ވައިނަލްޑަމް ހޯދަން ނިއުކާސަލުން މަސައްކަތްކުރަނީ

ޕީއެސްޖީއަށް ކުޅެމުން އަންނަ ނެދަލެންޑްސްގެ މިޑްފީލްޑަރު ޖިއޮޖީނިއޯ ވައިނަލްޑަމް ހޯދަން ނިއުކާސަލް ޔުނައިޓެޑުން އަލުން މަސައްކަތްކުރަމުން އަންނަ ކަމަށް ރިޕޯޓުތައް ބުނެފިއެވެ.

އުމުރުން 31 އަހަރުގެ ވައިނަލްޑަމް މީގެ ކުރިން ވަނީ ނިއުކާސަލުގައި އެއް ސީޒަން ހޭދަކޮށްފައެވެ. އެގޮތުން 2015 ވަނަ އަހަރުގެ ޖުލައި މަހު ވައިނަލްޑަމް ނިއުކާސަލާ ގުޅުނުއިރު، އޭނާ ވަނީ އެ ސީޒަނުގައި އެ ޓީމަށް ކުޅެދިން 40 މެޗުގައި 11 ލަނޑު ޖަހާފައެވެ. އެއާއެކު 2016 ވަނަ އަހަރު ލިވަޕޫލުން ވަނީ 23 މިލިޔަން ޕައުންޑުގެ ފީއަކަށް ވައިނަލްޑަމުގެ ސޮއި ހޯދާފައެވެ.

ލިވަޕޫލުގައި ކާމިޔާބު ދުވަސްތަކެއް ހޭދަކުރުމަށްފަހު ވައިނަލްޑަމް ޕީއެސްޖީއަށް ބަދަލުވީ މިދިޔަ ހޫނު މޫސުމުގެ ޓްރާންސްފާ ބާޒާރުގައި ހިލޭ ޓްރާންސްފާއެއްގެ ދަށުންނެވެ. އަދި އޭނާ ވަނީ އެ ޓީމާއެކު ތިން އަހަރުގެ އެއްބަސްވުމެއް ހަދާފައެވެ. އެކަމަކު އޭގެ ފަހުން ވައިނަލްޑަމަށް ޕީއެސްޖީގައި އަދި މިހާތަނަށް އެންމެ އެދެވޭ ކުޅުމެއް ދެއްކިފައި ނުވާއިރު، އޭނާ އެ ޓީމުގައި މި ވަގުތު ހުރީ އުފަލުން ނޫން ކަމަށް ރިޕޯޓުތައް ބުނެއެވެ.

މި ވަގުތު ދުނިޔޭގެ އެންމެ މުއްސަނދި ކުލަބުގެ ގޮތުގައި އޮތް ނިއުކާސަލަށް މި ޓްރާންސްފާ ބާޒާރުގައި 200 މިލިޔަން ޕައުންޑް ޚަރަދުކުރެވޭއިރު، ރިޕޯޓުތައް ބުނާ ގޮތުން އެ ޓީމުން އަންނަނީ ލޯނު އުސޫލުން ވައިނަލްޑަމުގެ ސޮއި ހޯދަން މަސައްކަތްކުރަމުންނެވެ. އެކަމަކު އަލުން އަނބުރާ ކުރީގެ ކުލަބަށް ބަދަލުވާން ވައިނަލްޑަމް ބޭނުންނުވާ ކަމަށްވެސް ރިޕޯޓުތައް ބުނެއެވެ.

މި ޓްރާންސްފާ ބާޒާރުގައި ނިއުކާސަލުން ބޮޑެތި ޚަރަދުތަކެއް ކުރާނެ ކަމަށް ބެލެވޭއިރު، ދާދި ފަހުން އެ ޓީމުން ވަނީ ސްޕެއިނުގެ އެތުލެޓިކޯ މެޑްރިޑަށް ކުޅެމުން އައި އިންގްލެންޑުގެ ޑިފެންޑަރު ކިއެރަން ޓްރިޕިއާގެ ސޮއި ހޯދާފައެވެ. މިއީ ސައުދީ އަރަބިއްޔާގެ ވަލީއަހުދު މުޙައްމަދު ބިން ސަލްމާނުގެ ހިއްސާއާއެކު ސައުދީގެ ޕަބްލިކް އިންވެސްޓްމަންޓް ފަންޑް (ޕީއައިއެފް) އިން ނިއުކާސަލް ގަތް ފަހުން އެ ޓީމުން ކުރި ފުރަތަމަ ޓްރާންސްފާއެވެ.

މި ވަގުތު ޕީއެސްޖީއަށް ކުޅެމުން އަންނަ ވައިނަލްޑަމް މީގެ ކުރިން ލިވަޕޫލުގައި ކާމިޔާބު ފަސް އަހަރު ހޭދަކޮށްފައިވާއިރު، އޭނާ ވަނީ ލިވަޕޫލަށް ކުޅެދިން 236 މެޗުގައި 22 ލަނޑު ކާމިޔާބުކޮށްފައެވެ. އަދި މި ފަހުން ލިވަޕޫލުން އިނގިރޭސި ޕްރިމިއާ ލީގާއި، ޔުއެފާ ޗެމްޕިއަންސް ލީގާއި، ޔުއެފާ ސުޕަ ކަޕުގެ އިތުރުން ފީފާ ކުލަބު ވޯލްޑް ކަޕް ކާމިޔާބުކުރިއިރު ވައިނަލްޑަމްގެ ހިއްސާ ބޮޑެވެ.