ޖަރުމަން ލީގުގައި ހޮނިހިރު ދުވަހުގެރޭ ކޮލޯން ބަލިކޮށް އެންމެ ފަހުގެ ޗެމްޕިއަން ބަޔާން މިއުނިކުން ތާވަލުގެ އެއްވަނައިގައި ލީޑު ފުޅާކުރިއިރު، އެ ޓީމުގެ އިތުބާރު ފޯވާޑް ރޮބަޓް ލެވަންޑޯސްކީ ލީގުގައި 300 ލަނޑު ހަމަކޮށްފިއެވެ.

ރަށުން ބޭރުގައި ކުޅުނު މެޗުން ބަޔާން މޮޅުވީ ފަސޭހަކަމާއެކު 4-0 ގެ ނަތީޖާއަކުންނެވެ.

މި މެޗު ފަށައިގެން ނުވަވަނަ މިނެޓުގައި ތޯމަސް މުލާ ދިން ބޯޅައަކުން ލެވަންޑޯސްކީ ވަނީ ބަޔާނަށް ލީޑު ނަގައިދީފައެވެ. އަދި މެޗުގެ 25 ވަނަ މިނެޓުގައި މުލާ ތަނަވަސްކޮށްދިން އިތުރު ފުރުސަތަކުން ބަޔާނުގެ ލީޑު ފުޅާކޮށްދިން ލަނޑު ޖަހައިދިނީ ކޮރެންޓިން ޓޮލީސޯއެވެ.

މި މެޗުގެ ދެވަނަ ހާފުގައިވެސް ބަޔާނުން ގިނަ ހަމަލާތަކެއް އުފެއްދިއިރު، މެޗުގެ 62 ވަނަ މިނެޓުގައި ލެރޯއި ސާނޭ ދިން ޕާހަކުން ލެވަންޑޯސްކީ ވަނީ އެ ޓީމުގެ ތިންވަނަ ލަނޑު ޖަހާފައެވެ. އަދި މެޗުގެ 74 ވަނަ މިނެޓުގައި ސާނޭ ތަނަވަސްކޮށްދިން ފުރުސަތަކުން ލެވަންޑޯސްކީ ވަނީ އިތުރު ލަނޑެއް ޖަހައި، މެޗުގައި ހެޓްރިކް ހަދާފައެވެ.

މި ހެޓްރިކާއެކު ލެވަންޑޯސްކީ ޖަރުމަން ލީގުގައި 300 ލަނޑު ހަމަަކުރީ 369 މެޗުންނެވެ. ޖަރުމަން ލީގުގައި އެންމެ ގިނަ ލަނޑު ޖެހުމުގެ ރިކޯޑު އޮންނަނީ ލެޖެންޑަރީ ފޯވާޑް ގާޑް މުލާގެ އަތުގައެވެ. އޭނާ ވަނީ ޖަރުމަން ލީގުގެ ތާރީޚުގައި 365 ލަނޑު ޖަހާފައެވެ.

ލީގުގައި ހޮނިހިރު ދުވަހުގެރޭ ކޮލޯން އަތުން ހޯދި މޮޅާއެކު ބަޔާނުން ވަނީ ތާވަލުގެ އެއްވަނައިގައި ހަ ޕޮއިންޓުގެ ލީޑެއް ނަގާފައެވެ. އެގޮތުން ބަޔާނަށް ކުޅުނު 19 މެޗުން 46 ޕޮއިންޓް ލިބިފައިވާއިރު، ދެވަނައިގައި އޮތް ބޮރޫޝިއާ ޑޯޓްމުންޑަށް 19 މެޗުން ލިބިފައިވަނީ 40 ޕޮއިންޓެވެ. އަދި ބަޔާން އަތުން ބަލިވި ކޮލޯން އޮތީ ތާވަލުގެ އަށްވަނައިގައި 19 މެޗުން 28 ޕޮއިންޓާއެކުއެވެ.