އުދައްޔުގެ މަރު: ދައުވާ އިއްވުމާއި ޖަވާބުދާރީވުން ދެން އޮންނަ އަޑުއެހުމެއްގައި
ދައުވާ އުފުލާފައިވަނީ ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ގާނޫނުގެ ދަށުން
އުދައްޔުގެ މަރުގެ މައްސަލައިގައި ދައުވާ އުފުލާފައިވާ އެރަށު ރިހިފަރުދާގެ، އަޙުމަދު ޝަމީމްއާއި، ބިލަތްމާގެ، ޝަރަފު ރަޝީދުއާއި، ގުލްފާމުގެ، މުޙައްމަދު މާޒިން
ގއ. މާމެންދޫގައި ހިންގި ގްރޫޕް މާރާމާރީއެއްގައި ވަޅިން ހަމަލާދީ އެރަށު ލިލީ އޮފްދަ ވެލީ، އަހްމަދު އުދައްޔު، 17، މަރާލި މައްސަލައިގައި ދައުވާ އުފުލާފައިވާ ފަރާތްތަކުގެ ޝަރީއަތުގެ އަޑުއެހުމެއް ބުދަ ދުވަހު ކްރިމިނަލް ކޯޓުގައި ކުރިއަށް ގެންގޮސްފިއެވެ.
މި މައްސަލައިގައި ތޫނު އެއްޗެއް ބޭނުންކޮށްގެން ޤަސްތުގައި މީހަކު މެރުމުގައި ބައިވެރިވުމުގެ ކުށުގެ ދައުވާ އުފުލާފައިވަނީ ގއ. މާމެންދޫ، ރިހިފަރުދާގެ، އަޙުމަދު ޝަމީމްއާއި، ގއ. މާމެންދޫ، ބިލަތްމާގެ، ޝަރަފު ރަޝީދުއާއި، ގއ. މާމެންދޫ، ގުލްފާމުގެ، މުޙައްމަދު މާޒިންގެ މައްޗަށެވެ. އެމީހުންގެ މައްޗަށް ވަނީ މީހަކަށް ނުރައްކާތެރި ހާނިއްކައެއްވާގޮތަށް ތޫނު އެއްޗެއް ނުވަތަ ހަތިޔާރެއް ބޭނުންކޮށްގެން މާރާމާރީ ހިންގުމުގައި ބައިވެރިވުމުގެ ކުށުގެ ދައުވާވެސް އުފުލާފައެވެ. އަދި 18 އަހަރު ނުފުރޭ ކުއްޖެއްގެ މައްޗަށްވެސް ދައުވާ އުފުލައި، ޖުވެނައިލް ކޯޓުގައި ޝަރީއަތް ކުރިއަށް ދެއެވެ.
މި މައްސަލާގައި 18 އަހަރުން ދަށުގެ ކުއްޖެއްގެ މައްޗަށް އުފުލާފައިވަނީ ބިރުދެއްކުމާއި ނުރައްކާތެރި ހަތިޔާރާއި ތޫނު އެއްޗެހި ގެންގުޅުން މަނާކުރުމުގެ ޤާނޫނުގެ ދަށުން، ތޫނު އެއްޗެއް ބޭނުންކޮށްގެން ޤަޞްދުގައި މީހަކު މެރުމުގެ ކުށުގެ ދަޢުވާއާއި، މީހަކަށް ނުރައްކާތެރި ހާނިއްކައެއްވާގޮތަށް ތޫނު އެއްޗެއް ނުވަތަ ހަތިޔާރެއް ބޭނުންކޮށްގެން މާރާމާރީ ހިންގުމުގެ ކުށުގެ ދަޢުވާއެވެ.
މި މައްސަލައިގައި ބުދަ ދުވަހު ކުރިއަށް ގެންގޮސްފައިވަނީ މައްސަލައިގެ އިބްތިދާއީ އަޑުއެހުމެކެވެ. އެގޮތުން މި އަޑުއެހުން ކުރިއަށް ގެންދެވީ ގާޒީ އަލީ ނަދީމެވެ.
މި މައްސަލައިގެ އެންމެ ފަހު އަޑުއެހުމުގައި ހެކި ރައްކާތެރި ކުރުމުގެ އަމުރަށް އެދި ހުށައަޅާފައިވާ ފޯމު އިސްލާޙު ކުރުމަށް ދައުލަތަށް ފުރުސަތެއް ދެއްވާފައިވެއެވެ. އެގޮތުން ބުދަ ދުވަހުގެ އަޑުއެހުމުގައި ދައުލަތުން ވަނީ ރައްކާތެރި ކުރުމަށް އެދިފައިވާ ހެކިތަކުގެ ތެރޭގައި 25 ސިއްރު ހެއްކެއް ހިމެނޭ ކަމަށެވެ. އެ ފަރާތްތަކުގެ މައުލޫމާތު ހާމަވެއްޖަނަމަ ޖިސްމާނީ އަނިޔާއެއް ލިބުމާއި، ހެކި ނެތި ދިއުމުގެ ފުރުސަތުވެސް އޮތްކަމަށް ވަކީލާ ވިދާޅުވިއެވެ. އަދި ޙާދިސާ ހިނގި ތަނުގެ ސީސީޓީވީ ފުޓޭޖްވެސް ސިއްރު ކުރުމަށް ވަނީ އެދިފައެވެ. ދައުލަތުން ވަނީ ޝަރީއަތުން ކަނޑައަޅާ ޝަރުތުތަކާއެކު، ބައެއް ހެކި ރައްކާތެރި ކުރުމަށްވެސް އެދިފައެވެ.
