށް ހަފްތާއަކަށް މަޝްރޫއު ކަމަށެވެ. އޭގެ ތެރެއިން މިހާރު 50ށްވުރެ ގިނަ މަޝްރޫއު ނިންމައި ސަރުކާރާއި ހަވާލުކުރެވި، ރައްޔިތުންނަށް އޭގެ ފައިދާ މިހާރު ލިބެމުންދާ ކަމަށް އާޒިމް ވިދާޅުވިއެވެ.
އާޒިމް ވިދާޅުވީ ދިވެހި ތާރީހުގައި މީގެ ކުރިން މިހައި ހަލުހި ސްޕީޑެއްގައި ތަރައްގީ ގިނަ މަޝްރޫއުތައް ނުހިންގާ ކަމަށެވެ. އަދި ކުރިއަށް އޮތީ ކުންފުންޏަށް ފަހި ދުވަސްތަކެއް ކަމަށް އާޒިމް ވިދާޅުވިއެވެ.
ހޯރަފުށި އެއަރޕޯޓަށް އިޝާރާތް ކުރައްވައި އާޒިމް ވިދާޅުވީ އެކުންފުންޏަށް އެންމެ ރީތި ނަން ހޯދައިދިނުމުގައި ހޯރަފުށީގެ ރައްޔިތުންގެ ދައުރު ވަރަށް ބޮޑު ކަމަށެވެ. އަދި ކާމިޔާބު ކަމާއެކު އެމަޝްރޫއު ނިންމާލެވުނީ ރައްޔިތުންގެ ފަރާތުން ލިބުނު އެއްބާރުލުމުގެ ސަބަބުން ކަމަށް އާޒިމް ވިދާޅުވިއެވެ.
އާޒިމް ވިދާޅުވީ މިއަދުގެ ސަރުކާރުން ރައްޔިތުންގެ އަޑު އަހާނެ ކަމަށާއި، ރައްޔިތުންނަށް ކުރިމަތިވާ މައްސަލަތައް ހައްލު ކޮށްދޭނެ ކަމަށެވެ. މިއަދު ރައްޔިތުންނަށް ފޯރުކޮށްދޭން ޖެހޭ ޚިދުމަތެއް ނުވަތަ ތަރައްގީގެ މަޝްރޫއެއް ވެސް ފެއިލްވެގެންދަނީ އެތަނެއްގައި ހަވާލުވެ ހުންނަވާ ބޭފުޅެއް އިހުމާލުން ކަމަށެވެ. ނަމަވެސް އަބަދުވެސް ރައީސްހެ އަރިހުން ވަރަށް ފުރިހަމައަށް ހުރިހާ ކަމެއް ނިންމަވާ ކަމަށް އާޒިމް ވިދާޅުވިއެވެ.
