ބަޔާން މިއުނިކާއެކު ހަދާފައި އޮތް އެއްބަސްވުން ފްރާންސްގެ ފޯވާޑް ކިންގްސްލީ ކޯމަން އާކޮށްފިއެވެ.
ފްރާންސްގެ ޕީއެސްޖީން 2013 ވަނަ އަހަރު ސީނިއާ ކެރިއަރު ފެށައި، އޭގެ ފަހުން 2014 ވަނަ އަހަރު އިޓަލީގެ ޔުވެންޓަސްއަށްވެސް ކުޅުނު ކޯމަން އެންމެ ފުރަތަމަ ބަޔާނަށް ބަދަލުވީ 2015 ވަނަ އަހަރު ދެ އަހަރުގެ ލޯނު އެއްބަސްވުމެއްގެ ދަށުންނެވެ. އެކަމަކު އޭގެ ފަހުން ބަޔާނުން ވަނީ ކޯމަންގެ އެއްބަސްވުން ދާއިމީކޮށްފައެވެ.
މިހާރު އުމުރުން 25 އަހަރުގެ ކޯމަން ބަޔާނާއެކު މީގެ ކުރިން ހަދާފައި އޮތް އެއްބަސްވުން އަންނަ އަހަރު ހަމަވަން އޮތްއިރު، ބުދަ ދުވަހުގެ ވަގުތެއްގައި އެ ޓީމުން ވަނީ ކޯމަންގެ އެއްބަސްވުން އާކުރިކަން އިއުލާންކޮށްފައެވެ. އަދި އައު އެއްބަސްވުމާއެކު 2027 ވަނަ އަހަރުގެ ހޫނު މޫސުމުގެ ނިޔަލަށް އެ ޓީމުގައި ކޯމަން މަޑުކުރާނެ ކަމަށްވެސް އެ ކުލަބުން ވަނީ ބުނެފައެވެ.
ބަޔާނުގެ އެއްބަސްވުން އާކުރުމަށްފަހު ދިން އިންޓަވިއުއެއްގައި ކޯމަން ބުނީ އެއްބަސްވުން އާކުރެވުމުން އުފާކުރާ ކަމަށާއި، އެގޮތުން ބަޔާނަކީ ދުނިޔޭގައި މި ވަގުތު އޮތް އެންމެ މޮޅު އެއް ކުލަބު ކަމަށެވެ. އަދި އެ ކުލަބާއެކު ކުރިއަށް އޮތް ތަނުގައިވެސް ގިނަ ކާމިޔާބީތަކެއް ހޯދަން ބޭނުންވާ ކަމަށްވެސް ވަނީ ބުނެފައެވެ.
ބަޔާނުގައި ކޫމަން ކާމިޔާބު ދުވަސްތަކެއް ހޭދަކުރަމުން އަންނައިރު، ކޯމަން ވަނީ އޭނާގެ އުމުރުން 19 އަހަރުވީއިރު، ޔޫރަޕުގެ ވަރުގަދަ ތިން ލީގެއްގެ ޗެމްޕިއަން ޓީމަށް ކުޅެ ގިނަ ކާމިޔާބީތަކެއްވެސް ހޯދާފައެވެ. އެގޮތުން ޕީއެސްޖީއާއެކު ކޯމަން ފްރެންޗް ލީގު ދެ ފަހަރު ކާމިޔާބުކޮށްފައިވާއިރު، އޭނާ ވަނީ ޔުވެންޓަސްއާއެކު އިޓާލިއަން ލީގުވެސް ދެ ފަހަރު ކާމިޔާބުކޮށްފައެވެ.
އަދި ބަޔާނާއެކު މިހާތަނަށް ކޯމަން ގިނަ ކާމިޔާބީތަކެއް ހޯދާފައިވާއިރު، އޭގެ ތެރޭގައި ޖަރުމަން ލީގު ހަ ފަހަރު އަދި ޔުއެފާ ޗެމްޕިއަންސް ލީގާއި، ފީފާ ކުލަބު ވޯލްޑް ކަޕާއި ޔުއެފާ ސުޕަ ކަޕް ކާމިޔާބުކުރުން ފާހަގަކޮށްލެވެއެވެ. މީގެ އިތުރުން ކޯމަން ވަނީ ފްރާންސްގެ ގައުމީ ޓީމަށް މިހާތަނަށް 36 މެޗު ކުޅެދީ، އެ ގައުމާއެކު މިދިޔަ ސީޒަނުގެ ޔުއެފާ ނޭޝަންސް ލީގުވެސް ކާމިޔާބުކޮށްފައެވެ.
