ކޮމަންޑޫ ރައްޔިތުންނަށް ލިބިގެންދާ ހިތްހަމަޖެހުން ހުއްޓުވަން ބަޔަކު މަސައްކަތް ކުރޭ – ފައްޔާޒު
އޭސީސީއަށާއި އެކިއެކި ތަންތަނަށް މައްސަލަ ހުށަހަޅައިގެން މަތިކޮމަންޑޫގެ މަޝްރޫއު ހުއްޓުވަން ބަޔަކު މަސައްކަތްކުރޭ
އިކޮނޮމިކް މިނިސްޓަރ ފައްޔާޒް އިސްމާއިލް ކޮމަންޑޫގެ ބޮޑު މަޝްރޫއު ފަށްޓަވައިދެއްވުމުގެ ރަސްމިއްޔާތުގައި ވާހަކަފުޅުދައްކަވަނީ
ކޮމަންޑޫ ރައްޔިތުންނަށް ލިބިގެންދާ އެންމެ ބޮޑު އެއް ހިތްހަމަޖެހުން ހުއްޓުވަން ބަޔަކު މަސައްކަތް ކުރަމުންދާކަމަށް އިކޮނޮމިކް މިނިސްޓަރ ފައްޔާޒު އިސްމާއިލް ވިދާޅުވެއްޖެއެވެ.
ކޮމަންޑޫއާއި މަތިކޮމަންޑޫ ގުޅާލާ ބޮޑު ޕްރޮޖެކްޓް އިފްތިތާހުކުރުމަށް ބޭއްވި ހަފްލާފައި ވާހަކަފުޅުދައްކަވަމުން މިނިސްޓަރ ފައްޔާޒު ވިދާޅުވީ މަތިކޮމަންޑޫ ގުޅާލުމުން ބޯހިޔާވަހިކަމަށް ހައްލެއް ލިބިގެންދާއިރު އިގްތިސާދަށް ބޮޑު ބަދަލެއް އަންނާނެކަމާމެދު ޝައްކެއް ނުކުރައްވާ ކަމަށެވެ. އޭގެ މަންފާ ކޮމަންޑޫ ރައްޔިތުންނަށް އަދި މުޅި ށ. އަތޮޅަށް ކުރާނެ ކަމަށް މިނިސްޓަރ ވިދާޅުވިއެވެ.
މިނިސްޓަރ ވިދާޅުވީ ސަރުކާރުން މިއަދު މަސައްކަތް ކުރަމުން ދަނީ ވަރަށް ބޮޑެތި ގޮންޖެހުންތަކުގެ ތެރެއިން ކަމަށެވެ. ސަރުކާރުން ކުރަމުން މިދަނީ ޚުދުމުޚުތާރު ވެރިކަމެއް ނޫން ކަމަށާއި، ޚުދުމުޚުތާރު ވެރިކަމެއް ރާއްޖޭގައި ބަޔަކު ކޮށްފައިވާ ކަމަށެވެ. ބޭނުން ގޮތަކަށް ބޭނުން ކަމެއް ކޮށްލެވެން އެއިރު އޮތް ކަމަށާއި، ބޭނުން ގޮތަކަށް މަޖިލީހުން ގާނޫނުތައް ބަދަލުކޮށްލާ، ސަރުކާރުން ބުނި ގޮތަކަށް އަމަލުކުރި ކަމަށެވެ.
އެއިރު އެ ބާރާ އާރާ އޮއްވާ މިކަންކަން (ކޮމަންޑޫ އަދި މަތިކޮމަންޑޫ ގުޅުވާނުލެވޭ) ނުކުރޭ ކަމަށާއި، މި ސަރުކާރުން މިކަންކަން މިކުރަނީ ސަރުކާރުގެ މައްޗަށް ފާރަވެރިވާނެ އެތައް މުއައްސަސާއެއް އޮވެ، ރާއްޖޭގެ މީޑިއާއިން ވެސް ކޮންމެ ފަދަ ވާހަކައެއް ދެއްކުމުގެ ފުރުސަތު ދީގެން ކަމަށެވެ.
