ފާއިތުވި 24 ގަޑިއިރު ރާއްޖެއިން 593 މީހުން ކޮވިޑް-19ށް ޕޮޒިޓިވްވެއްޖެއެވެ.

ހެލްތު ޕްރޮޓެކްޝަން އެޖެންސީ (އެޗްޕީއޭ)ން ބުނީ ފާއިތުވި 24 ގަޑިއިރު 5818 ސާމްޕަލް ޓެސްޓްކޮށްފައިވާކަމަށެވެ. އޭގެތެރެއިން 199 މީހުން ޕޮޒިޓިވްވެފައިވަނީ މާލެ ސަރަހައްދުންނެވެ. އަތޮޅުތަކުން ޕޮޒިޓިވްވެފައިވަނީ 197 މީހުންނެވެ. އަދި ރިސޯޓްތަކުން 124 މީހުން ޕޮޒިޓިވްވެފައިވެއެވެ. އަދި 73 މީހަކު ޕޮޒިޓިވްވެފައިވަނީ ކޮންތަނަކުން ކަމެއް ދެނެގަނެވިފައިނުވާކަމަށް އެޗްޕީއޭއިން ބުނެއެވެ.

މިއާއެކު ރާއްޖެއިން ކޮވިޑަށް ޕޮޒިޓިވްވީ މީހުންގެ އަދަދު ވަނީ 99،099ށް އަރާފައެވެ. މީގެތެރެއިން 94،502 މީހުން ވަނީ ބަލިން ރަނގަޅުވެފައެވެ. މިވަގުތު އެކްޓިވް ކޭހުގެ ގޮތުގައި 4320 ކޭހެއް އަންނަނީ ގުނަމުންނެވެ. މީގެތެރެއިން 20 މީހަކަށް އަންނަނީ ހޮސްޕިޓަލްތަކުގައި އެޑްމިޓްކޮށްގެން ފަރުވާދެމުންނެވެ. އަދި 264 މީހަކު ވަނީ މިބަލީގައި ނިޔާވެފައެވެ.

މާލެ ސަރަހައްދުގައި ކޮވިޑް-19ގެ ކޭސް އިތުރުވެ، ހަފުތާއަކު ޓެސްޓުކުރެވޭ ސާމްޕަލްގެ ނިސްބަތުން ޕޮޒިޓިވިޓީ 5 އިންސައްތައަށްވުރެ ވަނީ މަތިވެފައެވެ. ކޮވިޑް-19ގެ ހާލަތު ގޯސްވަމުންދާތީ މިހާރު ދަނީ އިތުރު ފިޔަވަޅުތައް އަޅަމުންނެވެ. ރާއްޖޭގައި ކޭސްތަކުގެ އަދަދު އިތުރުވެފައިވާއިރު އާންމުންނަށް ބޫސްޓަރ ޑޯޒް ޖެހުމަށް ހުޅުވާލުމަށް ސަރުކާރުން ދަނީ ތައްޔާރުވަމުންނެވެ.

ރާއްޖޭގައިވެސް އޮމިކްރޯން ވޭރިއަންޓުގެ ކޮމިއުނިޓީ ސްޕްރެޑެއް އުޅޭކަމަށް އެޗްޕީއޭގެ މެޑިކަލް އޮފިސަރ ޑރ ފާތިމަތު ނަޒްލާ ރަފީގް ވަނީ ވިދާޅުވެފައެވެ. ޑރ ނަޒްލާ ވިދާޅުވީ، އެހެން ގައުމުތަކުގައިވެސް އޮމިކްރޯން ވޭރިއަންޓު ހަލުވިކޮށް ފެތުރެމުންދާ ކަމަށެވެ. އަދި ކޭސްތައް ދެގުނަވާ ނިސްބަތް އެހެން ވޭރިއަންޓުތަކާ އަޅާބަލާއިރު މަތިކަމަށް ވިދާޅުވިއެވެ. އެގޮތުން އެއް ދުވަހާ 3 ދުވަހާ ދޭތެރޭގައި ކޭސްތައް ދެގުނަވަމުންދާކަމަށް ޑރ ނަޒްލާ ވިދާޅުވިއެވެ.

މިހާރު ޑެލްޓާއާއި އޮމިކްރޯން ވޭރިއަންޓު އުޅުނުކަމުގައިވިޔަސް، ކުރިއަށް އޮތް ތަނުގައި ގިނަވާނީ އޮމިކްރޯން ވޭރިއަންޓުކަމަށްވެސް ނަޒްލާ ލަފާ ކުރައްވައެވެ.