ކޮވިޑު ޖެހިގެން ރާއްޖޭގައި މަރުވި މީހުންގެ އަދަދު 265ށް އަރައިފި
މަރުވެފައިވަނީ ބަންގްލަދޭޝްއަށް ނިސްބަތްވާ ފިރިހެނެއް
ކޮވިޑުގައި ނިޔާވާ މީހުން ވަޅުލުމަށް ޚާއްސަ ކުރެވިފައިވާ ހުޅުމާލެ ސަހަރާ
ކޮވިޑު ބަލި ޖެހިގެން ރާއްޖޭގައި މަރުވި މީހުންގެ އަދަދު 265ށް އަރައިފިއެވެ.
ހެލްތު ޕްރޮޓެކްޝަން އެޖެންސީ (އެޗްޕީއޭ)ން ބުނީ ކޮވިޑު ޖެހިގެން އިތުރު މީހަކު ރާއްޖޭގައި ހުކުރު ދުވަހު މަރުވެފައިވާ ކަމަށެވެ. މި މީހާ މަރުވެފައިވަނީ ހުކުރު ދުވަހުގެ ހެނދުނު 08:00 ހާއިރު ސ. ފޭދޫ ހެލްތު ސެންޓަރުގައި ފަރުވާދެމުން ދަނިކޮށެވެ. މަރުވެފައިވަނީ އުމުރުން 34 އަހަރުގެ ބަންގްލަދޭޝަށް ނިސްބަތްވާ ފިރިހެނެކެވެ.
މިއީ ރާއްޖޭގައި ކޮވިޑު ޖެހިގެން މަރުވި 265 ވަނަ މީހާއެވެ.
އޮމިކްރޯން ވޭރިއެންޓާއެކު ދުނިޔޭގެ އެހެން ގައުމުތަކެކޭ އެއްގޮތަށް ރާއްޖޭގައިވެސް ކޮވިޑަށް ޕޮޒިޓިވްވާ މީހުންގެ އަދަދު ވަނީ ބޮޑުތަނުން އިތުރުވެފައެވެ. އަދި މިއާއެކު މަރުވާ މީހުންގެ އަދަދުވެސް ވަނީ އިތުރުވެފައެވެ. އެގޮތުން މިދިޔަ ޑިސެމްބަރު މަހުގެ ތެރޭގައި 11 މީހަކު ރާއްޖޭގައި ކޮވިޑް ޖެހިގެން މަރުވެފައިވެއެވެ.
