ބޫސްޓަރ ޑޯޒް ޖަހައިދޭނެ މީހުން ހޯދަނީ
ބޫސްޓަރ ޑޯޒް ޖެހުމުގެ ޕްރޮގްރާމަށް 56 ސްޓާފުން ހޯދުމަށް ވަނީ އިއުލާންކޮށްފައި
ކޮވިޝީލްޑް ވެކްސިން
މިމަހުގެ ތެރޭގައި އާބާދީ ބޮޑުބަޔަކަށް ކޮވިޑް-19 ބޫސްޓަރ ޑޯޒް ޖެހުމަށް ތައްޔާރުވަމުން އަންނައިރު، ބޫސްޓަރ ޑޯޒް ޖެހުމުގެ ޕްރޮގްރާމްގައި މަސައްކަތްކުރާނެ މީހުން ހޯދަން ހެލްތު މިނިސްޓްރީން އިއުލާންކޮށްފިއެވެ.
ހެލްތު މިނިސްޓްރީން ވަނީ ވެކްސިން ބޫސްޓަރ ޑޯޒް ޖެހުމުގެ މަސައްކަތަށް ސަޕޯޓް ސްޓާފުންގެ ގޮތުގައި 4 ސްޓާފުންނާއި، ފްލޯ މެނޭޖްކުރާނެ މީހުންގެ ގޮތުގައި 6 މީހުންނާއި، 32 ޕްރޮގްރާމް އެސިސްޓެންޓުންނާއި، 10 ވެކްސިނޭޓަރުންނާއި 4 މެޑިކަލް އޮފިސަރުން ހޯދުމަށް އިއުލާންކޮށްފައެވެ. މިހުރިހާ މަގާމުތަކަށްވެސް ކުރިމަތިލުމަށް ހުޅުވާލާފައިވަނީ މިމަހުގެ 18 ވަނަ ދުވަހުގެ މެންދުރު 2 ޖެހުމާ ހަމައަށެވެ. މިހުރިހާ ސްޓާފުންވެސް ނަގަނީ 3 މަހުގެ މުއްދަތަށެވެ.
ސަޕޯޓް ސްޓާފުންނަށާއި ޕްރޮގްރާމް އެސިސްޓެންޓުންނާއި ފްލޯ މެނޭޖަރުންނަށް މަހަކު 7500 ރުފިޔާ ލިބޭއިރު، ވެކްސިނޭޓަރުންގެ މުސާރައަކީ މަހަކު 14،700 ރުފިޔާއެވެ. އަދި މެޑިކަލް އޮފިސަރުންގެ މުސާރައަކީ މަހަކު 24،240 ރުފިޔާއެވެ.
މިދިޔަ ޑިސެމްބަރުމަހުގެ 15ން ފެށިގެން ބޫސްޓަރ ޑޯޒު އާންމުންނަށް ދޭން ފަށާނެ ކަމަށް މީގެ ކުރިން އެޗްޕީއޭއިން ބުނެފައިވެއެވެ. ނަމަވެސް އާންމުންނަށް ބޫސްޓަރ ޑޯޒް ޖަހަން އަދި ހުޅުވާލަފައެއް ނުވެއެވެ. އެހެންނަމަވެސް އެޗްޕީއޭއިން އަންނަނީ އުމުރުން 50 އަހަރުން މަތީގެ މީހުންނަށާއި، ދިފާއީ ނިޒާމު ބަލިކަށި މީހުން އަދި ސިއްހީ ޚިދުމަތްތެރިންނަށް ބޫސްޓަރ ޑޯޒް ދެމުންނެވެ. މީގެތެރޭގައި ހަށިގަނޑުގެ ގުނަވަނެއް ބަދަލުކޮށްފައިވާ މީހުންނާއި، ހަށިގަނޑުގެ ދިފާއީ ބާރު ދެރަކުރާފަދަ ބޭސްތައް ބޭނުންކުރާ މީހުން ހިމެނެއެވެ.
ބޫސްޓަރ ޑޯޒް ޖަހަން ފެށުމަށް ފައިޒަރ ވެކްސިންގެ 100،620 ޑޯޒުގެ ޝިޕްމެންޓެއް މިހާރު ވަނީ ރާއްޖެއަށް ލިބިފައެވެ. އެހެންނަމަވެސް، ވެކްސިން ޖަހަން ނުފެށި ލަސްވަނީ ބޭނުންވާ ސިރިންޖު ނުލިބޭތީ ކަމަށް އެޗްޕީއޭއިން ވަނީ ބުނެފައެވެ. ނަމަވެސް އެންމެ ފަހުން ބޭއްވި ނޫސްވެރިންގެ ބައްދަލުވުމުގައި އެޗްޕީއޭއިން ބުނެފައިވަނީ، ކުރިޔަށް އޮތް ހަފްތާއެއްހާ ދުވަސްތެރޭގައި ސިރިންޖް ރާއްޖެއަށް ލިބޭނެކަމަށެވެ. އެއާއެކު ބޫސްޓަރ ޑޯޒް ޖެހުން ކުރިޔަށް ގެންދާނެކަމަށް އެޗްޕީއޭއިން ވަނީ ބުނެފައެވެ.
އެޗްޕީއޭއިން އެންމެފަހުން އާންމުކޮށްފައިވާ ތަފާސްހިސާބުތަކަށް ބަލާއިރު މިމަހުގެ 11 ވަނަ ދުވަހުގެ ނިޔަލަށް ރާއްޖޭގައި 28،544 މީހުން ވަނީ ބޫސްޓަރ ޑޯޒް ޖަހާފައެވެ.
