އޮލިމްޕިކްސް ގޭމްސް ބޯމަތިވެފައިވަނިކޮށް ބެއިޖިންގ އިން އޮމިކްރޯން ވޭރިއަންޓްގެ ފުރަތަމަ ކޭސް ފެނިއްޖެ

ވިންޓަރ އޮލިމްޕިކްސް ބޭއްވުމަށް ހަމަޖެހިފައިވާ ޗައިނާގެ ކެޕިޓަލް ސިޓީ ބެއިޖިންގ އިން އޮމިކްރޯން ވޭރިއަންޓްގެ ފުރަތަމަ ކޭސް ފެނިގެން ރިޕޯޓްކޮށްފިއެވެ.

ޗައިނާގެ ސްޓޭޓް ޓީވީން ހޮނިހިރު ދުވަހު ރިޕޯޓްކޮށްފައިވާ ގޮތުގައި އޮމިކްރޯން ވޭރިއަންޓްގެ ކޭހެއް އެ ސްޓޭޓުން ވަނީ ފެނިފައެވެ. މިއާއެކު އެމީހާ ދިރިއުޅެމުންދިޔަ އެޕާޓްމެންޓް ހުރި އިމާރާތާއި އޭނާ މަސައްކަތްކުރި ތަން ބަންދުކޮށް މި ދެސަރަހައްދާ ގުޅުންހުރި މީހުންގެ ތެރެއިން 2430 ސާމްޕަލެއް ވަނީ ޓެސްޓްކުރުމަށް ނަގާފައެވެ.

އަންނަ ފެބްރުއަރީ މަހުގެ 4 ވަނަ ދުވަހު ވިންޓަރ އޮލިމްޕިކްސް ބޭއްވުމަށް ތައްޔާރުވަމުން އަންނައިރު ޗައިނާއިން އަންނަނީ ވައިރަސް ފެތުރުން ކޮންޓްރޯލްކުރުމަށް ވަރުގަދަ ފިޔަވަޅުތަކެއް އަޅަމުންނެވެ. މީގެއިތުރުން ޗައިނާގެ އައު އަހަރާދިމާކޮށް އެތައް ހާސް ބަޔަކު ޗައިނާ އަށް އައުމާއި ޗުއްޓީއާ ދިމާކޮށް އެތައް ބަޔަކު އެއްތަނުން އަނެއް ތަނަށް ދަތުރުކުރާނެތީ ވައިރަސް ފެތުރުމުގެ ފުރުސަތު ބޮޑުކަމަށް ބުނެ ކަމާބެހޭ އިދާރާތަކުން ވަނީ މީގެކުރިން އެކަމުގެ އިންޒާރުދީފައެވެ.

ގިނަ ސިޓީތަކެއްގެ ސަރުކާރުތަކަކުން ވަނީ ޗުއްޓީގައި ވިޔަސް ކޮންމެހެން ބޭނުން ޖެހިގެން ނޫންގޮތަކަށް އެމީހުން ދިރިއުޅޭ ޓައުން ދޫކޮށް ނުދިޔުމަށް އެދިފައެވެ. މީގެއިތުރުން އެތައް ސަތޭކަ ބައިނަލްއަގްވަމީ އަދި އެތެރޭގެ ފްލައިޓްތަކެއްގެ އުދުހުންތައްވެސް ވަނީ މެދުކަނޑާލާފައެވެ.

ބެއިޖިންގ އިތުރުން ޗައިނާގެ ހަތަރު ޕްރޮވިންސަކުން ވަނީ އޮމިކްރޯން ވޭރިއަންޓް ފެނިގެން ރިޕޯޓްކޮށްފައެވެ. ނަމަވެސް ޗައިނާގައި އޮމިކްރޯން ވޭރިއަންޓް ޖެހިފައިވާ މީހުންގެ އަދަދެއް ސާފެއްނޫނެވެ.

ޗައިނާގެ 14 ސަރަހައްދަކުން މިހާތަނަށް އައިއިރު އޮމިކްރޯން ވޭރިއަންޓް ފެނިފައިވާއިރު އެކޭސްތަކަކީ ޗައިނާއަށް އެތެރެވި މީހުންކަމަށް ޗައިނާގެ ނޭޝަނަލް ހެލްތު ކޮމިޝަނުން ބުނެއެވެ.