މިނިސްޓަރ ވިދާޅުވީ ކޮމަންޑޫގައި ކުރިއަށްދާ ސިޔާސީ ހަރަކާތްތަކުގެ ތެރޭގައި ކުރެވުނު ކަންތައްތަކުގެ މުޅިން ނުބައި މައުލޫމާތު މީޑިއާއަކުން އާންމު ކުރި ކަމަށާއި، ސަރުކާރުން އެމީހުން ހިފާ ހައްޔަރުކޮށް ބަންދެއް ނުކުރާނެ ކަމަށެވެ. ހުރިހާ ފާރަވެރިކަމަކާއި އެއްކޮށް ކަންކަން ކުރުމަކީ ރައްޔިތުން ބޭނުންވާ ދުވަސް ކަމަށެވެ.
މިނިސްޓަރ ވިދާޅުވީ ސިޔާސީ ބޭނުމަށްޓަކައި ކޮމަންޑޫ ރައްޔިތުންނަށް ލިބިގެންދާ ބޮޑު ހިތްހަމަޖެހުން ހުއްޓުވަން ބަޔަކު މަސައްކަތް ކުރާ ކަމަށެވެ. އޭސީސީއަށް މައްސަލަ ހުށަހަޅާ، އަދި އެކިއެކި ދިމާލަށް މައްސަލަ ހުށަހަޅައިގެން މަތިކޮމަންޑޫގެ މަޝްރޫއު ހުއްޓުވަން ބަޔަކު މަސައްކަތް ކުރަމުންދާކަމަށް މިނިސްޓަރ ފައްޔާޒު ވިދާޅުވިއެވެ.
ކޮމަންޑޫއާއި މަތިކޮމަންޑޫ ގުޅާލުމުގެ މަޝްރޫއުގައި ކޮމަންޑޫގެ ބިން ހިއްކުމާއި، ކޮމަންޑޫއާއި މަތިކޮމަންޑޫ ގުޅާލުމުގެ އިތުރުން ކޮމަންޑޫގެ އެއްގަމުތޮށި އަދި ބަނދަރުގެ ތޮށިގަނޑު މަރާމާތުކުރުން ހިމެނެއެވެ.
މި މަޝްރޫއުގެ ދަށުން، 16.7 ހެކްޓަރުގެ ބިން ހިއްކުމާއި، 1520 މީޓަރުގެ ސަރަހައްދެއްގައި ރިވެޓްމެންޓް ޖެހުމާއި، 353 މީޓަރުގެ ސަރަހައްދެއްގައި ގްރައިންސް ޖެހުމާއި، 200 މީޓަރުގެ ބްރިޖެއް އެޅުން ހިމެނެއެވެ. އަދި މިހާރު ހުރި ރިވެޓްމެންޓްގެ 1662 މީޓަރުގެ ސަރަހައްދެއް ރެކްޓިފައިކޮށް ރީޕްރޮފައިލް ކުރުމާއި، މިހާރު ހުރި ބޭރުތޮށީގެ 30 މީޓަރުގެ ސަރަޙައްދެއް ރެކްޓިފައިކޮށް ރީޕްރޮފައިލް ކުރުމާއި، އެންވަޔަރަމަންޓްރަލް އިމްޕެކްޓް އެސެސްމެންޓެއް ހެދުންވެސް މިމަޝްރޫއުގެ ތެރޭގައި ހިމެނެއެވެ.
ޖުމްލަ 249.90 މިލިއަން ރުފިޔާ ޚަރަދުވާ މި މަޝްރޫއު އެމްޓީސީސީއާ ހަވާލުކޮށްފައިވަނީ 730 ދުވަހުގެ ތެރޭގައި ނިންމާގޮތަށެވެ.