ދައުލަތުގެ ވަކީލާ ވިދާޅުވީ، ސިއްރު ހެކިންގެ ބަޔާންތައް ހާމަ ކުރުމަކީވެސް އެ ހެކިން ދެނެގަތުމުގެ ފުރުސަތު އޮންނާނެ ކަމެއް ކަމަށެވެ. އެއާއެކު، ބަޔާންތައްވެސް ސިއްރު ކުރުމަށް ވަކީލާ އެދިލެއްވިއެވެ.
ނަމަވެސް ދިފާއުން ވަނީ ހެކި ރައްކާތެރި ކުރުމުގެ އަމުރު ނެރުއްވާއިރު، ހެކިބަސް ދޭން ތިބި ފަރާތްތަކުގެ ވަނަވަރު ނުހިމަނައި، ބަޔާންތައް ދިފާއަށް ދިރާސާ ކުރެވޭނެ ގޮތް ހައްދަވައިދެއްވުމަށް އެދިލައްވާފައެވެ.
ދެފަރާތުން ފާހަގަކުރި ކަންކަމަށް ރިއާޔަތް ކުރައްވައި މައްސަލަ ބައްލަވާ ގާޒީ އަލީ ނަދީމް ވަނީ ހެކިންގެ ވަނަވަރާއި، ބަޔާނުން އެ ހެކިންނަކީ ކޮން ބައެއްކަން އެނގޭ ބައިތައް އުނިކޮށްފައި ދިފާއަށް ހިއްސާ ކުރުމާމެދު ދެކިލައްވާ ގޮތެއް އައްސަވާފައެވެ. އެކަމާ ގުޅޭގޮތުން ދައުލަތުގެ ވަކީލާ ވިދާޅުވީ، ބަޔާންތަކުގައި ހިމެނޭ އެއްވެސް މިންވަރަކީ އެ ހެކިންގެ މައުލޫމާތު އެނގޭނެފަދަ މައުލޫމާތެއް ނަމަ ސިއްރު ކުރުމަށްފަހު، ބާކީ ހުރި މައުލޫމާތު ހިއްސާ ކުރުމަށް އިއުތިރާޒު ނުކުރައްވާ ކަމަށެވެ. ނަމަވެސް އެ މައުލޫމާތުތަކުގެ މިންގަނޑު ކަނޑައެޅުމުގެ އިހުތިޔާރު ދައުލަތަށް ދެއްވުމަށް ދައުލަތުގެ ވަކީލާ އެދިލެއްވިއެވެ.
ގާޒީ ވަނީ ހެކިވެރިންނަކީ ކާކުކަން އެނގޭނެ މައުލޫމާތުތައް ސިއްރު ކުރުމަށްފަހު ޝަރީއަތަށް ހިއްސާ ކުރުމަށް އަންގަވާފައެވެ. އަދި ދައުލަތުން އެދުނު ގޮތަށް މައުލޫމާތުތަކުގެ މިންގަނޑު ކަނޑައެޅުމުގެ އިޚުތިޔާރު ދައުލަތަށް ދެއްވުމަށް ގާޒީ ވަނީ އިއުތިރާޒު ކުރައްވާފައެވެ. ހާދިސާގެ ފުޓޭޖް ސިއްރު ކުރުމަށް ނިންމި ނަމަވެސް، ހެކިވެރިން ފެންނަ ބައި ސިއްރު ކުރުމަށްފަހު ފުޓޭޖް ޝަރީއަތަށް ހިއްސާ ކުރުމަށް ގާޒީ ވަނީ އަންގަވާފައެވެ. އެގޮތުގެ މަތިން ގާޒީ ވަނީ އަމުރު ނެރެދެއްވާފައެވެ.
މި އަޑުއެހުމުގައި ދައުވާއަށް ޖަވާބުދާރީވުމުގެ ކުރިން ބަލަން ބޭނުންވާ ލިއެކިއުންތައް ހަމަނުވާކަމަށް ދިފާއުން ފާހަގަ ކުރުމާއި ގުޅިގެން ޝަރީއަތުން ވަނީ ލިއެކިއުންތައް ހަމަ ކުރުމަށް ފުރުސަތެއް ދެއްވާފައެވެ. އެގޮތުން 15 ދުވަހަށްފަހު މި މައްސަލައިގެ އަޑުއެހުމެއް އޮންނާނެކަމަށް މައްސަލަ ބައްލަވާ ގާޒީ ވިދާޅުވިއެވެ. އެ އަޑުއެހުމުގައި އޮންނާނީ ދައުވާ ސާފު ކޮށްދިނުމާއި ދައުވާއަށް ޖަވާބުދާރީވުމެވެ.
