ހުޅުމާލެ ރުއްގަނޑުގައި ކޮވިޑް ސާމްޕަލް ސެންޓަރެއް ގާއިމްކޮށްފި

ހުޅުމާލެ ރުއްގަނޑުގައި ކޮވިޑް ސާމްޕަލް ސެންޓަރެއް ގާއިމްކޮށްފިއެވެ.

މިއީ، ހެލްތް ޕްރޮޓެކްޝަން އެޖެންސީ (އެޗްޕީއޭ)، ހުޅުމާލެ ހޮސްޕިޓަލް އަދި ހައުސިން ޑިވޮލޮޕްމެންޓް ކޯޕަރޭޝަން (އެޗްޑީސީ) ގުޅިގެން ގާއިމްކުރި ތަނެކެވެ.

މާލެ ސަރަހައްދުގައި ޕޮޒިޓިވްވާ މީހުންގެ އަދަދު އިތުރުވަމުން އަންނާތީ، ސޯޝަލް ސެންޓަރުގައި ގާއިމް ކޮށްފައިވާ ސާމްޕަލް ނަގާ ސެންޓަރު ބަންދުކޮށް ތާޖުއްދީން ސްކޫލުގައި ކޮވިޑަށް ޓެސްޓް ކުރުމަށް ސެންޓަރެއް ވަނީ ގާއިމްކޮށްފައެވެ. މިގެ އިތުރުން އެފްއޭއެމްގެ ކުރީގެ އިމާރާތުގައި ކޮވިޑް ސާމްޕަލް ނެގުމަށް ވެސް ވަނީ ސެންޓަރެއް ގާއިމުކޮށްފައެވެ.

އެޗްޕީއޭއިން ބުނީ މާލެ، ހުޅުމާލެ އަދި ވިލިމާލެއިން ޓެސްޓުކުރާ ސާމްޕަލްގެ ތެރެއިން ޕޮޒިޓިވްވާ ނިސްބަތް މިވަގުތު ހުރީ %5 އިން މަތީގައި ކަމަށެވެ.

ފާއިތުވި 24 ގަޑިއިރު 5،513 ސާމްޕަލް ޓެސްޓްކޮށްފައިވެއެވެ. އޭގެތެރެއިން 267 މީހުން ޕޮޒިޓިވްވެފައިވަނީ މާލެ ސަރަހައްދުންނެވެ. އަތޮޅުތަކުން ޕޮޒިޓިވްވެފައިވަނީ 158 މީހުންނެވެ. އަދި ރިސޯޓްތަކުން 83 މީހުން ޕޮޒިޓިވްވެފައިވެއެވެ. އަދި 28 މީހަކު ޕޮޒިޓިވްވެފައިވަނީ ކޮންތަނަކުން ކަމެއް ދެނެގަނެވިފައި ނުވާކަމަށް އެޗްޕީއޭއިން ވަނީ ބުނެފައެވެ.