ކޮވިޑުން ރައްކާތެރިވުމަށް ސަރުކާރާއި ރައްޔިތުން އެކައްޗެއް ކިޔަންޖެހޭ: ޑރ ފައިސަލް
އާންމު ސިއްހަތާއި ގުޅޭ ނިންމުންތައް ނިންމާއިރު އެކަން ކުރާ ފަރާތުން އެއްގޮތަކަށް ނިންމުން ނިންމަންޖެހޭ
ޑރ އަހުމަދު ފައިސަލް ފަލަސުރުޚީ ޕްރޮގްރާމްގައި ވާހަކަދައްކަވަނީ
ކޮވިޑުން ރައްކާތެރިވުމަށް އަޅަންޖެހޭ ފިޔަވަޅުތައް އެޅުމުގައި ސަރުކާރާއި އާންމު ރައްޔިތުން އެކައްޗެއް ކިޔަންޖެހޭކަމަށް އައިޖީއެމްއެޗްގެ ޑޮކްޓަރ އަހުމަދު ފައިސަލް ވިދާޅުވެއްޖެއެވެ.
ރާއްޖެޓީވީގެ "ފަލަސުރުޚީ" ޕްރޮގްރާމްގައި ވާހަކަދައްކަވަމުން ޑރ ފައިސަލް ވިދާޅުވީ އާންމު ސިއްހަތާއި ގުޅޭ ނިންމުންތައް ނިންމާއިރު އެކަން ކުރާ ފަރާތުން އެއްގޮތަކަށް ނިންމުން ނިންމަންޖެހޭކަމަށެވެ. މިއަދު ނިންމާ ނިންމުމެއް މިރޭވާއިރު ބަދަލުވެގެން ނުވާނެކަމަށާއި އެގޮތަށް ހެދުމުން ކަމާބެހޭ ފަރާތްތަކާމެދު ރައްޔިތުންގެ އޮންނަ އިތުބާރު ގެއްލިގެންދާކަމަށް ޑރ ފައިސަލް ވިދާޅުވިއެވެ. އަދި ނިންމާ ނިންމުމާމެދު އާންމުންގެ މެދުގައި އޮޅުން ބޮޅުން އުފެދިގެންދާކަމަށް ވިދާޅުވިއެވެ. އެހެންކަމުން ނިންމާ ނިންމުންތައް ވަކި ގޮތެއްގައި ހިފެހެއްޓުން މުހިންމު ކަމަށާއި މިކަމުން އަރައިގަތުމަށް އެންމެންވެސް ބޭނުންވާއިރު އެކައްޗެއް ކިޔުން މުހިންމު ކަމަށް ވިދާޅުވިއެވެ.
މީގެއިތުރުން ޑރ. ފައިސަލް ވިދާޅުވީ ރާއްޖެއިން މިހާރު ފެންނަމުން މިދާ ކޭސްތަކަކީ އޮމިކްރޯންގެ ކޭސްތަކެއްކަމަށެވެ. ޓެސްޓްކޮށްގެން މަދު އަދަދެއްގެ ކޭސްތައް ފެނުނު ކަމުގައިވިޔަސް ހަގީގަތުގައި މިހާރު ރާއްޖޭގައި އުޅެމުންދަނީ އޮމިކްރޯން ވޭރިއަންޓްކަމަށް ވިދާޅުވިއެވެ. މިއާއެކު ކޭސްތަކުގެ އަދަދު ކުރިޔަށް އޮތްތަނުގައިވެސް އިތުރުވެގެންދާނެ ކަމަށް ޑރ. ފައިސަލް ވިދާޅުވިއެވެ.
މީގެއިތުރުން އޮމިކްރޯން ވޭރިއަންޓަކީ މައިލްޑް ވޭރިއަންޓަކަށްވިޔަސް އެކި މީހުންނަށް ބަލީގެ އަސަރުކުރާ މިންވަރު ތަފާތުވާނެކަމަށް ވިދާޅުވިއެވެ. އެގޮތުން މާބަނޑު މީހުންނާއި ކުޑަކުދިންނާއި އެކި ބަލިތައް ތަހައްމަލުކުރަމުންދާ މީހުންނަށް ބަލީގެ އަސަރު ކުރާ މިންވަރު ތަފާތުވާނެކަމަށް ވެސް ވިދާޅުވިއެވެ. އެހެންކަމުން ވައިރަސްއިން ރައްކާތެރިވުމަށް ފިޔަވަޅުތައް އެޅުން އެއީ މުހިންމު ކަމެއްކަމަށް ޑރ. ފައިސަލް ވިދާޅުވިއެވެ.
