ބީޗް ވޮލީ ކުރިއެރުވޭނީ އެކުގައި ގިނަ ވަގުތު މަސައްކަތްކޮށްގެން: ގައުމީ ކޯޗު

ރާއްޖޭގައި ބީޗްވޮލީބޯޅަ ކުރިއެރުވޭނީ އެކުގައި ގިނަ ވަގުތު މަސައްކަތްކޮށްގެން ކަމަށާއި، މިވަގުތަށް ބަލާނަމަ ބީޗްވޮލީބޯޅައިގެ ފެންވަރު ހުރީ އޭނާއަށް ކަމުދާ މިންވަރެއްގައި ކަމަށް ބީޗްވޮލީބޯޅަ ޓީމާއި އަލަށް ގުޅުނު ބްރެޒިލްގެ ކޯޗު ވިނީޝިއުސް މާޓިން ޖިއޯނީ ބުނެފިއެވެ.

ހުޅުމާލޭ ބީޗްވޮލީބޯޅަ ކޯޓުގައި ބުދަ ދުވަހު ވަނީ އައު ކޯޗު ވިނީޝިއުސް އާއިއެކު ފުރަތަމަ ޓްރެއިނިން ސެޝަން ކުރިއަށް ގެންގޮސްފައެވެ.

ބުދަ ދުވަހު ކުރިޔަށްދިޔަ ފަރިތަކުރުންތަކުގައި ބައިވެރިވެފައިވަނީ ދާދި ފަހުން ބޭއްވި ގައުމީ ވޮލީބޯޅަ މުބާރާތުގެ ޗެމްޕިއަން ޕެއާ ކަމަށްވާ އަޙްމަދު މުޙައްމަދު (ކޯކޭ) އާއި މުޙައްމަދު އަލީ (ޑެންޒޯ)ގެ އިތުރުން އިސްމާއިލް ސާޖިދު (ކުޑަކާއްޓެ) އާއި އާދަމް ނަސީމް (އެޑަމް)އެވެ.

ޓްރެއިނިން ސެޝަންއަށްފަހު މީޑިއާ އާއި ވާހަކަ ދައްކަމުން ވިނީޝިއުސް ބުނީ އެފްއައިވީބީ މެދުވެރިކޮށް އޭނާއަށް މި ލިބުނު ފުރުސަތަކީ އޭނާގެ ކެރިޔަރުގައިވެސް މުހިންމު ފުރުސަތެއް ކަމަށެވެ. އަދި ރާއްޖޭގެ ޓީމުގެ ކޯޗު ކަމުގެ މަގާމުގައި ހުރީ ވަރަށް ހިތްހަމަޖެހިގެން ކަމަށާއި، އެގޮތުން ވޮލީބޯޅަ އެސޯސިއޭޝަން އޮފް މޯލްޑިވްސް (ވީއޭއެމް)ގެ ފަރާތުން ލިބެމުންދާ އެއްބާރުލުމަށް ޝުކުރުއަދާކުރާ ކަމަށެވެ.

ބީޗް ވޮލީބޯޅަ ކުރިއެރުވުމަށް އެންމެ މުހިންމު ކަމަކީ އެކުގައި މަސައްކަތް ކުރުން ކަމަށާއި، ހެނދުނު ނޫނީ މެންދުރު ޓްރެއިނިން ބޭއްވި ކަމުގައިވިޔަސް ކުޅުންތެރިން ތިބެންވީ ތައްޔާރަށް ކަމަށާއި، ބްރެޒިލުގައި ލިބުނު ތަޖުރިބާއަށް ބަލާއިރު ދަސްވެފައިވާ ކަމަކީ މަސައްކަތް ކުރުން ކަމަށެވެ.

ވިނީޝިއުސް ބުނީ ހަމައެކަނި ބީޗްވޮލީ ޓްރެއިން ކޮށްގެން ކުރި ނާރާނެ ކަމަށާއި ޖިމް ޓްރެއިނިންގ އާއި ވީޑިއޯ ދިރާސާކުރުންވެސް މީގައި މުހިންމު ކަމަށެވެ.

ވިނީޝިއުސްގެ ކާމިޔާބީތަކަށް ބަލާއިރު، އޭނާ ވަނީ ބްރެޒިލްގެ އަންހެން ބީޗް ވޮލީ ބޯޅަ ޓީމުތަކަށް 2013 ވަނަ އަހަރުގެ ވޯލްޑް ޓުއާ އިން އެއް ވަނަ އަދި ދެ ވަނަ ހޯދައިދީފައެވެ. އަދި 2013 ވަނަ އަހަރުގެ ވޯލްޑް ޗެމްޕިއަންޝިޕް އިން ތިން ވަނަ ހޯދައިދިނެވެ. އޭގެ ފަހުން 2014 ވަނަ އަހަރުގައި ކޮންޓިނެންޓަލް ކަޕްގައި ބްރެޒިލްގެ އަންހެން ޓީމަށް އެއް ވަނަ ހޯދައިދިނެވެ. އަދި މިދިޔަ އަހަރުގެ ވޯލްޑް ޓުއާގައި ބްރެޒިލްގެ އަންހެން ޓީމަށް އެއް ވަނަ ހޯދައިދީފައެވެ.

މިއަހަރަކީ ބީޗްވޮލީގައި ރާއްޖެއަށް ބޮޑު އަހަރެކެވެ. އެގޮތުން ބީޗް ވޮލީގައި ރާއްޖެއަށް ބައިނަލްއަގްވާމީ ގިނަ މުބާރާތްތަކެއް މިއަހަރު އެބައޮތެވެ.

ބީޗްވޮލީ ޓުއާގެ މުބާރާތެއް މި އަހަރު ރާއްޖޭގައި ކުރިއަށް ގެންދަން ވަނީ ޝެޑިއުލްކޮށްފައެވެ. ރާއްޖޭގައި ބޭއްވޭ ބީޗްވޮލީ ޓުއާގެ މެޗުތައް ކުރިއަށްދާނީ މި އަހަރުގެ އޮކްޓޫބަރު 13-16 އަށެވެ. މިއީ ދުނިޔޭގެ ފެޑެރޭޝަނުން ބާއްވާ މި ފަދަ މުބާރާތެއް ރާއްޖޭގައި ހޯސްޓްކުރާ ފުރަތަމަ ފަހަރެވެ. މީގެ ކުރިން ރާއްޖޭގައި ވަނީ 2015 ވަނަ އަހަރު އޭވީސީ ބީޗްވޮލީ މުބާރާތުގެ މެޗުތަކެއް ކުރިއަށް ގެންގޮސްފައެވެ.