އިންތިޚާބަށް ނުފޫޒު ފޯރުވަން މި ސަރުކާރުން މަސައްކަތްކުރޭ: ޝުޖާއު
ރައީސް ޔާމީން ކެމްޕޭނަށް ވަޑައިގަންނަވާކަން ހާމަކުރެއްވުމުން އެމަނިކުފާނަށް ޗިޓު ފޮނުއްވި
ޕްރޮގްރެސިވް ކޯލިޝަނުން ބޭއްވި ޖަލްސާގެ ތެރެއިން ހުޅުމާލެ ދާއިރާގެ މެމްބަރު އިބްރާހިމް ޝުޖާއު
ބައި އިލެކްޝަނެއް ބާއްވަން ތައްޔާރުވާއިރު، މި ސަރުކާރުން އިންތިޚާބަށް ނުފޫޒު ފޯރުވަން މަސައްކަތްކުރަމުންދާކަމަށް ހުޅުމާލެ ދާއިރާގެ ކައުންސިލް މެމްބަރު އިބްރާހިމް ޝުޖާއު ވިދާޅުވެއްޖެއެވެ.
ކޮމަންޑޫ ދާއިރާގެ ބައި އިލެކްޝަނާ ގުޅޭގޮތުން ހުރި ކަންބޮޑުވުންތަކާ ގުޅޭގޮތުން އިލެކްޝަންސް ކޮމިޝަންގެ މެމްބަރުންނާ ބައްދަލުކުރެއްވުމަށްފަހު ދެއްވި ޕްރެސްއެއްގައި ޝުޖާއު ވިދާޅުވީ، ބައި އިލެކްޝަންއަކާ ކުރިމަތިލާއިރު ދިވެހި ސަރުކާރަށް ރައްޔިތުން ކުރާ އެންމެ ބޮޑު އެއް ތުހުމަތަކީ ކޮރަޕްޝަންގެ ތުހުމަތުތައް ކަމަށެވެ.
ޝުޖާއު ވިދާޅުވީ ރައީސް ޔާމީން ކޮމަންޑޫ ދާއިރާގެ ކެމްޕޭނަށް ވަޑައިގަންނަވާކަން ހާމަކުރެއްވުމާއެކު އެމަނިކުފާނަށް ފުލުފުލުން ޗިޓު އައިކަން އެނގިގެންދިޔަ ކަމަށެވެ. މިއީ ނުފޫޒު ފޯރުވުން ކަމަށާއި، މިކަން އިލެކްޝަންސް ކޮމިޝަންގެ ސަމާލުކަމަށް ގެނެސްފައިވާކަމަށެވެ. މިއީ ގެއްލިގެންދާ ހައްގުތަކެއް ކަމަށާއި، އިންތިޚާބަށް ނުފޫޒު ފޯރުވުން ކަމަށެވެ. އަދި މި ހުރިހާ ޝަކުވާއެއް ބުރާސްފަތި ދުވަހު އިލެކްޝަންސް ކޮމިޝަނަށް ހުށަހަޅުއްވާނެ ކަމަށެވެ.
ޝުޖާއު ވިދާޅުވީ ގާނޫނުގައި އޮންނަ ގޮތުން މިފަދަ މައްސަލަތައް ހުށަހަޅަންޖެހެނީ އެންޓި ކޮރަޕްޝަން ކޮމިޝަން (އޭސީސީ)އަށް ކަމަށެވެ. އެހެންނަމަވެސް އޭސީސީ ހިނގަނީ ރާއްޖޭގެ ޕީޖީ އޮފީސް ހިނގާ ނިޒާމަކަށް ނޫން ކަމަށެވެ. ޕީޖީ އޮފީހުގައި ޕީޖީ ނެތް ހާލަތެއްގައި ޑެޕިއުޓީއަށްވެސް ކަންކަން ނިންމޭނެ ކަމަށާއި، އެހެންނަމަވެސް އޭސީސީގައި ކޮމިޝަންގެ މެމްބަރުން ނެތްނަމަ ކަންކަން ނިންމަނީ ކޮމިޝަނުން ކަމަށެވެ. އެހެންނަމަވެސް ކޮމިޝަނަށް ތުހުމަތުކުރެވޭ މައްސަލަތައް ހުރިއިރު އެ މައްސަލަތައް ލޮޖް ކުރާނެ ތަނެއް ނެތް ކަމަށް ޝުޖާއު ވިދާޅުވިއެވެ.
ސިޔާސީ ޕާޓީތަކުގެ ބަލަދުވެރި ފަރާތަކީ އިލެކްޝަންސް ކޮމިޝަން ކަމަށްވާއިރު، އެ ކޮމިޝަނުން އިސްވެ ތިބެ މި ޝަކުވާ ރައްޔިތުންގެ މަޖިލީހަށް ހުށަނާޅުއްވަނީ ކީއްވެގެންތޯ ޝުޖާއު ވަނީ ސުވާލު ކުރައްވާފައެވެ. މިކަމުން ޕީޕީއެމްގެ ފަރާތުން ކޮމަންޑޫ ދާއިރާގައި ވާދަކުރައްވާ ކެންޑިޑޭޓުގެ ހައްގުތައް ގެއްލިގެންދާކަމަށާއި، މިކަމަށް ހައްލު ހޯދަން އިލެކްޝަންސް ކޮމިޝަނުން ނޫޅޭކަމީ އެ ކޮމިޝަނުންވެސް މިކަމުގައި ބައިވެރިވާކަން ހާމަވާ ކަމެއް ކަމަށް ޝުޖާއު ވިދާޅުވިއެވެ. އަދި އޭސީސީގެ މެމްބަރުން ހަމަނުވެ އިންތިޚާބަކަށް ދިއުމަކީ ގަބޫލުކުރެވޭ ކަމެއް ނޫން ކަމަށް އިލެކްޝަންސް ކޮމިޝަންގެ ރައީސް ފުއާދު ތައުފީގު އެއްބަސްވެވަޑައިގެންނެވި ކަމަށް ޝުޖާއު ވިދާޅުވިއެވެ.
